ЯҢАЛЫКЛАР

19 мартта Татарстан студентлары “ТР студентлар лигасы” яшьләр иҗтимагый оешмасы туган көнен билгеләп үтә. 15 мартта оешма Советының чираттан тыш утырышында сайланган яңа җитәкчегә оешманың беренче паспорты тапшырыла. ТР студентлар лигасының яңартылган составы яңа традицияләр булдыруга кереште. Шулай итеп, 19 мартта, оешманың туган көнендә студентлар утырган автобус Татарстан башкаласының зур вузлары студентларын оешманың яңа президенты Тимур Сөләйманов белән таныштыру өчен кузгала. Һәр вузда Студентлар лигасы җитәкчелеге студентлар советлары вәкилләре белән очраша, эшлекле элемтәләр урнаштыра һәм истәлекле сувенирлар белән алмаша.

18 мартта ТР Премьер-министры Рөстәм Миңнеханов Мәскәүдә VII Халыкара химия саммитында катнаша. Саммитны Мәскәү Хөкүмәте белән Россия химиклар берлеге Россия фәннәр академиясе, Россия сәнәгатьчеләре һәм эшмәкәрләре берлеге ярдәмендә оештыра. Татарстан Хөкүмәте башлыгы чараны оештыру комитеты составына керә.

Халыкара сәяси экспертиза институты Россия Федерациясендә төбәк башлыкларын билгеләү системасының 5 еллыгына багышланган тикшеренү нәтиҗәләрен игълан итте. Сораштыруда шартлы рәвештә ике төркемгә - "бәйсез" (журналистлар, сәясәт белгечләре) һәм "хакимияткә якын торучылар" (элеккеге губернаторлар, Дәүләт Думасы һәм Федерация Советы әгъзалары) - бүленгән экспертлар катнашты. Һәр төркемгә бәяләүдә ун баллы системаны кулланып сорауларга җавап бирергә тәкъдим ителде. Тикшеренүләр 2009 елның декабреннән 2010 еның мартына кадәр үткәрелде.

17 мартта Франциянең Канны шәһәрендә "Казанда 2013 елда үтәчәк Универсиада: Россия спорт башкаласының уникаль спорт мөмкинлекләре" дигән темага конференция узды, ул күпләгән катнашучылар һәм гаммәви мәгълүмат чаралары вәкилләренең игътибарын җәлеп итте.

Искәртеп узабыз, 16 мартта Канны шәһәренең Фестивальләр сараенда иң эреләрдән саналган MIPIM-2010 Халыкара инвестицияләр күргәзмәсендә 2013 елгы Универсиада экспозициясенең рәсми ачылышы булды. Анда Россия Федерациясе төбәкләр үсеше министры урынбасары Сергей Круглик катнашты. Ул Казанда спорт объектлары төзү, Бөтендөнья студентлар Уеннарын үткәрү өчен инфраструктура булдыру белән шөгыльләнүче барлык структураларның эшен югары бәяләде һәм билгеләнгән планнарны гамәлгә ашыруда уңышлар теләде.

"СОГАЗ" иминиятләштерү төркеме Татарстан Республикасының иминият хезмәтләре базарында үз эшчәнлеген киңәйтергә тели. Ул хакта бүген Татарстан Республикасы Премьер-министры Рөстәм Миңнеханов белән очрашуда иминиятләштерү төркеменең идарә рәисе Вадим Янов белдерде. Очрашу ТР Хөкүмәте Йортында узды. Рөстам Миңнеханов 2009 елның декабрендә Татарстан Хөкүмәте һәм “СОГАЗ” төркеме арасында хезмәттәшлек турында Килешү төзелгәнен искә төшерде.

2013 елда Казанда узачак җәйге Универсиаданың халыкара матбугат үзәге Мәскәү урамындагы Боз cараенда урнашачак. Мондый карарга Казанда 2013 елда узачак Бөтендөнья җәйге универсиаданы массакүләм мәгълүмат чараларында яктырту мәсьәләләре буенча эшлекле төркем әгъзалары килде. Алар Универсиаданың берничә объектын карап чыкты.

Исегезгә төшерәбез: эшлекле төркем әгъзалары Казанда ике көн булдылар (2010 елның 16-17нче марты). Алар спорт корылмаларын, югары технологияләр даирәсендәге IT-парк бинасын карады, Универсиаданың массакүләм мәгълүмат чараларында яктырту эшләренә әзерлек дәрәҗәсен бәяләде.

Бүген Татарстан Республикасы Премьер-министры Рөстәм Миңнеханов белән узган киңәшмәдә "Спортивное вещание" компаниясе генераль директоры, "Росмедиаком" генераль директоры Василий Кикнадзе "2013 ел Универсиадасына әзерлек тулы көченә бара" дип белдерде.

Татарстан идарәдә программа инструментлары, консалтинг хезмәтләре буенча дөнья лидеры -Алманиянең IDS Scheer компаниясе белән килешү төзиячәк. Аның нигезендә республика административ реформа белән бәйле чараларны гамәлгә ашырачак. ТР Икътисад министрлыгыннан хәбәр итүләренчә, хезмәттәшлекнең төп максаты-республикада физик һәм юридик затларга дәүләт (муниципаль) хезмәтләр күрсәтүнең сыйфатын күтәрү өчен яңа технологияләр кертү.

ТР Мәгариф һәм фән министрлыгы агымдагы елның 25 апрелендә Казанда Төркия Республикасы университетларына кабул итү-сайлап алу имтиханы (TCS) уздырылу турында хәбәр итә. Тест рәвешендәге имтиханда тулы урта белемле яшьләр яки чыгарылыш сыйныф укучылары, 24 яшьтән узмаган затлар катнаша ала.

"Татарстан" авиакомпаниясе" ААҖ "Домодедово" аэропортының иң пунктуаль авикомпанияләре" халыкара конкурсында призлы номинант булды. Бу хакта "Татар-информ" агентлыгы хәбәрчесенә авиакомпания генераль директорының урынбасары Миннифаяз Шәрипов белдерде.

Агымдагы елның февраленә нәтиҗә ясалды. "Татарстан" авиакомпаниясе "Домодедово" аэропортының иң пунктуаль авиакомпанияләре" халыкара конкурсында 88,62 процент даимилек күрсәткече белән 3 урынны алды.

Сингапурда стажировка узучы Татарстан муниципаль берәмлекләре башлыклары депутатлар тарафыннан гражданнарны кабул итү чараларының берсендә булды.

Парламентарийларның халык белән очрашуы республиканың Үзәк округында узды. Биредә кабул итүгә алдан язылмыйча гына эшкә урнаштыру һәм финанс яктан кыен хәлдә калган күп балалы гаиләгә акчалата ярдәм күрсәтү мәсьәләләренә кагылышлы ике мөрәҗәгать каралды. Сингапурда мондый очраклар депутат ихтыяры буенча халык ышанычлысында булган махсус акчалата фонд хисабына хәл ителергә мөмкин. Стажировкада катнашучылар мондый проблемаларның тормышта ни рәвешле оператив төстә хәл ителүе белән танышты.