ЯҢАЛЫКЛАР

12 апрельдә Казанның Җиңү паркында, Мәңгелек ут янындагы 1 нче пост Хәтер вахтасына тантаналы рәвештә басу вакыйгасы белән бергә, республикада “Георгий тасмасы” акциясенә старт бирелде. Үзебезнең ил күләмендәге һәм илебез чикләрен үтеп чыккан әлеге акция 22-23 апрельда гына башлана. Быел Татарстанда, узган елдагы кебек, 500 мең тасма өләшү ниятләнә.

12 апрель көнне Татарстан Республикасы Президенты Рөстәм Миңнеханов 2010 ел VIII Бөтенроссия җәйге авыл спорт уеннарына әзерләнү һәм аларны үткәрү буенча оештыру комитеты утырышында катнашты.

12 апрель көнне ТР Президенты Аппараты җитәкчесе Юрий Камалтынов Мәскәүдә Татарстан Республикасының Россия Федерациясендәге яңа вәкаләтле вәкилен тәкъдим итте. Ул - РФ Эчке эшләр министрлыгы Баш мәгълүмати-аналитика үзәге җитәкчесенең элеккеге беренче урынбасары Равил Әхмәтшин.

Р.Әхмәтшинны вәкаләтле вәкил итеп билгеләү һәм Татарстан Республикасының Россия Федерациясендәге вәкаләтле вәкиле Назиф Мирихановны вазифасыннан азат итү турындагы Указга Татарстан Президенты Рөстәм Миңнеханов кул куйды.

Җәйге яллар чоры якынлашу белән, туристлык операторлары һәм агентлыклары, круиз үзәкләре өчен кызу эш өсте башлана. Сәяхәт һәм ял индустриясе өлкәсендә эшләүчеләр ел саен апрель урталарында Татарстан башкаласына халыкара күргәзмәгә җыела. Бу атнада әлеге традицион чара "Казан ярминкәсе"ндә 15 нче тапкыр ишекләрен ачачак.

"Казан Ярминкәсе" менеджеры Ольга Сидоренко хәбәрчебезгә җиткерүенчә, "Туризм индустриясе" күргәзмәсе бу юлы да туристлык хезмәтләренең барлык спектрларын колачлый. Күргәзмәгә килүче казанлылар һәм башкала кунаклары игътибарына дөньяның төрле төбәкләренә традицион һәм экзотик турлар, шифаханә-курортларга юлламалар, балаларны савыктыру белән бәйле ял программалары, актив ял һәм туризм, сәяхәтләр белән бәйле хезмәтләр тәкъдим ителәчәк.

12 апрельдә 15.00 сәгатьтә Казанның Җиңү паркында, Мәңгелек ут янындагы 1 нче пост ачылу уңаеннан, митинг булачак.

Бөек Ватан сугышында Җиңүнең 65 еллыгын каршылау чараларының әлегесендә рәсми затлардан ТР Премьер-министры вазифаларын башкаручы Равил Моратов, ТР мәгариф һәм фән министры вазифаларын башкаручы Альберт Гыйльметдинов, ТР яшьләр эшләре, спорт һәм туризм министры вазифаларын башкаручы Марат Бариев, ТР хәрби комиссары Сергей Погодин, Казан шәһәре мэры Илсур Метшин, шулай ук яшьләрнең иҗтимагый оешмалары вәкилләре, студентлар, мәктәп укучылары катнашыр дип көтелә.

ТР Мәгариф һәм фән министрлыгы агымдагы елның 25 апрелендә Казанда Төркия Республикасы университетларына кабул итү-сайлап алу имтиханы (TCS) уздырылу турында хәбәр итә. Тест рәвешендәге имтиханда тулы урта белемле яшьләр яки чыгарылыш сыйныф укучылары, 24 яшьтән узмаган затлар катнаша ала.

Министрлыкның рәсми хәбәрләренә караганда, төрек телен белмәгән абитуриентлар 1 еллык әзерлек курсларына җибәрелә. Студентларга Төркия Республикасының дәүләт стипендиясе түләнә һәм тулай торакта урын бирелә. Юл чыгымнарын яшьләр үзләре күтәрә.

11 апрельдә, Смоленск янында Польша Президенты Лех Качиньский, аның хәләл җефете, әйдәп баручы сәясәтчеләр төркеме һәм илнең башка җитәкчеләренең фаҗигале рәвештә үлү уңаеннан, Кайгы уртаклашу китабы ачылды.

Якшәмбе көнне меңләгән Мәскәү халкы Мәскәүдәге Польша Илчелеге янына поляк халкының кайгысын уртаклашыр һәм чәчәкләр салыр өчен килде.

Бу көнне, Татарстан Республика Президенты йөкләмәсе буенча, ТР Дәүләт Советы Рәисе һәм республика халкы исеменнән Польша Илчелеге янында чәчәкләр салынды һәм Кайгы уртаклашу китабында язу калдырылды.

10 апрель көнне кич Бөтендөнья татар конгрессы Башкарма комитетының чит илләрдәге ватандашлар белән эшләү бүлеге җитәкчесе Рөстәм Гайнетдинов Польша татарлары халык берлеге президенты, Гданьск шәһәрендәге Польша Республикасы Татар мәдәнияте милли үзәге рәисе Ежи пан Шахуневич белән элемтәгә кергән.

Р.Гайнетдинов шул хакта хәбәр иткәнчә, сөйләшү барышында Е.Шахуневич, Польша җирендәге 5,5 мең татарның барысы да Смоленск янындагы илкүләм авиаһәлакәттә һәлак булганнар хакында тирән кайгыда, Польша мәчетләрендә 10 апрельда һәлакәт корбаннарына багышлап дога кылу чаралары узды, дип белдергән.

Татарстан сынау төбәге буларак барлык кулланучылар да коммуналь комплекс оешмаларының эшчәнлеге һәм торак-коммуналь хуҗалык хезмәтләре өчен үз түләүләре турында мәгълүмат алырга мөмкинлек бирә торган интернет-портал булдырачак.

Бу хакта бүген торак-коммуналь хезмәтләр күрсәтүдә гражданнарның законлы мәнфәгатьләрен һәм хокукларын тәэмин итү буенча Республика ведомствоара комиссиясенең беренче утырышында тариф буенча ТР Комитеты рәисе Марина Фәйрушина белдерде.

Утырыш бүген Казанда ТР Хөкүмәте йортында ТР Премьер-министры вазыйфаларын башкаручы, комиссия рәисе Равил Моратов рәислегендә узды.

10 апрель көнне Гыйльми советның чираттан тыш утырышында Казан федераль университетының яңа ректоры Илшат Гафуров коллективка тәкъдим ителде.

Утырышта Татарстан Президенты Рөстәм Миңнеханов, Россия Мәгариф һәм фән министры Андрей Фурсенко һәм башка рәсми затлар катнашты.

РФ Мәгариф һәм фән министры Андрей Фурсенко Илшат Гафуровны Казан университеты коллективына тәкъдим итте һәм яңа вазыйфада уңышлар теләде.