Бөек Ватан сугышында Җиңүнең 64 еллыгы уңаеннан Татарстан Республикасы Президенты М.Ш. Шәймиев мөрәҗәгате

Кадерле ватандашлар!

Хөрмәтле ветераннар - фронтовиклар һәм тыл эшчәннәре!

Сезнең барыгызны да Бөек Ватан сугышында Җиңүнең 64 еллыгы белән ихлас күңелдән котлыйм!

Инде еракларда калган Бөек Ватан сугышы вакыйгаларының күңелләргә якын якты истәлеге халкыбыз хәтеренә тирән уелган. Ул буыннар арасындагы ныклы рухи бәйләнешкә әйләнде һәм аны бернинди авантюрачылар да, үткәннәрне бозып күрсәтергә маташучылар да өзә алмаячак. Россия Федерациясендә һәм БДБ нең башка илләрендә бөтен халыкның Бөек Җиңү бәйрәмен ел саен зурлап билгеләп үтүе моны ачык дәлилләп тора.

Сугыш өермәсе күп газаплар кичергән газиз җиребез буйлап тормышыбызны тузгытып узды, меңләгән шәһәр-авылларны җимерде, егерме миллионнан артык кеше гомерен алып китте. Завод-фабрикаларны, мәдәниятебезнең тиңсез ядкарьләрен харәбә хәленә китерде, чәчүлекләрне һәм урманнарны көйдерде. Кешелек тарихындагы иң коточкыч бу сугыш балаларны да, хатын-кызларны да, картларны да - берәүне дә аямады. Ул һәрберебезнең һәм күпмилләтле халкыбызның йөрәгенә мәңге төзәлмәс яра салды.

Әмма совет кешеләре һәркайда - канкойгыч каты сугышларда, Ленинград блокадасының ачлык боҗрасында, ерак тылда: тәүлек буе эшләгән станоклар янында, колхоз кырларында һәм конструктор бюроларында - явыз дошманга каршы фидакарь сугышты, зарыгып көтелгән Җиңү көнен булдыра алганча якынайтты. Үзенең хаклы икәненә инанган, бар ихтыяр көчен җиңү яулауга куйган халкыбыз Берлинның үзенә барып җитте һәм Манчжурия киңлекләренә кадәр данлы юл узды. Азатлыкка, игелеккә һәм гаделлеккә омтылышыбыз нәтиҗәсендә какшамас көч, бердәм халык булып тупландык һәм шуңа күрә җиңдек тә без.

Бөек Ватан сугышы фронтларына бары Татарстаннан гына да 700 меңнән артык кеше китте, яртысы диярлек иксез-чиксез сугыш кырларында ятып калды. Батырларның үлемсез исемнәре мәңгелек данга күмелде. Муса Җәлил, Михаил Девятаев, Мәгубә Сыртланова, Петр Гаврилов, Гани Сафиуллин, Николай Столяров, Гази Заһитов һәм башка бик күпләрнең каһарман язмышлары татарстанлыларның сугыштан соңгы барлык буыннары өчен дә үрнәк булып тора. Аларның легендар образлары күңелләребезгә сеңгән, сәнгать әсәрләрендә гәүдәләндерелгән, күпсанлы бронза һәм гранит һәйкәлләрдә, авыл, поселок, мәктәп, урам исемнәрендә мәңгеләштерелгән.

Курку белмәс сугышчылар һәм тыл фидакарьләре һәрчак исебездә, аларга карата ихтирам хисләребез чиксез. Алар Бөек Җиңүне кан коеп һәм тир түгеп яулаганнар. Безнең хөрмәтле ветераннарыбыз кылган батырлык - нык ихтыяр, патриотлык һәм рух бөеклеге символы ул. Кыю, хезмәт сөючән, зирәк, күтәренке рухлы булып калуыгыз һәм республикабыз тормышында актив катнашуыгыз өчен зур рәхмәт сезгә! Сугышта һәлак булганнарга мәңгелек дан! Сугышның исән батырларына озын гомер насыйп булсын!

Хәзерге вакытта катлаулы халыкара сәяси вәзгыять дәүләтебездән акыллы көч, ихтыяр, тәвәккәллек таләп итә. Киләсе елда без Бөек Җиңүнең 65 еллыгын иң югары дәүләти һәм иҗтимагый дәрәҗәдә билгеләп үтәчәкбез. Шушы олуг бәйрәм якынлашканда республика яшьләрне хәрби-патриотик рухта тәрбияләүгә өстенлекле игътибар бирә. Безнең яшьләр героик сугышчылар буынына лаеклы алмаш булып үсәргә тиеш. Бөек традицияләргә тугрылыклы, сугышка сәләтле заманча армия - халкыбыз үсешенең һәм тыныч хезмәтенең ныклы гарантиясе һәм ышанычлы яклаучысы. Шунысы куанычлы: моңа Татарстанда да, бөтен илдә дә көннән-көн ныграк төшенә баралар.

Хөрмәтле ветераннар, сезгә чын күңелемнән бәхет, сәламәтлек, иминлек һәм кешеләр тарафыннан лаеклы ихтирам, ә барлык ватандашларга - тынычлык һәм яңа иҗади гамәлләр телим. Туган җиребезне бүтән беркайчан да сугыш күләгәсе капламасын, аналарыбызның һәм хатыннарыбызның күзләренә кайгы-хәсрәт яшьләре тулмасын! Барлык милләт һәм дин вәкилләре бер-берсе белән дус-тату яшәсен! Газиз Ватаныбыз күгендә батырлар васыять иткән Җиңү байрагы һәрчак җилфердәп торсын!

Данлы Җиңү бәйрәме котлы булсын!