Татарстан Республикасы Президенты М.Ш.Шәймиевнең Арча Сабан туенда ясаган чыгышыннан

Кадерле ватандашлар!

Хөрмәтле арчалылар!

Бүген республикабызның һәрбер почмагында - авылларда, район үзәкләрендә безнең традицион милли бәйрәмебез - Сабан туйлары башланды.

Безнең Сабан туе — буыннан-буынга, гасырдан-гасырга күчеп килүче гүзәл тарихи вакыйга. Язгы чәчү тәмамлангач, халкыбыз Сабан туе мәйданына җыелып, үзара аралашып, уй-хисләр уртаклашып, күмәкләшеп бәйрәм итә.

Тагын шунысы бик үзенчәлекле: соңгы вакытта милли Сабантуй бәйрәме интернациональ бәйрәмгә әйләнде. Тиңдәшсез күренеш — татар Сабан туен безнең күпмилләтле республикабызда яши торган халыкларның барысы да үз бәйрәме итеп кабул итә һәм аны татарлар белән бергә дус-тату, матур итеп үткәрә. Бу — Татарстан халкының рухи бердәмлеге дәлиле. Алга таба да шулай бәйрәмнәребез — уртак, халыкларыбыз дус һәм бердәм булса иде. Киләчәктә кылыр игелекле гамәлләребезнең нигезе шушы.

Сезгә билгеле булганча, бу көннәрдә генә Татарстанга Берләшкән Милләтләр Оешмасы каршындагы иң зур оешмаларның берсе - ЮНЕСКОның генераль директоры Коитиро Мацуура әфәнде килеп китте. Без аның белән Сабантуй бәйрәмен Бөтендөнья рухи мирасы исемлегенә кертү турында сүз алып бардык. Дөрес, дөнья бик зур, милләтләр бик күп һәм һәр милләтнең үз бәйрәме бар. Рәсәй буенча да дөньякүләм танылган бәйрәмнәр күп, аларның кайберләрен әлеге исемлеккә кертү турында ЮНЕСКО га тәкъдимнәр дә кертелгән. Әмма, Аллаһы теләсә, шушы зур эшне башкарып чыксак — ә минем моңа ышанычым зур — безнең татар Сабан туе бөтендөнья рухи мирасына әйләнәчәк. Мәгълүм ки, хәзерге заманда мәгълүмат шулчаклы тиз тарала — Сабан туе турында бөтен дөнья беләчәк.

Шулай итеп, безнең бүгенге Сабан туен тагын да күтәренке күңел белән үткәрергә нигез бар дип саныйм. Чөнки дөньялар ничек кенә катлаулы булмасын, халык мәнфәгатьләренә туры килә торган сәясәтебез үзенең нәтиҗәләрен бирә. Күрәсездер, сизәсездер: Сабан туйлары елдан-ел матуррак уза. Дөресен генә әйткәндә, хәтта халыкның үз-үзен тотышы, килеш—килбәте, кешеләрнең үзара мөгамәләсе дә уңай якка үзгәреп тора. Боларны да республикабызда бара торган реформаларның, безнең сәясәтебезнең уңай нәтиҗәсе дип әйтергә була. Промышленность өлкәсендәме, авыл хуҗалыгындамы — безнең казанышларыбызны бөтен тирә-күрше, бөтен Россия белеп тора. Быел да, авыл хуҗалыгы эшләре вакытында һәм уңышлы башкарылды. Республикада эшкәртелми кала торган бер гектар җир дә юк. Тирә-як регионнарда, кызганычка каршы, берничә йөзәр мең гектар җир эшкәртелми ята. Ә безнең басуларда игеннәр матур гына үсеп киләләр. Аллаһы Тәгалә халкыбызның тырышлыгын күреп торадыр инде: Сабантуйга әйбәт яңгырлар яуды, мондый һава шартлары ел да килеп тормый. Шунысын әйтергә кирәк, казанышларыбыз зур. Соңгы елларда гектарыннан 30-40 центнер иген җыеп алуга без инде гадәти хәл дип карый башладык. Бөтен халкыбызга, барыгызга да шушылай тату яшәп, матур эшләгәнегез өчен чын күңелдән рәхмәт әйтәсем килә.

Сабан туйлары котлы булсын, ватандашлар!

Барыгызга да исәнлек-саулык, иминлек телим!