ЯҢАЛЫКЛАР

Бу атнаның пәнҗешәмбесендә, 22 октябрь көнне, Казанга ил күләмендә зур кунаклар киләчәк. Аерым алганда, ТР башкаласында уздырылачак РФ Президенты карамагындагы физик культура һәм спортны, югары казанышлар спортын үстерү, 2014 елда Сочида кышкы XXII Олимпия уеннарына һәм XI кышны Паралимпия уеннарына, 2013 елда Казанда булачак XXVII җәйге Универсиадага әзерлек һәм аларны үткәрү буенча Совет утырышында РФ Президенты, 10 министр, 20ләп губернатор һ.б. катнашачак.

"Алтын көз - 2009" Бөтенроссия агросәнәгать күргәзмәсе нәтиҗәләре буенча ТР агросәнәгать комплексы җитештерүчеләре 27 алтын, 8 көмеш һәм 12 бронза медальгә лаек булды. Күргәзмәдә Россиянең 50 төбәге һәм дөньяның 29 иленнән вәкилләр катнашты, дип хәбәр итә ТР Авыл хуҗалыгы һәм азык-төлек министрлыгының матбугат хезмәте.

19 октябрьдә Казан дәүләт медицина академиясендә ректор Камил Зыятдинов АКШның Йельск университеты профессоры Мәҗит Садигх белән очрашты. Мәҗит Садигх - медицина җәмәгатьчелегендә танылган шәхес. Аның йогышлы авырулар һәм ВИЧ инфекциягә багышланган фәнни хезмәтләре бөтен дөньяда өйрәнелә. Аның шулай ук җир шарының төрле илләре халкына гуманитар ярдәм күрсәткәне дә мәгълүм. Мәҗит әфәнде Казан дәүләт медицина университеты белән дә хезмәттәшлек итә.

Узган шимбәдәге авыл хуҗалыгы ярминкәләрендә 42 миллион сумлык продукция сатылган, дип хәбәр итә ТР Авыл хуҗалыгы һәм азык-төлек министрлыгының матбугат хезмәте.

24 октябрьдә Казанда "Россия - спорт державасы" форумы кысаларында физкультура һәм спорт өлкәсендә профессиональ белем торышы һәм перспективаларына багышланган "түгәрәк өстәл" була.

Бу көннәрдә Татарстан журналистлары төркеме Төркиянең Анталия каласында гамәли семинарда радиопрограммалар әзерләү серләрен өйрәнә. Алар анда "Төркия радио һәм телевидениесе" дәүләт компаниясе чакыруы буенча китте.

17 октябрь көнне Татарстан башкаласында санитар чистарту һәм төзекләндерү декадасы кысаларында гомумшәһәр өмәсе узды. Өмәдә 60 мең тирәсе казанлылар катнашты.

22-25 октябрь көннәрендә Казанда узачак "Россия - спорт державасы" I Бөтенроссия спорт форумында катнашу өчен 1119 кеше теркәлгән. Бу хакта "Россия - спорт державасы" форумына әзерлек һәм аны үткәрү буенча оештыру комитеты эшче төркеменең чираттагы киңәшмәсендә мәгълүм булды, дип хәбәр иттеләр форумның матбугат хезмәтеннән.

ТР сәнәгать һәм сәүдә министры Равил Зарипов бүген "Турк Капитал" Холдинг"компаниясе вәкилләре белән очрашты. Төзелеш, машина төзелеше, газ инфраструктурасы өлкәләрендәге инвестиция проектлары, Татарстан территориясендә "сукук" ислам облигацияләре чыгару мөмкинлеге фикер алышуда төп темалар булды.

6-15 ноябрьдә Казанның "Московский" мәдәният һәм спорт үзәгендә Республика халык театрлары декадасы узачак. Чараны оештыручылар - Татарстанның Мәдәният министрлыгы һәм Республика халык иҗаты һәм мәдәни-агарту эшләре фәнни-методик үзәге.