ЯҢАЛЫКЛАР

РФ Пенсия фондының ТР бүлеге Бөтенроссия бәйгесендә җиңеп, 2009 елда пенсия фондының лидеры һәм иң яхшы бүлеге исемнәренә лаек булды. Шул уңайдан ТР Президенты Рөстәм Миңнеханов РФ Пенсия фондының ТР бүлеге җитәкчесе Марсель Имамовны котлады, дип хәбәр итә Президентның матбугат хезмәте. Ел саен уздырыла торган әлеге традицион бәйгедә РФ Пенсия фондының төбәкләрдәге 82 бүлеге катнаша. Узган ел нәтиҗәләре буенча Татарстан бүлеге эшне оештыруда алдынгы форма һәм ысуллар кулланган, клиентлар хезмәтенең нәтиҗәлелеген тәэмин иткән, мәҗбүри пенсия иминияте өчен иминият кертемнәрен нәтиҗәле җыйган өчен җиңүче дип табылды.

Иске автомобильләрне утильләштерү программасы үтәлешенә багышланган киңәшмәне бүген ТР Хөкүмәт Йортында ТР Премьер-министры вазифаларын башкаручы Равил Моратов үткәрде.

Быел Казанда Россия-Алмания идарәче кадрларын әзерләү программасы идарә комитетының унынчы юбилей утырышы узачак. Чараның әлегә төгәл датасы билгеләнмәгән. Аның июль-сентябрь аралыгында узачагы гына мәгълүм. Бу хакта бүген ТР Министрлар Кабинетында узган брифингта икътисад министры вазифаларын башкаручы Марат Сафиуллин хәбәр итте.

РФ халык хуҗалыгы оешмалары өчен идарәче кадрлар әзерләү буенча Президент программасын гамәлгә ашыру тарихында беренче тапкыр буларак, узган ел ахырында аның кысаларында Россиягә немец белгечләренең стажировкасы оештырылган иде. Тәҗрибә төбәге итеп сайланган Татарстанда Алмания предприятиеләренең 12 менеджеры стажировка узды.

"Татарстан" авиакомпаниясе" ААҖ 1 майдан Казаннан Прагага очышлар башлый. Пассажирларга сишәмбе һәм шимбә көннәрендә Boeing 737-500 очкычы хезмәт күрсәтәчәк, дип хәбәр итә аэропортның матбугат хезмәте. "Казан" аэропорты язгы-җәйге сезонда традицион рәвештә рейслар санын арттыра һәм очышлар географиясен киңәйтә. Быелгы сезон да искәрмә булмаячак.

7 апрельдән башлап "Казан" Халыкара аэропорты" ачык акционерлык җәмгыятеннән Норильск - Казан - Махачкала маршруты буенча авиация элемтәсе җайга салыначак. Пассажирларга һәр чәршәмбедә бөтен уңайлыклары булган Ту-134 самлеты хезмәт күрсәтәчәк. Тагын шунысы бар, пассажирларга очкычлар кузгала торган аэропортның жирле вакытына ориентлашырга кирәк. Яңа юнәлешкә билетлар сатыла башлады инде.

ТР Дәүләт Советы татарстанлыларның Бөек Җиңүнең 65 еллыгына ветераннар өчен акча җыю буенча инициативасын хуплап чыкты һәм республика халкын әлеге хәйрия акциясенә кушылырга чакыра.

Татарстан парламенты депутатлары һәм Дәүләт Советы Аппараты хезмәткәрләре үзләренең бер көнлек хезмәт хакын "Җиңү" дип исемләнгән махсус хисап счетына күчерде. Бу счет "Ак Барс Созидание" хәйрия фонды тарафыннан март ае башында ачылды. Бүгенгә көнгә кадәр анда якынча 14 млн. сум акча җыелган.

6 апрельдә Татарстан Президенты Рөстәм Миңнеханов РФ Куркынычсызлык Советы һәм Идел буе федераль округы Советы киңәшмәсендә катнаша.

2010/2011 уку елында РФ Халык хуҗалыгы оешмалары өчен идарәче кадрлар әзерләү буенча Президент программасында катнашучыларны сайлап алу башлана. Яңа идарә технологияләрен үзләштерергә теләк белдерүче Татарстан белгечләрен сайлап алу агымдагы елның 20 июненә кадәр дәвам итәчәк. Тестлар ярдәмендә сынауны уңышлы узган 155 идарәчесе әлеге Президент программасы нигезендә менеджерлыкны нәтиҗәле үстерү буенча белем алачак. Быелгы сайлап алуның шартлары һәм Президент программасының Татарстанда идарәче кадрларны әзерләүдәге роле бүген ТР Министрлар Кабинетында узачак брифингта төп тема булачак. Журналистлар белән очрашуга икътисад министры вазифаларын башкаручы Марат Сафиуллин чакырылган.

5 апрельдә Казан Кремлендә Татарстан Президенты Рөстәм Миңнеханов 2009 елда РФ субъектлары арасында гражданнарны хәрби хезмәткә иң яхшы әзерләүчеләрне ачыклау максатыннан үткәрелгән бәйгегә нәтиҗә ясау буенча Үзәк конкурс комиссиясе рәисе, генерал-лейтенант Сергей Николенко белән очрашты.

"Казан ярминкәсе" ачык акционерлык җәмгыяте территориясендә 6-8 апрель көннәрендә унынчы мәртәбә "Мәгариф. Карьера" дип аталган махсус күргәзмә оештырыла. Күргәзмә ТР Мәгариф һәм фән министрлыгы, ТР Хезмәт, мәшгульлек һәм социаль яклау министрлыгы, КАзан шәһәре мэриясе белән берлектә уздырыла.