ЯҢАЛЫКЛАР

"Алтын минбәр" мөселман кинофестивалендә Россиянең "Бер сугыш" фильмы җиңде. Режиссеры Вера Глаголева (ул тамашачыга күбрәк актриса буларак таныш) булган әлеге фильм тормыштагы вакыйгаларга нигезләнеп төшерелгән. Ул Икенче бөтендөнья сугышының моңарчы безгә билгеле булмаган битләрен ача. Вакыйгалар 1945 елның маенда төньяктагы бер утрауда җәза срогын үтүче, кайчандыр фашистлар басып алган территорияләрдә яшәгән хатын-кызлар һәм балалар турында бара.

3 октябрьдә Казанның "Корстон" кунакханә-күңел ачу комплексында "Алтын мөнбәр" халыкара мөселман киносы фестивале кысаларында уза торган "Islamic-clothes" мөселман киемнәре дизайнерларының халыкара бәйгесенең иң яхшы коллекцияләре күрсәтелде.

3 октябрьдә Сәйдәшев исемендәге Зур дәүләт концерт залында тарихчы, географ, этнолог, тюрколог һәм философ Лев Николаевич Гумилевны, тууына 97 ел тулу уңаеннан, искә алу кичәсе үткәрелде.

2 октябрьдә "Татмедиа" агентлыгында Татарстан һәм Израиль массакүләм мәгълүмат чаралары вәкилләре катнашында "түгәрәк өстәл" утырышы үтте. Анда Казан Башкарма комитеты башлыгы урынбасары Рөстәм Нигъмәтуллин, ТР Яшьләр эшләре, спорт һәм туризм министрлыгының туризмны үстерү бүлеге җитәкчесе Евгения Новикова, Алабуга муниципаль берәмлеге башлыгы Киңәшчесе вазифасын башкаручы Тәнзилә Агишина, "Татмедиа" ААҖте генераль директоры киңәшчесе, ТР Иҗтимагый палатасы әгъзасы Владимир Шевчук катнаштылар.

"Татарстан" авиакомпаниясе" ААҖ самолетлары тиздән Анапа һәм Ставрополь шәһәрләренә рейслар ясый башларга мөмкин. Бу хакта "Татар-информ" агентлыгына авиакомпания генераль директоры вазифаларын башкаручы Валерий Шнякин хәбәр итте.

Быел Казанда "Хәтер көне" 11 октябрьдә узачак. Җыенны Бөтендөнья татар яшьләре Форумы, "Мәгариф" ассоциациясе, М.Мөлеков исемендәге Татар иҗтимагый үзәге, Татарстан Республикасы хатын-кызларының "Мөслимә" иҗтимагый оешмасы һәм "Азатлык" яшьләр оешмалары оештыра.

Туксан еллык тарихы булган Татарстан китап нәшриятының махсус кибетендә өлкәннәр көне уңаеннан бәйрәм табыны әзерләнде. Нәшриятта эшләп лаеклы ялга киткән хезмәт ветераннары чакырылган иде. Бүгенге көндә аларның саны җитмешкә якын. Бәйрәм табынын Татарстан китап нәшрияты директоры Дамир Сабирҗан улы Шакиров ачып җибәрде.

2 октябрьдә Татарстан Республикасы Президенты Минтимер Шәймиев хәләл җефете белән Төркия Республикасыннан чираттагы ялдан кайтты. Бу хакта ТР Президентының матбугат хезмәте хәбәр итә.

1 октябрьдә ТР Премьер-министры Рөстәм Миңнеханов Казанда ТР Хөкүмәте йортында Өлкәннәр көне уңаеннан Татарстан дәүләт идарәсе органнары ветераннары белән очрашты. Рөстәм Миңнеханов кунакларны бәйрәм белән тәбрик итте. "Сезнең белән ел саен үткәрелә торган очрашулар инде күркәм традициягә әверелде. Без төрле вакытта очраштык.

Кызганычка күрә, хәзер Россия Федерациясе һәм Татарстанда вәзгыять шактый киеренке, әмма ул контрольдә тотыла", - диде ТР Хөкүмәте башлыгы, ветераннарга мөрәҗәгать итеп.

Казандагы данлыклы "Радиоэлектроника" фәнни-җитештерү үзәгендә бүгеннән яңа җитәкче. 5 ел дәвамында предприятие белән идарә иткән Валерий Иванцовны Владимир Коннов алмаштырды. Бүген яңа җитәкчене коллективка ТР Премьер-министры Рөстәм Миңнеханов тәкъдим итте.