ТАТАРСТАН РЕСПУБЛИКАСЫ ПРЕЗИДЕНТЫ МИНТИМЕР ШӘЙМИЕВНЕҢ ЯҢА ЕЛ МӨРӘҖӘГАТЕ

Яңа ел бәйрәменең иң күркәм мизгеле якынлаша - тагын берничә минуттан өйләребезгә Яңа - 2008 ел атлап керәчәк. Мондый чакта бер-береңә иң мөһим сүзләрне әйтәсе, ихлас тойгыларны белдерәсе һәм иң күркәм теләкләрне җиткерәсе килә.

2007 ел республикабыз өчен иң уңышлы елларның берсе булды.

Социаль-икътисад өлкәсендә күзгә-күренерлек эшләр башкарылды. Промышленность җитештерү күләме күпкә артты. Татарстанда биш миллион тонна ашлык җыеп алу гадәти хәлгә әверелде. Нефтьчеләребезнең өч миллиард тонна нефть чыгару тантанасы бөтен халык бәйрәменә әйләнде. Тарихыбызда беренче мәртәбә ике миллион квадрат метрдан күбрәк торак төзелде. Бу саннар артында йөз меңнәрчә татарстанлыларның гаять зур хезмәте тора. Туган җиребезнең алга барышына зур өлеш керткәнегез өчен барыгызга да чын күңелдән рәхмәт сүзләре җиткерәм.

Республика икътисадында алдынгы фән казанышларына нигезләнгән заманча технологияләр ышанычлы урын ала. "Алабуга" ирекле зонасы шундый дәрәҗәдәге беренче проект булып тора. Түбән Камада хәзерге заман нефть химиясе комплексын үстерү дәвам итә. Нефть тармагының киләчәге битум нефте чыгару һәм эшкәртү мөмкинлекләре белән турыдан-туры бәйләнгән. Билгеле булганча, без автомобиль һәм авиация төзелешенә зур өметләр баглыйбыз.

Татарстанда барлык милли проектлар көчле социаль мәгънәгә ия. Алар халкыбызның төп мәнфәгатьләренә җавап бирә, дәүләт һәм гражданнар җәмгыяте үсешенә, шәхесара мөнәсәбәтләргә уңай йогынты ясый.

2007 ел республиканың иҗтимагый-сәяси үсешендә аерым игътибарга лаеклы чор булды. Федераль үзәк һәм Татарстан арасында яңа Шартнамә гамәлгә керде.

Татарстанлыларның күпчелеге Дәүләт Думасына сайлаулар барышында Россия Федерациясе Президенты Владимир Путинның стратегия юнәлешен хуплады. Киләсе елның март аенда булачак Президент сайлауларында да безнең сайлаучыларның Дмитрий Медведев кандидатурасын яклап тавыш бирүләренә ышаныч зур.

Узып баручы Хәйрия елы - җәмгыятебездә шәфкатьлелек һәм бер-береңә ярдәм итү традицияләрен үстерүгә зур этәргеч булды. Мәдәният һәм фән офыклары киңәя бара.

Татарстан халыклары съезды һәм Бөтендөнья татар конгрессы корылтае күпмилләтле халкыбызның бердәмлеген исбат итте.

Без халыкны борчый торган проблемаларның барлыгын һәм чишү юлларын беләбез һәм үзебезнең көндәлек эшчәнлегебез аша бергәләп хәл итәчәкбез.

Кадерле дуслар! Үзенең игелекле эшләре белән күңелләребезгә хуш килгән Хәйрия елы үз эстафетасын Гаилә елына тапшыра. Киләсе яңа ел безне яңадан-яңа иҗади казанышларга рухландырып, барлык буыннарны бер-берсенә якынайтып, гаиләләрне ныгытсын иде.

Барыгызга да гаилә бәхете, исәнлек-саулык, иминлек телим.

Яңа ел котлы булсын, кадерле ватандашлар!