ЯҢАЛЫКЛАР

Бу минутларда Канныда MIPIM-2010 халыкара коммерцияле күчемсез милек күргәзмәсендә Казан стендын ачу тантанасы бара. Казан бу күргәзмәдә 2006 елдан башлап катнаша. Быел Татарстан башкаласы MIPIM күргәзмәсендә якын киләчәкнең масштаблы проектларын – 2013 елгы Бөтенроссия студентлар уеннары объектларын тәкъдим итә. Күргәзмәдә республика экспозициясенең гомуми мәйданы 72 кв.метр тәшкил итә. «Казань-2013» экспозициясе Универсиада авылының һәм Югары спорт менеджменты мәктәбенең халыкара үзәк проектларын да тәкъдим итәчәк.

16 мартта ТР Сәнәгать һәм сәүдә министрлыгында республика предприятиеләре һәм оешмалары белән General Electric компаниясе арасында хезмәттәшлекне үстерү ниятләре хакындагы килешү имзаланачак. Очрашуда General Electric ны "ДжиИ Энерджи" ҖЧҖ башкаручы директоры Руслан Пахомов белән "Газпром" ААҖ белән эшләү буенча корпоратив директор Томас Лиив тәкъдим итәчәк.

ТР Сәнәгать һәм сәүдә министрлыгыннан хәбәр итүләренчә, бүгенге очрашуның көн тәртибендә документ имзалаудан тыш, Руслан Пахомовның Татарстан предприятиеләре белән проектларны үстерүнең торышы хакындагы чыгышы, ДжиИ производствосын туплау мәсьәләләре буенча фикерләшү каралган.

General Electric компанияләр төркеменә керүче ДжиИ компаниясе белән хезмәттәшлек узган елның августында Мәскәүдә ТР сәнәгать һәм сәүдә министры Равил Зариповның "ДжиИ Рус" ҖЧҖ җитәкчелеге белән очрашуыннан соң башланган иде. Узган елның октябрендә әлеге компания вәкилләре Татарстанга килеп китте. Алар сәфәр барышында республика предприятиеләрендә очрашулар уздырып, уртак проектларны гамәлгә ашыру мөмкинлекләрен өйрәнде. Әлеге визит һәм соңрак булган ике яклы сөйләшүләр нәтиҗәсе буларак, аерым өлкәләрдә хезмәттәшлек юнәлешләре билгеләнгән беркетмә әзерләнде. Анда, аерым алганда, ДжиИ компаниясенең Татарстанда производствосын оештыру мәсьәләләре дә каралган.

Бу юнәлештә башкарылган эшләрнең нәтиҗәсе General Electric җитәкчелегенең республика җитәкчеләре белән очрашулары булырга тиеш. Моннан тыш, яклар 2010 елда ТР Хөкүмәте белән General Electric арасында стратегик килешү имзалау мөмкинлеген караячак. General Electric составына керүче "ДжиИ Энерджи Енбахер" компаниясе белән дә хәзерге вакытта хезмәттәшлек үсә. 2009 елның декабрендә ТР рәсми делегациясенең сәфәре вакытында әлеге компания җитәкчелеге белән сөйләшүләр нәтиҗәсендә ТР Хөкүмәте белән "ДжиИ Энерджи Енбахер" арасында хезмәттәшлек беркетмәсенә кул куелган иде. Ул Татарстанда заманча энергия саклаучы технологияләрне куллануга кагыла.

ТР Дәүләт Советы Рәисе, Европа Советы Җирле һәм төбәк хакимиятләре конгрессы Төбәкләр палатасының Мәдәният һәм мәгариф буенча комитеты башлыгы Фәрит Мөхәммәтшин 16-19 март көннәрендә Франциянең Страсбург шәһәрендә Җирле һәм төбәк хакимиятләре конгрессының XVIII Пленар сессиясендә катнаша.

18 мартта Фәрит Мөхәммәтшин, Төбәкләр палатасы утырышында чыгыш ясап, Татарстанның тел сәясәтенең төп аспектлары, шулай ук республика территориясендә һәм аннан читтә яшәүче халыкларның милли-мәдәни үзенчәлекләрен саклау тәҗрибәсе турында сөйләячәк.

15 мартта Татарстан Республикасы Президенты Минтимер Шәймиев "Татарстан Республикасы Президентының үз вазифасына керешүе хакында" Татарстан Республикасы Законының икенче маддәсенә үзгәрешләр кертү турында"гы Законга кул куйды.

26 - 29 март көннәрендә Казанда V Халыкара хореография училищелары һәм мәктәпләре фестивале оештырыла. М.Җәлил исемендәге Татар дәүләт опера һәм балет театры сәхнәсендә Россия һәм якын чит илләрдәге хореография училищелары һәм мәктәпләре шәкертләре чыгыш ясаячак. Фестивальдә катнашырга теләк белдерүчеләр арасында Санкт-Петербургның А.Ваганова исемендәге Рус балеты академиясе, И.Моисеев исемендәге халык биюе дәүләт академик ансамбле каршындагы мәктәп-студия, Пермь дәүләт хореография көллияте, Новосибирск дәүләт хореография көллияте, Краснодар хореографик училищесы, Красноярски хореография көллияте, Башкортстанның Р.Нуриев исемендәге хореография көллияте, Сарытау өлкә сәнгать көллияте, шулай ук Белоруссия, Россиянең Кострома, Воронеж, Бурятия, Якутия, Коми Республикасы, Казанның хореография училищесы, Яр Чаллыдагы сәнгать мәктәбе дә бар.

15 мартта Әстерхан шәһәренең филармония концерт залында 2009 елның нәтиҗәсе итеп "Ел татары" дигән яшьләр конкурсының соңгы туры узды. Бәйге инде икенче тапкыр "Бәйрәм" милли үсеш үзәге һәм "Дуслык" өлкә җәмгыятенең "Яшьләр" төркеме катнашында оештырылды.

Конкурсның максаты - яшьләр тормышында татар мәдәниятен күтәрү, спортта, икътисадта үсешкә ирешү, татар сөйләмен камилләштерү.

Бәйгедә катнашучы шәһәр студентлары, эшчеләр, шәһәрдән читтә урнашкан авыллардан килүче яшьләр 8 номинациядә көч сынашты. Яшьләрнең татар милләтеннән, яше 18дән 30га кадәр булуы, татар телен белүләре таләп ителде. Катнашучылар "Яшь татар гаиләсе", "Татар туе", "Иң яхшы эшмәкәр", "Ел студенты", "Ел спортчысы", "Татар җырын оста башкаручы" һәм "Татар биюен оста башкаручы", "Татар теле белгече" номинацияләре буенча бәяләнде.

16 мартта Яр Чаллыда ТР Дәүләт Советы карамагындагы Иҗтимагый яшьләр палатасы күчмә утырышын уздыра. Утырышта Татарстанда иреклеләр хәрәкәтен оештыру һәм студентларның хезмәт отрядларын хуплау белән бәйле ике закон инициативасы каралыр дип көтелә.

Көн тәртибенә шулай ук ТР Иҗтимагый яшьләр палатасы составына үзгәрешләр кертүгә, Татарстан Республикасы сәнәгать предприятиеләрендә эшләүче яшь белгечләргә булышлык күрсәтү Концепциясе проектына, ТР Иҗтимагый яшьләр палатасы Регламентын раслауга, РФ ФҖ Дәүләт Думасы карамагындагы Иҗтимагый яшьләр палатасы составына Татарстан Республикасыннан делегат сайлауга кагылышлы мәсьәләләр кертелә. Бу хакта ТР Дәүләт Советы матбугат хезмәте хәбәр итә.

Сингапурда муниципаль башкарма хакимият органнарының югары звеносы җитәкчеләре өчен чираттагы стажировка башлана. Татарстан районнары башлыкларының тагын бер төркеме җәмәгать инфраструктурасы һәм дәүләт район идарә системасы өлкәсендә Сингапур тәҗрибәсе белән танышачак, дип хәбәр итә бүген ТР Икътисад министрлыгының матбугат хезмәте.

Стажировка кысаларында Татарстан идарәчеләре Сингапурның дәүләт һәм административ төзелеше, илнең икътисади үсешенең гомуми тенденцияләре һәм стратегиясе, гомуми районлаштыру, аның үсеш принциплары һәм факторлары, Хөкүмәт эшчәнлеге структурасы һәм принциплары, торак сәясәте һәм инфраструктура үсеше, сәнәгать секторын үстерү турында мәгълүмат алачак.

РФ авыл хуҗалыгы министры Елена Скрынник Татарстанга сәфәр кылды. Сәфәрдә аны Татарстан Президенты Минтимер Шәймиев, ТР Премьер-министры Рөстәм Миңнеханов, ТР Премьер-министры урынбасары - авыл хуҗалыгы һәм азык-төлек министры Марат Әхмәтов озатып йөрде.

12 мартта ТР Дәүләт Советы сессиясендә депутатлар "Музейлар һәм Татарстан Республикасында музей эше турында" ТР законы проектын беренче укылышта кабул итте. Әлеге закон проекты белән парламентрийларны ТР Премьер-министры урынбасары - ТР Мәдәният министры Зилә Вәлиева таныштырды.

Билгеле булганча, Татарстан Республикасының музейлар челтәре Россиядә зурлардан исәпләнә. Идел буе федераль округында музейлар саны һәм фондларның гомуми күләме буенча алда бара. Республикада бүгенге көндә 122 музей берәмлеге исәпләнә. Алар арасында дәүләткә караганнары да, муниципалитетларныкы булганнары да бар.

"Музейлар һәм Татарстан Республикасында музей эше турында" ТР законы проектына килгәндә, ул республикада музейлар һәм музейлар эше белән бәйле мөнәсәбәтләрне хокукый яктан камилләштерү максатыннан эшләнгән. Аны эшләү вакытында Россия Федерациясе закон актлары нигезнамәләре, РФ субъектлары тәҗрибәсе исәпкә алынган.