ЯҢАЛЫКЛАР

24 мартта "Казан" халыкара аэропортында Ислам конференциясе Оешмасы Генераль Секретаре Әкмәледдин Ихсан оглын каршы алгач оештырылган матбугат очрашуында журналистлар аңа гамәлдәге Президент Минтимер Шәймиевнең тәҗрибәсен алга таба файдалануга кагылышлы сорау бирде.

25 мартта Россиядә Мәдәният хезмәткәрләре көне билгеләп үтелә. Әлеге уңайдан ТР Премьер-министры урынбасары - мәдәният министры Зилә Вәлиева бу тармакта эшләүче татарстанлыларны һөнәри бәйрәмнәре белән котлады.

Быел 11 майда Казанның 116 нчы мәктәбе базасында шәһәрдә беренче тапкыр мәктәп балалары өчен театр студиясе эшли башлаячак. Һәрхәлдә, бүген мэр Илсур Метшин белән актер Константин Хабенский булачак иҗат студиясе эше мәсьәләләре хакында сөйләшү барышында шул хакта килешкән. Шәһәр башлыгы фикеренчә, мәктәп коллективының үзешчән сәнгать смотрларында еш кына алдагы урыннар яулавы өстенә, беренчедән, ул шәһәр уртасына урнашкан, икенчедән, мәктәп атмосферасы иҗат өчен кулай.

ТР Министрлар Кабинеты белән РФ Хөкүмәте каршындагы Халык хуҗалыгы академиясе арасында бүген партнерлык хакындагы килешү имзаланды. Министрлар Кабинетында узган очрашуда документны ТР Премьер-министры Рөстәм Миңнеханов белән академия ректоры Владимир Мау имзалады. Очрашуда шулай ук ТР икътисад министры Марат Сафиуллин, мәгариф һәм фән министры Альберт Гыйльметдинов, Казан дәүләт университеты ректоры Мәгъзүм Сәләхов катнашты.

24 мартта "Казан" милли-мәдәни үзәгендә Татарстан Премьер-министры Рөстәм Миңнеханов республиканың 4 министрлыгы җитәкчеләренә 100 яңа автомобиль ачкычын тапшырды. ТР Сәламәтлек саклау министрлыгы, ТР Мәдәният министрлыгы, ТР Хезмәт, мәшгульлек һәм социаль яклау министрлыгы, ТР Яшьләр эшләре, спорт һәм турислык министрлыгы автопаркларын яңа "Fiat Ducato" автомобильләре белән тулыландырды.

Татарстанда язгы культура орлыкларын чәчүгә әзерләү буенча чаралар башлана. Татарстанның 5 зонасында узачак семинар-киңәшмәләрдә әнә шул хакта сүз барачак.

23 мартта Татарстан Республикасы Хөкүмәте Йортында Татарстан Хөкүмәте рәисе Рөстәм Миңнеханов һәм Сингапур Республикасының Россиядәге Гадәттән тыш һәм Тулывәкаләтле Вәкиле Саймон Де Круз алдагы хезмәттәшлек перспективалары турында сөйләште.

Ли Куан Ю ис. сәяси эзләнүләр Мәктәбе һәм Сингапур Республикасы дәүләт хезмәте Колледжы белән 2009 елның сентябрендә төзелгән килешүләр турында сүз барды. ТР Премьер-министрының тышкы икътисадый эшчәнлек буенча ярдәмчесе Искәндәр Мөфлиханов хәбәр итүенчә, очрашуда Татарстан дәүләт хакимияте органнары җитәкчеләре өчен мәгълүмати-коммуникацион технологияләр өлкәсендә кыскавакытлы белем арттыру программасын оештыру мәсьәләсе турында да сөйләштеләр. Моннан кала, Сингапурның IDA International компаниясе Казанның IT-паркы белән идарә итү стратегиясен эшләүдә дә катнашачак. Шулай ук, Татарстан Республикасының мәгълүмати-коммуникацион технологияләр өлкәсен үстерү стратегиясе турында да сөйләшү булды. ТР Премьер-министры Рөстәм Миңнеханов ТР мәгълүмати технологияләр Үзәгенә дәүләт хезмәтләрен электрон рәвештә күрсәтү, мәгариф программалары, Казанда 2013 елда узачак Универсиадага әзерлек программасы кебек юнәлешләр буенча программа продуктларын эшләү буенча эшлекле төркем оештырырга кушты. ТР Премьер-министрының тышкы икътисадый эшчәнлек буенча ярдәмчесе Искәндәр Мөфлиханов, шулай ук, ТР Хөкүмәте башлыгын Сингапурның яшьләр спорт чараларын оештыру һәм үткәрүдәге тәҗрибәсе кызыксындырганын хәбәр итте. Сүз 2010 елда Сингапурда үткәрелә торган Җәйге яшьләр Олимпия уеннары турында бара.

23 мартта Татарстан Республикасы Премьер-министры Рөстәм Миңнеханов ТР Хөкүмәте йортында “КИТ Финанс Инвестиционный Банк” ҖЧҖ җитәкчесе Дмитрий Геркусов белән очрашты. Дмитрий Геркусов “КИТ Финанс”ның оешма структурасы, эшчәнлекнең төрле юнәлешләре һәм алдагы үсеш перспективалары турында сөйләде.

Чаллы спортчысы Кирилл Прохоров Мәскәүдә узган кеокусинкай-карате буенча ХХ ил чемпионатында иң зур авырлык үлчәвендә (80 килограммнан артык) Россия чемпионы булып танылды. Турнирда илнең 40 төбәгеннән 150 дән артык спортчы катнашты.

2009 елда Татарстанда инновацияле эшчәнлек йомгаклары 23 мартта ТР Икътисад министрлыгы коллегиясендә каралачак төп мәсьәләләрнең берсе булачак. Көн тәртибенә барлыгы 5 мәсьәлә чыгарыла. Аерым алганда, юридик затлар, шәхси эшмәкәрләргә дәүләт (муниципаль) контролен камилләштерү, МВА ЛИНК "Стратегия" программасы буенча белем алуга бәйге, аның йомгакларын Баулы муниципаль районының социаль-икътисади үсеше стратегиясен эшләүдә файдалану мәсьәләләре каралачак.