ЯҢАЛЫКЛАР

23 декабрьдә Казанда Татар дәүләт гуманитар-педагогика университетында "2009 ел мөслимә туташы" бәйгесенең финалы уза. 18-25 яшьлек мөслимә туташлар арасында конкурс ТР Мөслимәләр берлеге Татар дәүләт гуманитар-педагогика университеты һәм Ислам фәнен, мәдәниятын һәм мәгарифен үстерү фонды белән берлектә оештырыла.

Оештыру комитетыннан алынган хәбәрләргә караганда, бәйгенең республиканың хатын-кызлар хәрәкәтен үстерү, әхлакый кыйммәтләрне пропагандалау, сафлык-пакълык, мөслимәнең максатчанлыгы турында җәмәгатьчелек фикерен формалаштыру, татар халкының элек-электән килгән гореф-гадәтләрен торгызу, гаилә мөнәсәбәтләренә өйрәтүдә булышлык итү һ.б. максатларны күз алдында тота.

22 декабрьдә Татарстан Республикасы Дәүләт Советында Парламент дәресе - 2009га багышланган иҗади эшләрнең республика бәйгеләренә нәтиҗә ясалачак.

Татарстан парламенты матбугат хезмәте хәбәр иткәнчә, конкурсларда катнашу өчен, бөтен республикадан 250дән артык укучы үз эшләрен җибәргән. Аларның иң яхшылары Казанга чакырылды. Аларны бүген ТР Дәүләт Советы Рәисе Фәрит Мөхәммәтшин шәхсән котлаячак. Иң яхшы рәсем ясаган, иң яхшы сочинение, иң яхшы эссе язган һәм иң яхшы закон проектын эшләгән 36 укучыга истәлекле дипломнар һәм бүләкләр тапшырылачак. Дәүләт Советы фойесында бәйге җиңүчеләренең эшләре белән танышырга мөмкин булачак.

Быел Казан шәһәрендә Яңа ел бәйрәмнәре алдыннан 87 чыршы һәм чыршы комплексларын урнаштыру көтелә. Узган елдагы кебек, башкала үзәгендә - 1000 еллык мәйданында һәм "Казан" милли мәдәният үзәге янындагы мәйданда ике чыршы куелачак. 1000 еллык мәйданындагы чыршы - 40,5 метр, ә "Казан" милли мәдәният үзәге янындагысы 30,5 метрлы булачак. Бу хакта бүген Казан шәһәре мэриясендә узган "эшлекле дүшәмбе" киңәшмәсендә Мәдәният идарәсе башлыгы Динара Камалиева хәбәр итте.

Казанда 2013 елда узачак Универсиада авылы мэры билгеләнде. Бу вазыйфаны элек Казан шәһәре башкарма комитетының Икътисади үсеш комитеты рәисе урынбасары булып эшләгән Фәрит Абдулганиев биләячәк.

Казан мэры Илсур Метшин "эшлекле дүшәмбе" киңәшмәсе вакытында Фәрит Абдулганиевны коллегаларына тәкъдим итте. Мэр ышандырганча, Ф.Абдулганиев яхшы әзерлек мәктәбен үткән, Казанда 2011 һәм 2013 елларда студентларның спорт уеннарын кабул итү хокукын яулау өчен барган заявка кампанияләрендә актив катнашкан.

21 декабрь көнне “Ак Барс” көреш сараеның төп майданында Россия Федерациясе Хөкүмәте Рәисенең беренче урынбасары Игорь Шувалов һәм Татарстан Президенты Минтимер Шәймиев катнашында ТРда спорт һәм сәләмәт яшәү елын ябу һәм Универсиада-2013-нең алты объектын ачу тантанасы булды.

20 декабрьдә Энергетик көне билгеләп үтелә. Шул уңайдан ТР сәнәгать һәм сәүдә министры Равил Зарипов тармак хезмәтчәннәре һәм ветераннарына бәйрәм котлавы юллады.

Киләсе атнадан башлап Казанда чыршы базарлары эшли башлый. Шәһәрлеләрнең үзләренә ошаган чыршыны сайлап алу мөмкинлеге булачак, дип хәбәр итә мэриянең матбугат хезмәте.

Сатып алучыларга чыршы, нарат, ак чыршы агачлары тәкъдим ителәчәк. 25 декабрьдә Яңа елның төп бизәге белән сәүдә итү бигрәк тә гөрләп барачак.

Татарстан Президенты Минтимер Шәймиев "Пирамида" мәдәни-күңел ачу үзәгендә Россиянең һәм Татарстанның халык артисты, Г.Тукай исемендәге Татарстан Дәүләт премиясе лауреаты Зилә Сөнгатуллинага Дуслык орденын тапшырды.

Татарстан Премьер-министры Рөстәм Миңнеханов Дәүләт теркәве, кадастр һәм картография федераль хезмәтенең яңа оештырылган Татарстан Республикасы буенча идарәсенең эшен уңай бәяләде. Бу хакта бүген ТР Хөкүмәте җитәкчесе берләштерелгән ведомствоның йомгаклау коллегиясендә белдерде.

Росреестрның Татарстан Республикасы буенча идарәсе бу елның 20 ноябрендә Күчемсез милек объектлары кадастры федераль агентлыгының Татарстан Республикасы буенча Идарәсе белән Теркәү федераль хезмәтенең Татарстан Республикасы идарәсен берләштерү юлы белән оештырылды.

Яңа идарәнең функцияләре күптөрле: күчемсез милеккә хокукларны дәүләт теркәве һәм килешү төзү, күчемсез милекнең дәүләт кадастрына кертү, кадастр эшчәнлеге, җирләрне дәүләт кадастры бәяләве, җирләрнең дәүләт мониторингы, шулай ук җир дәүләт контроле өлкәсендә дәүләт хезмәтләре күрсәтү һ.б.

19 декабрьдә Казанның 7 нче гимназиясендә беренче ачык "Лидерлык дәресе" узды. "Лидерлык нигезләре" мәгариф программасында катнашучы укучыларга кунакка Россия мәгариф һәм фән министрының урынбасары Исаак Калина, "Лидерлык дәресе" ТРдагы идеологы, Татарстан мәгариф һәм фән министры Альберт Гыйльметдинов һәм республика сәламәтлек саклау министры Айрат Фәррахов килде.