ЯҢАЛЫКЛАР

28 гыйнвар көнне Казанда педагогик кадрлар әзерләүнең сыйфатын арттыру буенча ТР мәгариф идарәсе муниципаль органнары һәм югары уку йортлары эшчәнлеген интеграцияләү мәсьәләләре хакында фикер алыштылар.

Татар дәүләт гуманитар-педагогика университетында узган республика семинарына республиканың 26 районыннан муниципаль белем бирү бүлекләре җитәкчеләре җыелды. ТДГПУның ике бинасында параллель рәвештә "Кластер алымы кысаларында педагогик юнәлештәге профиль алды һәм профиль сыйныфларында эшне оештыруның челтәр моделе" семинар-киңәшмәсе һәм ректорның мәгариф идарәсе муниципаль органнары җитәкчеләре белән очрашуы узды.

ТДГПУ ректоры, филология фәннәре докторы, профессор Рәдиф Җамалетдинов муниципалитет вәкилләрен педагогик кадрлар әзерләүнең сыйфатын камилләштерү буенча үз теләкләрен белдерергә чакырды. Аерым алганда, ректор фикеренчә, басым мәктәпләрдә профориентация эшен камилләштерү буенча мәгариф идарәсе муниципаль органнары һәм вузлар арасында үзара бәйләнешне көчәйтү һәм югары уку йортын тәмамлаганнан соң мәктәпкә эшкә барачак абитуриентлар әзерләүгә ясалырга мөмкин. Рәдиф Җамалетдинов хәбәр иткәнчә, ике якка да файдалы хезмәттәшлек турында тиешле килешүләр Саба һәм Балык Бистәсе районнары белән төзелгән инде, тиздән Кукмара районы белән килешү имзаланачак. ТДГПУ ректоры ТР мәгариф идарәсе муниципаль органнары җитәкчеләренә шундый килешүләр төзү мөмкинлеге хакында уйларга тәкъдим итте.

Казан дәүләт медицина академиясе ректорының фәнни эш буенча урынбасары Асия Сафина академиянең чираттагы Гыйльми Совет утырышында, белем бирү йорты оешуына 90 ел тулуга багышлап, яшь галимнәргә иң яхшы эшләре өчен бирелә торган Р.Лурий исемендәге еллык премия булдырырга тәкъдим итте.

28 гыйнвар көнне Казан Кремлендә Татарстан Республикасы Президенты Минтимер Шәймиевнең Фәләстин милли администрациясе Башлыгы Мәхмүд Аббас белән очрашуы булып узды.

28 гыйнварда "Ак Барс Металл" ҖЧҖ белән Франциянең "Vernet Behringer" компаниясе арасында бораулау комплексы белән тәэмин итү турындагы килешү имзаланачак. Бу хакта ТР Сәнәгать һәм сәүдә министрлыгының матбугат хезмәте хәбәр итә.

1882 елдан бирле металл конструкцияләре җитештерүчеләр өчен җиһазлар чыгаручы "Vernet Behringer" компаниясе бу өлкәдә танылган эксперт буларак билгеле. Компанияне 2004 елдан бирле Паскаль Дени җитәкли.

28 гыйнварда Палестина милли администрациясе Башлыгы Россия ислам институтында булып китте. Аны Татарстан Республикасы Премьер-министрының беренче урынбасары Борис Павлов озатып йөрде.

Институтка кергәндә ПМА Башлыгын Татарстан Республикасы мөселманнары Диния нәзарәте рәисе Госман хәзрәт Исхаков, Татарстан Республикасы Министрлар Кабинеты каршындагы Дин эшләре буенча идарә башлыгы Ренат Вәлиуллин, РИИ ректоры Рафикъ Мөхәммәтшин каршы алды.

Россия ислам институты белән танышкач, Мәхмүд Аббас РИИ укытучылары һәм студентлары каршында чыгыш ясады. Аннан соң ул Палестинадан килеп Казан вузларында белем алучы студентлар белән очрашты һәм сөйләште.

Премьер-министр Рөстәм Миңнеханов җитәкчелегендәге Татарстан делегациясе бу көннәрдә Давоста 40 нчы Бөтендөнья юбилей форумында катнаша. 28 гыйнвар көнне Хөкүмәт башлыгы эшлекле очрашулар уздырачак, дип хәбәр итә ТР Министрлар Кабинетының матбугат хезмәте.

Иртән "Киләчәккә караш: кризисның дөнья һәм Россия өчен сабаклары" дигән темага фикер алуда катнашканнан соң, Татарстан Хөкүмәте башлыгының Кытайның Экспорт-Импорт банкы рәисе Ли Руогу белән очрашуы планлаштырылган. Көннең беренче яртысында шулай ук "Даймлер АГ" концерны Директорлар советы әгъзасы Андреас Реншлер белән очрашулар да ниятләнә. Соңыннан Рөстәм Миңнеханов һәм Татарстан делегациясенең башка әгъзалары Давос форумының пленар утырышларында катнашачак. Алар алга киткән илләрнең үсеше һәм глобаль идарә мәсьәләләренә багышлана.

28 гыйнвар көнне Мәскәүдә РФ Икътисади үсеш министрлыгының эшче төркеме утырышы узачак. Анда Кытай һәм Сингапурның потенциаль инвесторларына тәкъдим ителәчәк төбәк проектлары сайлап алыныр дип көтелә.

Россия Президенты «Россия Федерациясе субъектлары дәүләт хакимияте закон чыгару (вәкаләтле) һәм башкарма органнарын оештыруның гомуми принциплары турында» 1999 елның 6 октябрендәге ФЗ-184 номерлы Федераль законның 18 статьясы һәм «Сәяси партияләр турында» 2001 елның 11 июлендәге ФЗ-95 номерлы Федераль законның 261 статьясы нигезендә Рөстәм Миңнеханов кандидатурасын, аңа республика Президенты вәкаләтләрен бирү өчен, Татарстан Дәүләт Советы каравына тәкъдим итте.

27 гыйнварда Казанга Палестина милли администрациясе Башлыгы Мәхмүд Аббас килде. Халыкара "Казан" аэропортында Палестина җитәкчесен Татарстан Президенты Минтимер Шәймиев, Татарстан Республикасы Премьер-министрының беренче урынбасары Борис Павлов һәм башка рәсми затлар каршы алды.

27 гыйнварда петербурглылар һәм шәһәр кунаклары Ленинград камалышы өзелүнең 66 еллыгын билгеләде. Санкт-Петербург өчен 27 гыйнвар олы дата. Алтмыш алты ел элек Ленинград фашист камалышыннан азат ителә. Иртүк шәһәр өстеннән биеккә күккә аэростат күтәрелде. Аны урнашкан гадәт буена Петропавловск ныгытмасы пляжыннан очырдылар. Резиналы тукыма һәм 700 литрга якын гель тутырылган аэростат прожекторлар яктысында иртәнге караңгы күк йөзендә дә яхшы күренде. Бу аэростат - Бөек Ватан сугышы вакытында шәһәрне дошман самолетларыннан саклаганга охшаган. Дөрес, аерма бар, хәрбиләр аны шартлагыч водород белән тутырган булган.