М.Ш.Шәймиев котлавы

Хөрмәтле авыл эшчәннәре, агропромышленность комплексы хезмәткәрләре!

Татарстан Республикасы Дәүләт Советы, Министрлар Кабинеты һәм шәхсән үз исемемнән сезне Авыл хуҗалыгы һәм эшкәртү промышленносте хезмәткәрләре көне белән чын күңелдән тәбрик итәм.

Авыл хезмәтчәннәренең көзге байлык чорында уза торган шушы профессиональ бәйрәме безнең барыбыз өчен дә аеруча әһәмиятле вакыйга булып тора, чөнки шушы көннәрдә без республикабызда яшәүчеләрне икмәк белән тәэмин итә торган кешеләрне хөрмәтлибез. Икенче ел рәттән республика элекке елларда күрелмәгән күләмдә бөртекле ашлык - 5,7 миллион тоннадан күбрәк ашлык җыеп алды. Һәр гектардан 35 центнердан күбрәк уңыш чыкты. Бөртекле ашлык уңышы буенча безнең республика Россиянең барлык төбәкләре арасында икенче урында, ә тулай җыем буенча дүртенче урында тора. Игенчеләрнең чын батырлыгы бу. Безнең климат шартларында мондый югары нәтиҗәләргә бары тик фидакарь хезмәт белән һәм авыл хуҗалыгы культураларын игү, саклауның алдынгы технологияләрен үзләштерү аркасында гына ирешергә мөмкин.

Без бүген шуны ышаныч белән әйтә алабыз: безнең республикада яшәүчеләр үзебез җитештергән ит, сөт продукциясе, бәрәңге, яшелчә һәм югары сыйфатлы башка туклану продуктлары белән ышанычлы тәэмин ителде.

Татарстан товар җитештерүчеләре продукциясе көндәшлеккә сәләтле булып әверелә һәм азык-төлек базарында үзенең урынын нык тота.

Агропромышленность комплексын тотрыклы үстерү өчен шарт-лар тудыру Татарстанда дәүләтнең өстенлекле бурычларыннан берсе булып кала. Авыл хезмәтчәннәре республиканың реаль булышлыгын социаль өлкәдә дә даими тоеп тора. Юллар салына, яңа йортлар, мәктәпләр, хастаханәләр төзелә, авыл йортларын телефонлаштыру уңышлы үтәлә, авылларны газлаштыру чынлыкта төгәлләнде. Күп эшләр башкарырга кирәк булуга карамастан, авылда яшәү җиңеләя бара. Көндәшлеккә сәләтле товарлыклы продукция җитештерү - икътисадый һәм социаль бурычларны уңышлы хәл итүнең нигезе ул.

Сезгә чын күңелдән сәламәтлек, иминлек һәм туган Татарстаныбыз хакына яңа хезмәт казанышлары телим.