ЯҢАЛЫКЛАР

25 декабрьдә ТР Дәүләт Советы Рәисе Фәрит Мөхәммәтшин парламент эшчәнлеген яктыртучы журналистларны 2009 ел йомгаклары белән таныштырды, аларны кызыксындырган сорауларга җавап бирде.

Журналистларны бигрәк тә Татарстан Президентлыгына кандидатуралар тәкъдим ителү, алар арасында ТР парламенты башлыгы Фәрит Мөхәммәтшинның да булуына кагылышлы сораулар кызыксындырды.

ТР Дәүләт Советы Рәисе бу сорауларга җавап биреп: "Россия законнары нигезендә, Татарстан Президентының 25 мартта вәкаләтләре вакыты чыга. Шуның өчен, закон буенча, субъектларда сайлауларда җиңгән партия федераль үзәккә 100 көн кала тәкъдим белән чыгарга тиеш. Ә алар, бу исемлекне раслап, РФ Президентына тәкъдим итәргә тиешләр. Мин инде берничә тапкыр Мәскәүгә барып кайттым. Без үзебезнең Сәяси совет әгъзалары белән дә киңәшләшеп алдык. Безгә ниндидер яңалык кирәкми, республика авыр чорда бүгенге Президенты, бүгенге Хөкүмәте һәм бүгенге Дәүләт Советы белән нәтиҗәле эшли дигән фикергә килдек.

25 декабрь көнне сәгать кичке 6да КДУның "УНИКС" мәдәни-спорт комплексында (алдан ул 21 декабрьдә "Пирамида" мәдәни-күңел ачу комплексында дип ниятләнгән иде) "Беренче курс студенты көне-2009" XVI Казан вузара фестиваленың йомгаклау концерты башланачак. Аның сайлап алу турлары 3, 4, 5 декабрь көннәрендә А.Гайдар исемендәге Казан яшьләр үзәгендә уздырылган иде.

Татарстан Республикасы Президенты Минтимер Шәймиев "2004-2010 елларга исәпләнгән ТР Торак-коммуналь комплексын реформалаштыру һәм яңарту программасын раслау турында" Татарстан Республикасы Законына үзгәрешләр кертү хакында"гы Законга кул куйды.

Халыкара музейлар советының (ИКОМ) Россия Комитеты президиумының беренче утырышында Татарстанның Милли музее генераль директоры Гөлчәчәк Нәҗипова ИКОМның Россия Комитеты вице-президенты итеп сайланды.

Халыкара музейлар советы - дәүләтнеке булаган профессиональ халыкара оешма. Ул ЮНЕСКОда югары консультатив дәрәҗәгә ия. Советның Россия комитеты составына илебездәге 300 музей керә.

25 декабрьдә Әфганстан Республикасына совет сугышчыларын кертүгә 30 ел тула. Бу уңайдан Республика матбугат һәм массакүләм мәгълүмат чаралары агентлыгында әлеге датага багышланган матбугат конференциясе үтте. Анда Әфганстан Республикасында сугышкан ветераннар һәм Төньяк-Кавказ төбәге территориясендә хәрби конфликтларда һәм террорга каршы операцияләрдә катнашучылар мәсьәләләре буенча Кооринацион Шура Рәистәше генерал-майор Рим Мостаев, "Сугыш инвалидлары" дигән Әфганстанда сугышкан һәм яраланган инвалидларның Гомумроссия иҗтимагый оешмасының Татарстан төбәк җәмгыяте рәисе Альберт Кукаркин,

Әфганстандагы сугыш инвалидларының Татарстан иҗтимагый оешмасы рәисе Евгений Кабыш катнаштылар.

24 декабрьдә дүртенче чакырылыш ТР Дәүләт Советының җиденче утырышында республика парламентарийлары "Китапханә һәм китапханә эше турында" Татарстан Республикасы Законына үзгәрешләр кертү хакында" ТР законы проектын беренче укылышта кабул итте. Әлеге закон проекты белән депутатларны ТР Премьер-министр урынбасары - Мәдәният министры Зилә Вәлиева таныштырды.

24 декабрьдә ТР сәнәгать һәм сәүдә министры Равил Зарипов Төркия Республикасының Казандагы генераль консулы Әхмәт Тута белән очрашты. Яклар Татарстан һәм Төркия арасындагы икътисади багланышларның торышы хакында фикер алышты, хезмәттәшлекне киңәйтүнең юнәлешләрен билгеләде.

Кунакны сәламләп, Равил Зарипов Татарстан һәм Төркия Хөкүмәтләре тарафыннан үз вакытында Казанда Төркия генераль консуллыгын ачу турында дөрес һәм перспектив карар кабул ителүен билгеләп үтте. "Бүгенге көндә Төркия ике яклы тауар әйләнешенең күләме буенча Татарстанның сәүдә партнерлары арасында беренче урынны били", - диде ул. Министр шулай ук яңа генераль консул килгәч ике якка да файдалы хезмәттәшлекнең тагын да киңәячәгенә өмет белдерде.

24 декабрьдә дүртенче чакырылыш ТР Дәүләт Советының җиденче утырышында КПРФ партиясенең Татарстан парламентындагы фракциясе рәисе Хафиз Миргалимов сессия көн тәртибенә ТРның Тарифлар буенча буенча комитеты башлыгы Марина Фәйрушинаның тарифлар сәясәтенә багышланган мәгълүматын кертүне сорады. Х.Миргалимов сүзләренчә, төрле муниципаль берәмлекләрдә тарифлар берничә төрле. Бу хакта депутатларга җиткерү кирәк, дип саный ул.

Сессия утырышында катнашкан ТР Президенты Минтимер Шәймиев бу нисбәттән үз фикерен белдерде. М.Шәймиев сүзләренчә, бөтен җирдә дә бердәм тариф булмаячак. Бу коммуналь хезмәтләрне күрсәтү чыганаклары белән бәйле. "Тарифларны артык үсә дип әйтеп булмый", - диде ул.

"Бердәм Россия" җитәкчелеге РФ Президенты Дмитрий Медведевка Татарстан һәм Сарытау өлкәсе башлыклары вазифасына кандидатларны тәкъдим итте.

Россия Президенты белән очрашуда РФ Дәүләт Думасы спикеры, партиянең Югары советы башлыгы Борис Грызлов, партия Генераль советы президиумы секретаре Вячеслав Володин һәм Андрей Воробьев катнашты.

"Бердәм Россия" партиясе җитәкчелеге Татарстан башлыгы вазифасына Татарстан Премьер-министры Рөстәм Миңнеханов, Татарстан Дәүләт Советы Рәисе Фәрит Мөхәммәтшин һәм Татарстан Президенты Минтимер Шәймиев кандидатураларын тәкъдим итте.

23 декабрьдә Мәскәүдә РФ Президенты Дмитрий Медведев рәислегендә Россия Дәүләт Советының һәм Россия Федерациясе Президенты каршындагы Мәгълүмати җәмгыятьне үстерү советының уртак утырышы узды. Утырышта Татарстан Республикасы Президенты Минтимер Шәймиев катнашты.