ЯҢАЛЫКЛАР

27 мартта Казанның "Корстон" мәдәни-күңел ачу үзәгендә тантаналы шартларда "Ауропа көне" фестивале ачылды. Татарстан башкаласында Ауропа көненә багышланган чаралар бер атна дәвам итәчәк. Фестивальне Ауропа Берлегенең Россиядәге вәкиллеге һәм Ауропа Берлеге илләре мәдәният үзәкләре ТР Мәгариф һәм фән министрлыгы һәм Татарстан Президентының Тышкы элемтәләр департаменты белән берлектә оештыра.

Быел Казан фестивальне икенче мәртәбә кабул итә. Ауропа көне, аны оештыручыларның вәгъдә итүенчә, Татарстан башкаласында күркәм традициягә әверелеп, һәр елның март аенда уздырылачак.

Бүген хокук бозуларны кисәтү буенча Хөкүмәт комиссиясе утырышында катнашучылар Татарстанда массакүләм спорт чараларын үткәрү вакытында җәмәгать тәртибен саклауны тәэмин итү мәсьәләләре хакында фикер алышты. Әлеге мәсьәлә 2013 елда Казанда узачак Универсиадага әзерләнүгә бәйле рәвештә аеруча актуаль.

Утырыш ТР Министрлар Кабинетында ТР Премьер-министры вазифаларын башкаручы Равил Моратов рәислегендә видеоконференция режимында узды. Равил Моратов үз чыгышында билгеләп үткәнчә, федераль дәрәҗәдә эчке эшләр органнарында эшләүчеләр санын 20 процентка кыскарту турында карар кабул ителгән. Бу Татарстанга да кагылачак. "Безнең төп бурычыбыз - агымдагы елда спорт һәм мәдәни чараларны үткәрү вакытында эчке эшләр органнарында эшләүчеләр санын кыскарту шартларында җәмәгать тәртибен саклауны тәэмин итү", - дип ассызыклады ул.

26 - 27 март көннәрендә Казанда РФ Эчке эшләр министрлыгының эчке гаскәрләре оешуга 199 ел тулу уңаеннан тантаналы чаралар узды.

Истәлекле вакыйга уңаеннан гаскәри частьләрдә иң яхшы хезмәткәрләргә бүләкләр тапшырдылар, ветераннарны хөрмәтләделәр, бәйрәм концертлары оештырылды. Татарстан Республикасы территориясендә 5561 нче моторлаштырылган махсус гаскәри часть урнашкан. Аның шәхси составы Татарстан башкаласында һәм республика районнарында урамнарда һәм башка җәмәгать урыннарында җәмәгать тәртибен саклау буенча патруль-пост хезмәтен башкара.

ТР Премьер-министры урынбасары вазифаларын башкаручы - мәдәният министры вазифаларын башкаручы Зилә Вәлиева Татарстан театрлары хезмәткәрләрен һөнәри бәйрәмнәре белән котлады, дип хәбәр итә ТР Мәдәният министрлыгының матбугат хезмәте.

26 мартта Татарстан Республикасы Президенты Рөстәм Нургали улы Миңнеханов Татарстан Республикасы Министрлар Кабинетының үз вәкаләтләрен туктатуы турындагы гаризасын кабул итте һәм республика Хөкүмәтенә Татарстан Республикасы Министрлар Кабинетының яңа составы формалаштырылганчы эшләвен дәвам итүне йөкләде. Аның тарафыннан тиешле Указга кул куелды.

26 мартта Татарстан Республикасының Беренче Президенты Минтимер Шәймиев Казан Кремленең Вәкиллек корпусында Ислам Үсеш Банкы президенты доктор Әхмәт Мөхәммәт Али белән очрашты.

26 мартта Татарстан сәламәтлек саклау министры Айрат Фәррахов РФ Хөкүмәт йортында уза торган Россия сәламәтлек саклау һәм социаль үсеш министрлыгының киңәйтелгән коллегия утырышында катнаша. Утырыш министр Татьяна Голикова рәислегендә уза.

26 мартта Ислам конференциясе Оешмасы (ИКО) Генераль Секретаре Әкмәледдин Ихсан оглы Россия Ислам институтында журналистлар белән очрашты. Массакүләм мәгълүмат чаралары вәкилләрен Россия Федерациясенең Ислам конференциясе Оешмасы белән мөнәсәбәтләре, Россия Ислам институты белән хезмәттәшлек мөнәсәбәтләре кызыксындырды.

Быел ТР буенча эчке эшләр министры Әсгать Сәфәров тарафыннан игълан ителгән "Аңлашу аша - хезмәттәшлеккә" концепциясен гамәлгә ашыру кысаларында әлеге министрлыкта "Ышанычыгыз максимумы" ("Максимум вашего доверия") дип аталган акциягә старт бирелде.

Бу минутларда Сочида Физкультура һәм спортны үстерү буенча РФ Президенты каршындагы совет утырышы бара. РФ Президенты Дмитрий Медведев рәислегендә узучы утырышта ТР Президенты Рөстәм Миңнеханов та катнаша.