ЯҢАЛЫКЛАР

26 мартта Татарстан сәламәтлек саклау министры Айрат Фәррахов РФ Хөкүмәт йортында уза торган Россия сәламәтлек саклау һәм социаль үсеш министрлыгының киңәйтелгән коллегия утырышында катнаша. Утырыш министр Татьяна Голикова рәислегендә уза.

26 мартта Ислам конференциясе Оешмасы (ИКО) Генераль Секретаре Әкмәледдин Ихсан оглы Россия Ислам институтында журналистлар белән очрашты. Массакүләм мәгълүмат чаралары вәкилләрен Россия Федерациясенең Ислам конференциясе Оешмасы белән мөнәсәбәтләре, Россия Ислам институты белән хезмәттәшлек мөнәсәбәтләре кызыксындырды.

Быел ТР буенча эчке эшләр министры Әсгать Сәфәров тарафыннан игълан ителгән "Аңлашу аша - хезмәттәшлеккә" концепциясен гамәлгә ашыру кысаларында әлеге министрлыкта "Ышанычыгыз максимумы" ("Максимум вашего доверия") дип аталган акциягә старт бирелде.

Бу минутларда Сочида Физкультура һәм спортны үстерү буенча РФ Президенты каршындагы совет утырышы бара. РФ Президенты Дмитрий Медведев рәислегендә узучы утырышта ТР Президенты Рөстәм Миңнеханов та катнаша.

26 мартта Саба районының Лесхоз бистәсендә "Нарат" боз сарае базасында өстәл теннисы буенча IX турнир башлана. Ярышлар Россиянең һәм Татарстанның атказанган урманчысы, "Мактау билгесе" һәм "Октябрь революциясе" орденнары иясе Нургали Миңнеханов истәлегенә багышлап үткәрелә.

Казанда агымдагы елның 27-29 июнендә "KAZANHALAL 2010" халыкара күргәзмә-ярминкәсе уза. Ул Ислам бизнесы һәм финанслары икенче халыкара саммиты кысаларында "Яшәү рәвеше буларак - хәләл" дигән шигарь белән оештырыла. Оештыруда коммерцияле булмаган Ислам бизнесы һәм финанслары үсеше фонды, ТР Сәнәгать һәм сәүдә министрлыгы, ТР Мөселманнары диния нәзарәте карамагындагы "Хәләл" комитеты, Бөтендөнья татар конгрессы Башкарма комитеты катнаша.

25 мартта Татарстанның яңа Президенты Рөстәм Миңнехановка инаугурация тантанасында катнашкан кунаклардан бик күп котлау сүзләре яңгырады. Ислам конференциясе оешмасы генераль секретаре Әкмәледдин Ихсан оглы - шуларның берсе. Әкмәледдин Ихсан оглы беренче Президент Минтимер Шәймиевне заманча Татарстанның архитекторы дип бәяли, аның командасында уңышлы эшләгән Рөстәм Миңнеханов алга таба да сынатмас дип саный. Ул республика башлыгына җаваплы вазифада уңышлар теләп, аның җитәкчелегендә Татарстан муллыка, прогресска юлын дәвам итәр дигән өмет белдерде.

Татарстанның беренче Президенты Минтимер Шәймиев Казахстанның югары дәүләт бүләгенә ия булды. Бүген яңа Президентны инаугурацияләү тантанасында катнашкан Казахстан рәсми делегациясе җитәкчесе, мәгариф министры Җансәет Туймибаев аңа I дәрәҗә Дуслык орденын тапшырды.

27 март көнне Г.Камал исемендәге Татар дәүләт академия театрында Халыкара театр көненә багышланган тантана узачак. Кичәнең беренче өлешендә "Яңа татар пьесасы-2009" бәйгесенә нәтиҗәләр ясалачак һәм җиңүчеләрне бүләкләү тантанасы узачак. Икенче өлешендә исә Камал театры артистлары арасында уздырылган "Тантана" бәйгесендә җиңүчеләрне билгелиячәкләр. Әлеге чара театрда беренче тапкыр үткәрелә, һәм ул алга таба матур традициягә әйләнәчәк, дип ышана театрның әдәби бүлеге мөдире Нияз Игъламов. Атна дәвамында театрга килгән халык арасында сорашу уздырылган иде. Җиңүчеләр шул сорашу нәтиҗәләре буенча 7 номинациядә билгеләнәчәк.

25 мартта инаугурация тантанасында РФ Президентының Идел буе федераль округындагы вәкаләтле вәкиле Григорий Рапота ТР яңа Президентына РФ Президенты Дмитрий Медведевның котлавын ирештерде.