Сабантуй бәйрәме уңаеннан Татарстан Республикасы Президенты М.Ш. Шәймиев Котлавы

2009 елның 12 июне, җомга

Хөрмәтле татарстанлылар!

Республикабызның Дәүләт Советы, Хөкүмәте исеменнән һәм шәхсән үз исемемнән сезне милли бәйрәмебез - Сабантуй белән ихлас күңелдән котлыйм!

Язгы сабан бәйрәме буларак барлыкка килгән Сабантуй табигатьнең җанлануын, игенченең фидакарь хезмәтен, кунакчыл һәм юмарт халкыбызның асыл хасиятләрен гәүдәләндерә. Бүген без авыл хезмәтчәннәренә кадер-хөрмәт күрсәтәбез, аларга зур рәхмәтебезне белдерәбез. Чөнки көзен жыеп алыначак уңышның язмышы, тормышыбыз муллыгы аларның тырыш һәм нәтиҗәле хезмәтенә бәйле.

Борынгы милли гореф-гадәтләрне хәзерге заманның мәдәни бизәкләренә ялгаучы Сабантуй буыннар бәйләнешен һәм татар халкының бердәмлеген ачык дәлилли. Бәйрәм мәйданы яшь талантларга юл ача, туган телгә, мәдәниятебезгә, гореф-гадәтләребезгә ихтирам тәрбияли, кешеләр арасында ихлас мөгамәлә корып, рухи аралашу мөмкинлеге тудыра. Сабантуйның тормышчан һәм дөньякүләм мәшһүр бәйрәм булуының сере нәкъ менә шунда.

Халкыбызның "Җиренә күрә - чишмәләре" дигән әйтеме бар. Татарстанда рухият, туганлык һәм татулык чишмәләре һичкайчан кипмәс-саекмас, Сабантуй исә безне игелекле гамәлләргә рухландыручы күңелле һәм нурлы тантана булып калыр дип ышанам.

Бу гүзәл бәйрәм һәркемгә күтәренке кәеф һәм яшәү дәрте бүләк итсен! Барчабызга да исәнлек-саулык, бәхет, озын гомер һәм иминлек телим.

Татарстан Республикасы Президенты М.Ш. Шәймиев

ЧИТАТЬ ВСЕ ПУБЛИКАЦИИ

Выступления, интервью

август, 2022 ел

Татарстан Республикасының Беренче Президенты, Татарстан Республикасы Дәүләт Киңәшчесе М.Ш.Шәймиевнең Бөтендөнья татар конгрессының VIII съездында чыгышы

Хөрмәтле делегатлар! Газиз милләттәшләребез! Хөрмәтле Президентыбыз Рөстәм Нургали улы! Безнең барчабызны да бүгенге истәлекле дата – Бөтендөнья татар конгрессы төзелүгә 30 ел тулу белән тәбрик итәм! Билгеле булганча, 90 нчы елларда – җәмгыятьне үзгәртеп кору шартларында, Россия Федерациясе үз хокукларын киңәйтү турында Декларация кабул иткәннән соң, безнең республикабыз Татарстан, озакка сузмыйча, үз вәкаләтләре турында Декларация игълан итте. Шул форсаттан файдаланып, 30 ел элек без, татарлар, үз тарихыбызда беренче тапкыр, бөтен дөньядан тарихи Ватаныбызга җыелдык. Без ул чакта очраштык-күрештек, татарның милләт буларак исәнлегенә ышандык. Ул чакта безгә конгрессның җыелу факты һәм рухи бердәмлегебезне раслау бик мөһим иде.

июль, 2021 ел

Минтимер Шәймиев: «Чиркәүне тергезү күпмилләтле Татарстан һәм Россия өчен дә бик мөһим»

https://vatantat.ru/2021/07/59102/ Татарстан Республикасы Дәүләт Киңәшчесе, “Яңарыш” Республика фондының Попечительләр советы Рәисе Минтимер Шәймиевнең “Татарстан – Яңа гасыр” телерадиокомпаниясе генераль директоры Илшат Әминов белән әңгәмәсе – Минтимер Шәрипович, Сез Мәрьям ананың Казан иконасының Ватикандагы күчермәсен Казанга кайтару эшен башлап йөрүчеләрнең берсе булдыгыз. Шул хакта сөйләсәгез иде. – Христиан дөньясының аерым кадер-хөрмәтенә ия Мәрьям ана иконасының нәкъ менә безнең җиребездә – Казанда барлыкка килүе белән без һәрвакыт горурланып яшибез. Әлеге тылсымлы икона табылган урында салынган храмны тергезү теләге һәрвакыт яшәп килгәндер дип уйлыйм. Без чиркәүгә һәм Мәрьям ананың Казан иконасына кагылышлы фаҗигале тарихны белә идек. Әмма моңа кадәр безнең халыкның аны тергезү эшенә тотынырга мөмкинчелеге булмады. Дөресен генә әйткәндә, бер буын гомере дәвамында чиктән тыш күп катлаулы вакыйгалар кичерелгән: 1917 елгы революция, күмәкләштерү, репрессияләр, Бөек Ватан сугышы, илне сугыштан соң торгызу, 70 ел буе динсез җәмгыятьтә яшәү, аннан соң үзгәртеп кору — милек формасын һәм сәяси системаны алмаштыру. Заманалар шундый булды.

апрель, 2021 ел

Татарстан Республикасының Беренче Президенты, Татарстан Республикасы Дәүләт Киңәшчесе Минтимер Шәрип улы Шәймиевнең ТР Фәннәр академиясенең “Габдулла Тукай XX–XXI гасырлар мәдәни киңлегендә” конференциясендә чыгышы

Хөрмәтле ватандашлар! Кадерле кунаклар! Уважаемые соотечественники! Дорогие гости! Бөек Тукаебызның тууына 135 ел тулуга багышлап, төрки кардәшләребез, илебез төбәкләре галимнәре катнашында, зурлап үткәрелүче бүгенге фәнни җыен – гаять күркәм күренеш. Моның өчен барыгызга да зур рәхмәт! Бу җыен Габдулла Тукай иҗатының үзе яшәгән гасыр кысаларыннан чыгып, һәрдаим киләчәккә үрләп баруын дәлилләп тора. Димәк, Тукай һәрвакыт янәшәбездә!

май, 2020 ел

Минтимер Шәймиев: «Кыйблабыз дөреслеген тормыш үзе раслады»

Тарихның һәр чоры аерым шәхесләр эшчәнлеге белән бәйле. Татарстан тарихында Минтимер Шәймиев исеме аерым урын алып тора. Ул җитәкчелек иткән елларны еш кына «Шәймиев чоры» дип тә атыйлар. Чөнки беренче Президент җәмгыятьтәге бөтен үзгәрешләрнең үзәгендә кайнады, республика һәм милли мәсьәләләргә кагылышлы кызу бәхәсләр барганда хәлиткеч сүзне әйтте. «Ватаным Татарстан» газетасына Татарстанның беренче Президенты, Дәүләт Киңәшчесе Минтимер Шәрип улы ШӘЙМИЕВ үзгәртеп кору чоры, милләтара дуслык, республика һәм туган тел язмышы турында сөйләде.