ЯҢАЛЫКЛАР

17 декабрь көнне Казан Кремлендә ТР Президенты Минтимер Шәймиев Россия урман хуҗалыгы агентлыгы җитәкчесе Алексей Савинов белән очрашты.

18 декабрьдә Татарстанда дүрт Сәламәтлек үзәге ачылачак. Аларның икесе - Казанда, калган икесе Яр Чаллыда эшләячәк. Республика медицина профилактикасы үзәгендә урнашачак Сәламәтлек үзәге төбәк координаторы ролен башкарачак, дип хәбәр иттеләр ТР Сәламәтлек саклау министрлыгының матбугат хезмәтеннән.

Искә төшереп үтәбез, "Сәламәтлек" илкүләм проектын тормышка ашыру кысаларында республикабызда 14 Сәламәтлек үзәген ачу планлаштырыла. Алар федераль һәм республика бюджеты исәбенә җиһазландырыла. 18 декабрьдән әлеге үзәкләр республикабызның 7 шәһәрендә - Әлмәт, Бөгелмә, Яшел Үзән, Казан, Яр Чаллы, Түбән Кама һәм Чистайда эшли башлаячак.

Дүртенче чакырылыш ТР Дәүләт Советының җиденче утырышы 24 декабрьдә дәвам итәчәк. Бүген бу хакта Татарстан парламенты башлыгы урынбасары Александр Гусев җитәкчелегендә узган Президиум утырышында хәбәр ителде. Билгеле булганча, 3 декабрьдә узган җиденче утырышта каралмыйча бер мәсьәлә калган иде.

17 декабрьдә Мәскәүдә РОСТО (ДОСААФ)ның чираттан тыш съезды уза. Съездда "Россия оборона спорт-техник оешма - РОСТО (ДОСААФ) Гомумроссия иҗтимагый оешмасын ДОСААФ Гомумроссия иҗтимагый-дәүләт оешмасына үзгәртү турында сүз барачак, дип хәбәр ителә оешманың рәсми сайтында.

Татарстан Республикасы Төркия Республикасының бизнес-структура вәкилләре өчен ике якка да файдалы проектларны гамәлгә ашыру, уртак производство ачу һәм Россия Федерациясенең башка төбәкләренә дә кертү өчен плацдпарм булырга мөмкин. Бу хакта бүген Татарстан Республикасы Хөкүмәт йортында ТР Премьер-министры Рөстәм Миңнеханов Төркия Республикасының Казандагы яңа генерал консулы Әхмәт Тута белән очрашуда белдерде.

Искә төшереп үтәбез, Әхмәт Тута генерал консул Әхмәт Эргинны алыштырды, ул ТР Президенты Минтимер Шәймиев, ТР Дәүләт Советы Рәисе Фәрит Мөхәммәтшин белән очрашты.

Бүгенге очрашуда ТР Президентының тышкы элемтәләр департаменты директоры - ТР Президенты каршындагы халыкара мәсьәләләр буенча дәүләт киңәшчесе Тимур Акулов, ТР Премьер-министрының тышкы икътисади эшчәнлек буенча ярдәмчесе Искәндәр Мөфлиханов, ТР сәнәгать һәм сәүдә министры урынбасары Артур Фатыйхов катнашты.

Татарстан Төркиянең бизнес-структуралары өчен проектларны гамәлгә ашыру, уртак производстволар булдыру һәм Россиянең башка төбәкләре белән элемтәләр урнаштыру өчен мәйдан булырга мөмкин. Бүген Төркия Республикасының Казандагы генераль консулы Әхмәт Тута белән очрашуда ТР Премьер-министры Рөстәм Миңнеханов әнә шулай дип белдерде.

Әхмәт Тута бу вазифага элеккеге генераль консул Әхмәт Эргин урынына билгеләнде. Яңа консул инде ТР Президенты Минтимер Шәймиевкә тәкъдим ителде, Дәүләт Советы рәисе Фәрит Мөхәммәтшин белән дә очрашты.

Бүген Хөкүмәт йортында узган очрашуда исә Әхмәт Тута Премьер-министрга "Туркиш Аирлинс" компаниясенең Казанга ясаучы рейсларын артыру үтенече белән чыкты. Консул шулай ук ике республика арасында товар әйләнеше күләмен арттыру зарурлыгын да белдерде.

Рөстәм Миңнеханов яңа генераль консулга ТР Электрон сәүдә-мәгълүмат системасы презентациясен оештыру тәкъдиме белән чыкты. Аның белдерүенчә, консул Татарстан территориясендәге индустриаль мәйданнар, "Химград" технопаркы, ИТ-парк һ.б. инфраструктуралар белән танышырга тиеш. Бу, аның фикеренчә, алга таба ике арадагы мөнәсәбәтләрне үстерергә, төрек бизнесы вәкилләре белән элемтәләрне ныгытырга ярдәм итәчәк.

Татарстанда Бөек Ватан сугышының 1267 ветераны торак шартларын яхшыртты. 710 кеше бу максатка социаль ипотека кысаларында иреште. Ел башыннан алып сугышта катнашучыларга субсидия бирү өчен 1 миллиард сумнан артык акча юнәлдерелде.

Бу хакта бүген ТР Дәүләт Советының икътисад, инвестиция һәм эшмәкәрлек буенча комитеты һәм "Россия гражданнарына арзан һәм уңайлы торак" өстенле илкүләм проектын гамәлгә ашыруны контрольдә тоту комиссиясенең уртак утырышында ТР хезмәт, мәшгульлек һәм социаль яклау министры урынбасары Наталья Бутаева белдерде. Аның сүзләренчә, хәзер субсидияләр алу реестрында 244 ветеран тора (алар 2005 елның 1 мартына кадәр исәпкә басучылар). Аларның 220 се торак шартларын ничек яхшыртырга кирәклеген сайлаган инде.

16 декабрьдә Бюджет, салымнар һәм финанслар комитеты чираттагы утырышын уздырды. Утырышны комитет рәисе Морат Гаделшин алып барды.

Көн тәртибенә чыгарылган төп мәсьәләләр республиканың агымдагы ел бюджетына һәм Татарстан Республикасының Мәҗбүри медицина иминияте фонды бюджетына үзгәрешләр кертүгә кагылышлы закон проектлары белән бәйле иде.

Депутатларны "Татарстан Республикасының 2009 елга һәм 2010 һәм 2011 елларның планлы чорына бюджеты турында" Татарстан Республикасы Законына үзгәрешләр кертү турында" закон проекты белән ТР Финанслар министры Радик Гайзатуллин таныштырды. Аның сүзләренә караганда, республика бюджетына 13 млрд. 369 млн. сум күләмендә үз өстәмә керемнәре кергән. Аның 10, 7 млрд. сумы турыдан-туры республика бюджетындагы дефицитны каплауга, калган өлеше федераль үзәктән алынган кредитларны түләүгә киткән. Министр аңлатып үткәнчә, хәзерге вакытта республика бюджетындагы дефицит 11,36 млрд. сум күләмендә исәпләнә.

"Казан" милли-мәдәни үзәге каршындагы мәйданда ханука шәмнәрен кабызу тантанасы булды.

Урамда бик салкын булуга карамастан, мәйданга Татарстан башкаласы яһүдләр җәмгыятенең берничә дистә вәкиле җыелган иде. Бәйрәмгә җыелган кунаклар өчен хәрби тынлы оркестр уйнады. Милли көйгә балалардан алып өлкән яшьтәгеләрчә биеде.

Бу чарада Казан мэры Илсур Метшин, Татарстанның баш раввины Ицхак Горелик, ТР Еврей милли мәдәни автономиясе президенты Михаил Скоблионок катнашты.

15 декабрьдә Татарстан Республикасы Премьер-министры Рөстәм Миңнеханов Татарстан Республикасы Хөкүмәт Йортында Россияне 2018-2022 елгы футбол буенча дөнья чемпионатын үткәрү хокукына ия булу тәкъдиме кысаларында “Россия-2018” гариза бирү комитетының экспертлар төркеме делегациясе белән очрашты.

“Россия-2018” гариза бирү комитетының экспертлар төркеме делегациясе Татарстан каласына бүген кич белән килеп җитте. Визит максаты – Россия җиңеп чыккан очракта, 2018 яки 2022 елгы футбол буенча дөнья чемпионаты уздырылачак стадион өчен урын билгеләү.