ЯҢАЛЫКЛАР

"Татарстан" авиакомпаниясе" ААҖ 1 майдан Казаннан Прагага очышлар башлый. Пассажирларга сишәмбе һәм шимбә көннәрендә Boeing 737-500 очкычы хезмәт күрсәтәчәк, дип хәбәр итә аэропортның матбугат хезмәте. "Казан" аэропорты язгы-җәйге сезонда традицион рәвештә рейслар санын арттыра һәм очышлар географиясен киңәйтә. Быелгы сезон да искәрмә булмаячак.

7 апрельдән башлап "Казан" Халыкара аэропорты" ачык акционерлык җәмгыятеннән Норильск - Казан - Махачкала маршруты буенча авиация элемтәсе җайга салыначак. Пассажирларга һәр чәршәмбедә бөтен уңайлыклары булган Ту-134 самлеты хезмәт күрсәтәчәк. Тагын шунысы бар, пассажирларга очкычлар кузгала торган аэропортның жирле вакытына ориентлашырга кирәк. Яңа юнәлешкә билетлар сатыла башлады инде.

ТР Дәүләт Советы татарстанлыларның Бөек Җиңүнең 65 еллыгына ветераннар өчен акча җыю буенча инициативасын хуплап чыкты һәм республика халкын әлеге хәйрия акциясенә кушылырга чакыра.

Татарстан парламенты депутатлары һәм Дәүләт Советы Аппараты хезмәткәрләре үзләренең бер көнлек хезмәт хакын "Җиңү" дип исемләнгән махсус хисап счетына күчерде. Бу счет "Ак Барс Созидание" хәйрия фонды тарафыннан март ае башында ачылды. Бүгенгә көнгә кадәр анда якынча 14 млн. сум акча җыелган.

6 апрельдә Татарстан Президенты Рөстәм Миңнеханов РФ Куркынычсызлык Советы һәм Идел буе федераль округы Советы киңәшмәсендә катнаша.

2010/2011 уку елында РФ Халык хуҗалыгы оешмалары өчен идарәче кадрлар әзерләү буенча Президент программасында катнашучыларны сайлап алу башлана. Яңа идарә технологияләрен үзләштерергә теләк белдерүче Татарстан белгечләрен сайлап алу агымдагы елның 20 июненә кадәр дәвам итәчәк. Тестлар ярдәмендә сынауны уңышлы узган 155 идарәчесе әлеге Президент программасы нигезендә менеджерлыкны нәтиҗәле үстерү буенча белем алачак. Быелгы сайлап алуның шартлары һәм Президент программасының Татарстанда идарәче кадрларны әзерләүдәге роле бүген ТР Министрлар Кабинетында узачак брифингта төп тема булачак. Журналистлар белән очрашуга икътисад министры вазифаларын башкаручы Марат Сафиуллин чакырылган.

5 апрельдә Казан Кремлендә Татарстан Президенты Рөстәм Миңнеханов 2009 елда РФ субъектлары арасында гражданнарны хәрби хезмәткә иң яхшы әзерләүчеләрне ачыклау максатыннан үткәрелгән бәйгегә нәтиҗә ясау буенча Үзәк конкурс комиссиясе рәисе, генерал-лейтенант Сергей Николенко белән очрашты.

"Казан ярминкәсе" ачык акционерлык җәмгыяте территориясендә 6-8 апрель көннәрендә унынчы мәртәбә "Мәгариф. Карьера" дип аталган махсус күргәзмә оештырыла. Күргәзмә ТР Мәгариф һәм фән министрлыгы, ТР Хезмәт, мәшгульлек һәм социаль яклау министрлыгы, КАзан шәһәре мэриясе белән берлектә уздырыла.

5 апрельдә Татарстан Республикасы Дәүләт Советы Рәисе Фәрит Мөхәммәтшин Павел Ипатовның Саратов өлкәсе губернаторы вазыйфаларына рәсми рәвештә керешү тантанасында катнаша.

Фәрит Мөхәммәтшин Саратов өлкәсенә бер көнлек сәфәре вакытында, Милли татар гимназиясендә булып, өлкәнең татар җәмәгатьчелеге вәкилләре белән очрашачак.

2009 елда "Татнефть" ААҖнең чиста табышы Россия бухгалтерлык исәбе стандартлары буенча 50,87 миллиард сум тәшкил итте. Бу 2008 елдагыга караганда 48 процентка, ягъни 34,3 миллиард сумга артык.

Казан шәһәренең "Җир асты транспорты корылмалары төзелеше буенча дирекция" МУП 2010 елда метро төзелешендә заказчы-застройщик булачак. Ә бюджет акчаларын алу, алар белән идарәдә җаваплылык үзәге итеп ТР Транспорт һәм юл хуҗалыгы министрлыгы билгеләнгән иде.

Шушы көннәрдә министрлыкта "Җир асты транспорты корылмалары төзелеше буенча дирекция" муниципаль предприятиесе белән алга таба хезмәттәшлек мәсьәләләре каралды. Министрлыктан алынган хәбәрләргә караганда, дирекция белән аңа метро төзелеше буенча заказчы-застройщик вазифаларын йөкләү турында дәүләт контракты төзеләчәк.

Шул рәвешле, метро төзелешенә бүленгән бюджет акчаларын файдалануны контрольдә тотуның ике баскычлы системасы булдырылачак.