ЯҢАЛЫКЛАР

12-25 май көннәрендә М.Җәлил исемендәге Татар академик опера һәм балет театры сәхнәсендә Рудольф Нуриев исемендәге XXIII Халыкара классик балет фестивале узачак. Опера һәм балет театры матбугат хезмәтеннән хәбәр ителгәнчә, Казанга киләчәк кунакларның исемнәре билгеле булды.

"Универсиада уздыруга 3 ел кала, Казанда шундый югары дәрәҗәдәге әзерлек булу безне таң калдырды. Оештыру комитеты халыкара дәрәҗәдә уеннар оештыруның нәрсә икәнлеген аңлаган. Бу бик зур колачлы Универсиада булачак", - дип белдерде "Татмедиа" агентлыгында узган матбугат очрашуында FISUның җәйге Универсиадалар директоры Марк Ванденплас.

Билгеле булганча, Казанга, 2013 елгы Универсиадага әзерлеккә күзәтчелек итү максатыннан, 12 апрельдә FISU делегациясе килде. Делегация составына FISU Башкарма комитеты әгъзасы, техник комиссия рәисе Ставрос Дувис, FISUның җәйге Универсиадалар директоры Марк Ванденплас, телетапшырулар буенча директор Деян Сусович һәм спорт директоры, Белградтагы Универсиада авылы мэры Михала Бухела керде. Эшлекле сәфәр кысаларында FISU делегатлары ТР Президенты Рөстәм Миңнеханов белән очрашты.

Берничә көн дәвамында кунаклар Универсиада авылы төзелеше һәм аның инфраструктурасы белән танышты. Марк Ванденплас билгеләп үткәнчә, Универсиадалар уздыру тарихында беренче тапкыр Универсиада авылы уеннарга 3 ел кала тулы әзерлектә диярлек. Җәйге Универсиадалар директоры эшләрнең бик тиз алып барылуын билгеләп үтеп, моның оештыру комитеты ягыннан күзәтчелекнең нык булуы турында сөйләвен белдерде.

15 апрельдә ТР Сәнәгать һәм сәүдә министрлыгында министрның беренче урынбасары вазифаларын башкаручы Владимир Соловьев Венгрия Республикасының РФ Гадәттән тыш һәм тулы вәкаләтле илчесе Дьердя Гилиан белән очрашты. Яклар ике республика арасындагы хезмәттәшлекнең перспектив юнәлешләрен барлады.

Венгрия илчесенә Татарстанның сәнәгый һәм инвестиция потенциалы тәкъдим ителгән. Владимир Соловьев ике арадагы хезмәттәшлекне үстерүнең бер юлы итеп "Алабуга" МИЗ га резидентлар сыйфатында Венгрия компанияләрен җәлеп итүне атаган. Татарстан машина төзелеше продукциясен Венгрия базарына чыгару, нефть химиясе комплексы продукциясе белән тәэмин итүне киңәйтү, Венгрия компанияләрен ТР кече һәм урта бизнес, авыл хуҗалыгы предприятиеләре белән хезмәттәшлеккә җәлеп итү, күргәзмә-ярминкә, туризм өлкәләрендә хезмәттәшлек тә перспектив юнәлешләр санала.

2010 елның беренче кварталы нәтиҗәләре буенча "Түбән Кама Нефтехим" ААҖнең чиста табышы 1,3 миллиард сум тәшкил иткән. Бүген компаниянең генераль директоры Владимир Бусыгин акционерларның еллык җыелышында әнә шулай дип белдерде.

В.Бусыгинның сүзләренә караганда, 2010 елның беренче кварталында "Түбән Кама Нефтехим" 20 миллиард сумлык продукция җитештергән, бу чорда компаниянең чиста табышы 1,3 миллиард сум тәшкил иткән. Өстәвенә, март аенда предприятие продукция эшләп чыгаруның рекордлы күләменә (7,5 миллиард сум) ирешкән.

Чагыштыру өчен: 2009 елның беренче кварталында "Түбән Кама Нефтехим" 1,76 миллиард сумлык зыян күрде, тулаем алганда 2009 ел нәтиҗәләре буенча чиста табыш 424 миллион сум тәшкил итте. Узган ел нәтиҗәләре буенча 57 миллиард сумлык продукция җитештерелде.

15 апрельдә Татарстан Республикасы Президенты Рөстәм Миңнеханов ТР Хөкүмәте йортында Россия Федерациясе Федераль иминлек хезмәтенең Сарытау һәм Самара өлкәләре буенча Чик буе идарәсе башлыгы Александр Костюченков белән очрашты.

15 апрельдә Татарстан Дәүләт Советы Рәисе Фәрит Мөхәммәтшин Чаллыда республика парламенты президиумының күчмә утырышын үткәрә.

Казан шәһәр Думасының 49 нчы сессиясе 21 апрельдә узачак, анда 9 мәсьәлә каралачак. Бүген Казан шәһәр Думасы президиум утырышында сессиянең чакырылу датасы һәм көн тәртибе расланды.

Казанның вице-мэры Людмила Андреева хәбәр иткәнчә, сессиядә 9 мәсьәлә каралачак. Депутатлар Казан башкарма комитетының икътисади үсеш комитеты рәисе Азат Шәраповның хисабын тыңлаячак. Финанс идарәсе башлыгы Айрат Гарипов 2009 ел бюджетының үтәлеше һәм 2010 ел бюджетына кертелгән үзгәрешләр хакында бәян итәр дип көтелә. Физик тәрбия һәм спорт комитеты җитәкчесе Илгиз Фәхриев "2007-2012 елларда яшәү урыны буенча физик культура һәм спортны үстерү" программасын үтәүнең барышы хакында мәгълүмат бирәчәк. Людмила Андреева хәбәр иткәнчә, әлеге программага кайбер үзгәрешләр кертү күздә тотыла.

14 апрельдә Казан дәүләт университетының "УНИКС" мәдәни-спорт комплексында "Созвездие-Йолдызлык" X республика эстрада сәнгате телевизион яшьләр фестиваленең суперфиналын рәсми төстә ачу тантанасы уза.

Быел фестиваль Бөек Ватан сугышында Җиңүнең 65 еллыгын бәйрәм итүгә багышланган. Фестиваль нигезләмәсе буенча барлык конкурсантлар да профессиональ жюри хөкеменә хәрби тематикага иҗади номерлар тәкъдим итте.

Суперфиналда Татарстан Республикасының 43 районы һәм шәһәреннән, шулай ук Мәскәү, Амурдагы Комсомольск, Пенза, Йошкар-Ола, Волжск калаларыннан 2900 яшь талант катнаша.

14 апрель көнне ТР Дәүләт Советының Дәүләт корылышы һәм җирле үзидарә комитеты утырышында депутатлар "Татарстан Республикасының атказанган мәгълүматлаштыру һәм элемтә хезмәткәре" Татарстан Республикасы мактаулы исемен гамәлгә кую һәм "Татарстан Республикасы дәүләт бүләкләре турында" ТР Законының 21 һәм 22 статьяларына үзгәрешләр кертү хакында" закон проектын икенче укылышка әзерләде.

"Татарстан - яңа гасыр" Республика иҗтимагый хәрәкәте сәяси советының бүгенге утырышы иҗтимагый оешмаларның яшьләрне патриотик рухта тәрбияләүгә керткән өлеше һәм Бөек Җиңүнең 65 еллыгын бәйрәм итүгә әзерлек эшләренә багышланачак. Чарада хәрәкәтнең лидеры, Татарстан парламенты башлыгы Фәрит Мөхәммәтшин катнаша.