ЯҢАЛЫКЛАР

Татарстан Республикасы парламент делегациясенең АКШка тәүге визиты төгәлләнде.

Рәсми визит кысаларында Фәрит Мөхәммәтшин АКШ Конгрессы һәм Сенатында, Ак йортта, Милли куркынычсызлык советында берничә очрашу үткәрде, Нью-Йорк штаты парламенты белән үзара аңлашу турындагы Меморандумга кул куйды, Нью-Йорк штаты дәүләт университеты ("State University of New York" (СУНИ) белән берләштерелгән югары уку йортлары җитәкчеләре һәм укытучылар белән очрашты.

Татарстан парламенты башлыгы шулай ук Олбани университеты ректоры белән очрашты, Нью-Йорк штаты дәүләт университеты көллиятендә булды. Көллияттә Татарстанның "Идея" инновация-җитештерү технопаркы тәкъдим ителде.

Татарстан галимнәре Россия агрономия форумында катнаша. Киңәшмәдә 2009 елда үсемлекчелек тармагында башкарылган эшкә нәтиҗә ясалачак. Татарстаннан форумда ТР буенча "Россия авыл хуҗалыгы үзәге" федераль дәүләт учреждениесендә эшләнгән "Агросемэксперт" программасы авторлары катнашачак. Бу хакта әлеге филиалның җитәкчесе Таһир Һадиев хәбәр итте.

4-5 февраль көннәрендә РФ Авыл хуҗалыгы министрлыгында Россия Федерациясе субъектларының агросәнәгать комплексы органнары җитәкчеләре урынбасарлары, Россия авыл хуҗалыгы академиясенең структур бүлекчәләре җитәкчеләре, РФ Авыл хуҗалыгы министрлыгы карамагындагы учреждение башлыклары, тармак ассоциацияләре һәм берлекләре вәкилләре катнашында агрономия киңәшмәсе узачак.

Киңәшмәдә 2009 елда үсемлекчелек тармагында башкарылган эшкә нәтиҗә ясалачак, авыл хуҗалыгын үстерү буенча Дәүләт программасындагы килешүләрне үтәүгә кагылышлы мәсьәләләр каралачак. Киңәшмәдә катнашучыларга тауар җитештерүчеләрне язгы авыл хуҗалыгы эшләрен үткәрү өчен кредит, матди-техник һәм башка ресурслар белән тәэмин итү турында мәгълүмат бирәчәкләр.

30 гыйнварда Казанда Татарстанның Мәдәният министрлыгының 2009 елдагы эшчәнлегенә йомгак ясау һәм 2010 елга планнар коруга багышланган Коллегия утырышы узды. Анда ТР Премьер-министры Рөстәм Миңнеханов, республикабызның мәдәният министры Зилә Вәлиева, министрлык, аның карамагындагы ведомстволар, учреждениеләр вәкилләре, муниципаль районнар мәдәният бүлекләре башлыклары, иҗади берләшмәләр җитәкчеләре катнашты.

Зилә Вәлиева сүзләренә караганда, 2009 елда министрлык мәдәният өлкәсендәге сәясәтне камилләштерү, өлкә белән идарә итүнең яңа формаларын, механизмнарын кулланылышка кертү, Татарстан мәдәниятен гомумроссия һәм дөнья мәдәни киңлегендә таныту, бүгенге заман мәгълүмат технологияләрен файдаланып, китапханәләр системасын яңарту юнәлешләрендә эш алып барган.

Бүгенге көндә Татарстанда 2010 елда социаль ипотека программасын финанслау өчен предприятиеләр белән 3,2 миллиард сумлык килешү төзелгән. Бүген ТР Министрлар Кабинетында узган киңәшмәдә ТР җир һәм мөлкәти мөнәсәбәтләр министры Азат Хамаев әнә шундый мәгълүматлар китерде.

А.Хамаев китергән мәгълүматлар буенча, 24 районда барлык предприятиеләр дә ТР Дәүләт торак фондына ирекле кертемнәр турында килешү төзегән. Кайбер районнарда килешүләрнең күләме план биременең 70 процентына да җитмәгән. Казан буенча килешүләр план биременең 89 проценты күләмендә төзелгән, әмма кайбер районнарда бу күрсәткеч 50 проценттан кимрәк.

Татарстандагы 83 зур предприятиенең 62 се килешү төзегән инде. 31 кече нефть компаниясенең 30 ы килешүгә кул куйган. Тулаем алганда, Азат Хамаев хәбәр иткәнчә, план биременең 79 проценты күләмендә 3,2 миллиард сумлык килешү төзелгән.

"Соллерс-Чаллы" ААҖ иске автомобильләрне утильләштерү буенча тәҗрибә проектында катнашырга әзер. ТР Сәнәгать һәм сәүдә министрлыгы вәкилләренең предприятиегә сәфәре вакытында шул хакта сөйләшү булган.

Предприятие вәкиләре белдерүенчә, иске автомобильләрен тапшырырга теләк белдереп һәм бу процедура турында җентекле мәгълүмат алырга теләп шалтыратучылар күп булган. Гражданнар иске автомобильләрен ЮХИДИ теркәвеннән төшерүне, аны утильләштерүгә тапшыруны үзләре башкарырга әзер булуын белдерә. Бу хакта кулларына таныклык алгач, алар үзләренә охшаган яңа автомобиль маркасын сайлый алачак.

Билгеле булганча, РФ Сәнәгать һәм сәүдә министрлыгының норматив документларында әлегә эксперементның барлык яклары да тасвирланмаган, шуңа күрә андагы кайбер нигезләмәләргә ачыклык кертелергә тиеш.

"Алабуга" махсус икътисади зонасының перспективалары резидент-компанияләр үсешенә бәйләнгән. Хәзерге вакытта биредә 9 резидент теркәлгән. Алар - "Соллерс -Алабуга" ҖЧҖ, "Северстальавто-ИСУЗУ", "Полиматиз" ЯАҖ, "Роквул-Волга", "П-Д Татнефть-Алабуга Стекловолокно", "Эр Ликид Алабуга" ҖЧҖ, "Акульчев-Алабуга", "Септал" ҖЧҖ, "Инженерлык җиһазлары заводы" ЯАҖ. Шуларның беренче өчесе актив җитештерү-хуҗалык эшчәнлеген алып бара. Махсус икътисади зона ачылган көннән бүгенгәчә аның территориясендә 15 мдрд. сумнан артык продукция җитештерелгән, шуның 7,6 млрд. сумга якыны 2009 елга туры килә. Биредә 1,7 меңгә якын эш урыны булдырылган, барлык дәрәҗәдәге бюджетларга барлыгы 700 млн. сумнан артык түләүләр күчерелгән.

Быел әлеге җитештерү мәйданы территориясендә "П-Д Татнефть-Алабуга Стекловолокно" ҖЧҖ производствосын эшләтеп җибәрү ниятләнә. Ул "Татнефть" ААҖ белән Алманиянең пыяла җепселләр җитештерүче Preiss-Daimler компаниясенең уртак предприятиесе. Быел "Алабуга" мәйданында "Эр Ликид Алабуга" ҖЧҖ производствосын ачу да ниятләнә (Техник һәм медицина газларын җитештерүдә дөнья лидеры Air Liquide компаниясенең бүлендек предприятиесе).

1 февральдә С.Сәйдәшев исемендәге Зур дәүләт концерт залында Франциянең гитарада уйнаучы виртуозлары циклыннан концерт узачак. Казанлылар алдында музыка дөньясында танылган гитарачы Эрик Франкриз чыгыш ясаячак.

Эрик Франкриз җир шарының 50 илендә, шул исәптән Америка, Австралия, Аурупа, Азия дәүләтләрендә музыка сөючеләргә яхшы таныш. Ул - Франциянең Лион шәһәре музыка Академиясе профессоры, RADIO-FRANCE, CARPENTRAS, SASSARI һәм башка халыкара конкурслар лауреаты. Музыкант Клод Боллинг, Жан-Пьер Рампал, Гай Таврон, Альберт Хамман, Дел Рей, Жозе Мария Галлардо кебек йолдызлар белән бергә чыгыш ясый.

Рөстәм Миңнехановка Татарстан Президенты вәкаләтләрен тапшыру турындагы мәсьәлә ТР Дәүләт Советының 4 февральгә билгеләнгән утырышында каралачак.

29 - 30 гыйнвар көннәрендә Пенза шәһәрендә Россия Федерациясе субъектларының табигый һәм техноген характердагы гадәттән тыш хәлләрне кисәтү һәм бетерүдә бердәм дәүләт системасының Идел буе федераль округындагы территориаль подсистемасы эшчәнлегенә нәтиҗә ясау буенча региональ сбор уздырыла. Анда, шулай ук, узган елны гражданнар оборонасы эшләре буенча чараларның үтәлеше һәм 2010 елга бурычлар да аерым каралачак. ТР буенча Гражданнар оборонасы эшләре һәм гадәттән тыш хәлләр министрлыгыннан алынган хәбәрдә әйтелгәнчә, әлеге сборда министр Рәфис Хәбибуллин да катнаша.

28 гыйнвар көнне Казанда педагогик кадрлар әзерләүнең сыйфатын арттыру буенча ТР мәгариф идарәсе муниципаль органнары һәм югары уку йортлары эшчәнлеген интеграцияләү мәсьәләләре хакында фикер алыштылар.

Татар дәүләт гуманитар-педагогика университетында узган республика семинарына республиканың 26 районыннан муниципаль белем бирү бүлекләре җитәкчеләре җыелды. ТДГПУның ике бинасында параллель рәвештә "Кластер алымы кысаларында педагогик юнәлештәге профиль алды һәм профиль сыйныфларында эшне оештыруның челтәр моделе" семинар-киңәшмәсе һәм ректорның мәгариф идарәсе муниципаль органнары җитәкчеләре белән очрашуы узды.

ТДГПУ ректоры, филология фәннәре докторы, профессор Рәдиф Җамалетдинов муниципалитет вәкилләрен педагогик кадрлар әзерләүнең сыйфатын камилләштерү буенча үз теләкләрен белдерергә чакырды. Аерым алганда, ректор фикеренчә, басым мәктәпләрдә профориентация эшен камилләштерү буенча мәгариф идарәсе муниципаль органнары һәм вузлар арасында үзара бәйләнешне көчәйтү һәм югары уку йортын тәмамлаганнан соң мәктәпкә эшкә барачак абитуриентлар әзерләүгә ясалырга мөмкин. Рәдиф Җамалетдинов хәбәр иткәнчә, ике якка да файдалы хезмәттәшлек турында тиешле килешүләр Саба һәм Балык Бистәсе районнары белән төзелгән инде, тиздән Кукмара районы белән килешү имзаланачак. ТДГПУ ректоры ТР мәгариф идарәсе муниципаль органнары җитәкчеләренә шундый килешүләр төзү мөмкинлеге хакында уйларга тәкъдим итте.