ЯҢАЛЫКЛАР

26 февраль көнне Татарстан Республикасы Президенты Минтимер Шәймиев Казан Кремлендә Россия Герое Ильяс Дәүди белән очрашты.

27 февраль көнне 11 сәгатьтә, ТР буенча Эчке эшләр министрлыгының Мәдәният үзәгендә, Татарстан белән Һиндстан арасында мәдәни багланышларны үстерү үзәге оешуның 10 еллыгы уңаеннан, бәйрәм чаралары уздырылачак.

Аның программасы кысаларында "Шрингара" Республика халык иҗаты конкурсының йомгаклау туры үткәрелә. Казан мэриясеннән алынган мәгълүмат буенча, анда 100ләп башкаручы үзенең осталыгын күрсәтә. Шулай ук Һиндстаннан китертелгән сувенир продукция, тукылган әйберләр, тәмләткечләр һәм аювердик препаратлар күргәзмә-сатуга куела. Чәй яратучылар "Чәй турында син нәрсә беләсең?" дип аталган викторинада катнашырга чакырыла һәм аларга чәй белән татлы ризыклар татып карарга тәкъдим ителә.

Күп катлы торак йортларга капиталь ремонт ясауны күздә тоткан 185 нче федераль законны гамәлгә ашыру йөзеннән, ремонтланып бетми кала килгән йортларны рәткә китерү максатында, республикада торак милекчеләреннән кв.метрына 5 сум исәбеннән ай саен акча җыела. Ләкин капиталь ремонт ясау программасына кергән йортлардан андый җыемнар, ягъни финанслашу йортка ремонт ясаласы сумманың 5 процентыннан да ким булмаска тиеш. Приватизацияләнмәгән торакның милекчесе муниципаль берәмлек санала, димәк, быел капиталь ремонтка каралган 4 млрд. сумнан күбрәк сумманың муниципаль берәмлекләр кертергә тиешле гомуми 1,73 млрд. сумнан тыш, шушы ук тәртиптә, ягъни аена кв.метр торактан 5әр сум күләмендә алар финанслауда өлеш кертергә тиеш була.

26 февраль көнне - С.Сәйдәшев исемендәге Зур дәүләт концерт залында һәм иртәгә, 27 февральдә - "Ак Барс" яшьләр үзәгендә бөтенроссия күләмендә уза торган "Морозко-2010" балалар һәм яшүсмерләр иҗаты фестивале-конкурсында катнашырга теләүчеләрне тыңлау һәм сайлап алу туры узачак.

Проект "Россия мәдәнияте" федераль максатчан программасы кысаларында Россия Федерациясе Мәдәният министрлыгы тарафыннан гамәлгә ашырыла. Аны тормышка ашыруда Владимир Спиваковның Халыкара хәйрия фонды һәм "Интеллект-Клуб" балалар хәйрия фонды да катнаша.

Фестиваль-бәйгенең максаты - балалар һәм яшүсмерләр иҗатын үстерү, яшьләр иҗат коллективлары педагогларын фестиваль һәм конкурс чараларына җәлеп итү, балалар һәм яшьләрнең иҗади коллективлары белән эшли торган иҗат үзәкләре, студияләр, төркемнәр эшенә дәүләт ярдәмен күрсәтү, мәдәният эшлеклеләрен, дәүләт учреждениеләре һәм уку йортлары игътибарын сәләтле яшьләргә юнәлтү.

26 февраль көнне Волгоградта “Россия студентлар отрядлары” гомумроссия яшьләр иҗтимагый хәрәкәтенең IV чираттан тыш съезды һәм студентлар отрядлары штаблары җитәкчеләренең Бөтенроссия киңәшмәсе үз эшен башлап җибәрә. Чарада Татарстан Республикасын ТР Дәүләт Советы депутаты, ТР Дәүләт Советы каршындагы Яшьләр иҗтимагый палатасы рәисе Евгений Ефимов, Студентлар төзелеш отрядлары республика үзәге директоры Ринат Садыйков, шулай ук “Россия студентлар отрядлары” гомумроссия яшьләр иҗтимагый хәрәкәтенең Татарстан төбәк бүлеге башкарма комитеты җитәкчесе Василий Ислаев тәкъдим итәчәк. Съезд кысаларында Россия студентлар хезмәт отрядларының 2008-2010 елларда башкарган эшчәнлегенә нәтиҗә ясау, Студентлар отрядлары хәрәкәтенең 2013 елга кадәр исәпләнгән үсеш стратегиясен, шул исәптән 2010 елда “Россия студентлар отрядлары” хәрәкәте тарафыннан «АТЭС-2012», «Сочи-2014», «Универсиада-2013», «Росатом объектлары» һәм башка проектларны гамәлгә ашыру тәртибен кабул итү күздә тотыла.

26 февральдә ТР Министрлар Кабинетында ТР Премьер-министры Рөстәм Миңнеханов рәислегендә һәм ТР Хөкүмәте, ТР Дәүләт Советы, ТР Президенты Аппараты, федераль структураларның территориаль органнары вәкилләре катнашында үткәрелгән утырышта сүз күп катлы йортларга капиталь ремонт ясау буенча кабул ителгән 185 нче Федераль законның Татарстанда гамәлгә ашырылуы хакында барды.

25 февральдә Казан шәһәре мэры Илсур Метшин, Чехов исемендәге Мәскәү сәнгать театры (МХТ) актеры Константин Хабенский быел Казан мәктәпләренең берсендә театр студиясен ачачак, дип раслады. Әлегә анда кече һәм өлкән класс укучыларыннан торган 2 секция оештырыла.

Узган ел ахырында актер Казан мэры белән мәктәп балалары өчен иҗат студияләре ачу проекты буенча фикер алышкан иде. К.Хабенский игълан иткәнчә, мәсьәләне хәл итүдә алар бердәм карарга килгәннәр.

25 февральдә Казанда Мексика һәм Мексика мәдәнияте көннәре башланды. Казан дәүләт университетында узган тантаналы ачылышта Мексика Кушма Штатларының Россиядәге Гадәттән тыш һәм Тулы вәкаләтле вәкиле Альфредо Перес Браво, Казан дәүләт университеты ректоры Мәгъзүм Сәлахов, ТР мәдәният министрының беренче урынбасары Айдар Гайнетдинов һәм башка рәсми затлар катнашты.

Казан дәүләт университеты базасында Мексика һәм Мексика мәдәнияте көннәре 2005 елдан бирле үткәрелеп килә. Әмма быелгы ел үзенчәлекле һәм әлеге чара Мексика бәйсезлегенең - 200, Мексика революциясенең - 100, Мексика һәм Россия арасында димпломатик мөнәсәбәтләр урнашуның 120 еллыгын бәйрәм итү кысаларында үткәрелә.

Бер атна элек Ауропа Лигасының 1/16 финалының беренче очрашуында "Рубин" үз кырында "Хапоэль"не 3 кә 1 исәбенә тар-мар итеп,үзенең 1/8 финалга чыгу шансларын арттырган иде. Бүген исә көндәшләр мәйданында җавап очрашуы. Тель-Авивның "Блюмфилд" стадионындагы уен Мәскәү вакыты белән 23 сәгать 5 минутта башлана.

Премьер-министрның беренче урынбасары Равил Моратов җитәкчелегендәге Татарстан делегациясенең бүген Кыргызыстанга 2 көнлек сәфәре башланды. Делегация составында министрлыклар-ведомстволар, җиңел сәнәгать предприятиеләре вәкилләре бар. Татарстанлыларның сәфәр программасында Кыргызыстан Премьер-министры урынбасары Тажикан Калимбәтова, Бишкәк шәһәре мэры Нариман Тулеев, Икътисади җайга салу, Транспорт һәм коммуникацияләр министрлыклары, Дәүләт таможня хезмәте, Үсеш, инвестицияләр һәм инновацияләр буенча үзәк агентлык җитәкчелеге белән очрашулары каралган. Иртәгә татарстанлылар "Мода индустриясе, эшләнмәләр, җиһазлар-2010" халыкара күргәзмә-ярминкәсе ачылышында катнашачак, "Дордой" күпләп-ваклап сату базары җитәкчелеге белән очрашачак.