Минтимер Шәймиев фикеренчә, ташламалардан файдаланучыларны дарулар белән тәэмин итү мәсьәләләре төбәкләрдә хәл ителергә тиеш.

Татарстан Президенты Минтимер Шәймиев фикеренчә, ташламалардан файдаланучыларны дарулар белән тәэмин итү мәсьәләләрен хәл итү төбәкләргә тапшырылырга тиеш. "Без базар икътисады шартларында яшибез. Ташламалы дарулар белән тәэмин итү мәсьәләсе барыбер төбәкләргә биреләчәк, дип уйлыйм, әмма чыгымнарны киметү һәм халык өчен кыенлыклар тудырмас өчен моны тизрәк эшләргә кирәк", - дип белдерде Минтимер Шәймиев "Интерфакс-Поволжье" агентлыгына биргән интервьюсында.

Ташламаларын акчага алмаштыру турындагы закон үз көченә кергәнче, ташламалардан файдаланучыларны дарулар белән төбәкләрдә тиешле хезмәтләр тәэмин итә иде, дип искә төшерде ул. Аларның эшчәнлеге контрольдә булып, дарулар бирү оешкан төстә узды, базарда конкуренция булды һәм бу, үз чиратында, бәяләргә йогынты ясады.

"Бүген Сәламәтлек саклау министрлыгы тәкъдим иткән схема ташламалы категория гражданнар өчен дарулар базарын монополияләштерүгә китерде. Льготачыларга дип каралган кайбер препаратлар ирекле сатуда тиңдәшләреннән хәтта кыйммәтрәккә дә төшә", - дип билгеләп үтте М.Шәймиев. Килеп туган вәзгыять федераль түрәләрнең ташламалардан файдаланучыларны өчен дарулар югары сыйфатлы һәм арзан булачак дигән сүзләренең нигезсез булуын күрсәтте. Башка кыенлыклар да килеп чыга. Әйтик, авырулар берничә ел дәвамында конкрет дарулар кулланган ди. Хәзер исә дарулар исемлеге үзәктән билгеләнә, табиблар авыруны ул җайлашмаган башка препаратка күчерергә мәҗбүр. Вак нәрсә кебек тоелса да, сүз кеше турында, аның психологик халәте турында бара, дип ассызыклады Президент.

Аның сүзләренчә, бүген ташламаларны акчага алыштыру кирәкме, юкмы дигән сөйләшүләр актуаль түгел. "Закон кабул ителгән һәм аны үтәргә кирәк. Кем нәрсә генә әйтмәсен ил ташламаларны акчага алмаштыру юлын үтәргә һәм торак-коммуналь хуҗалык реформаларын гамәлгә ашырырга тиеш", - дип уйлый республика башлыгы.

Нәтиҗәдә, ташламаларны акчага алмаштыру процессы халыкка транспорт хезмәте һәм торак-коммуналь өлкәдә хезмәт күрсәтүне яхшыртырга тиеш. Федераль ташламадан файдаланучыларны дару белән тәэмин итүгә элеккегә караганда акча күбрәк бүленеп бирелүен исәпкә алып, монда бөтенесе халык өчен мөһим эшне яхшылап оештырудан тора, -диде республика Президенты.

"Реформаларны ничек кенә авыр кабул итсәк тә, алар уза, тормыш яхшы якка үзгәрә. Без үзебез дә үзгәрдек, яшәү шартларын һәм кибет киштәләрен реформага кадәрге чорлар белән чагыштырырлык түгел. Шул ук вакытта, бигрәк тә торак-коммуналь хуҗалык һәм транспорт хезмәте, реформага кадәрге хәлендә һәм бу безнең беребезгә дә ошамый. Әгәр ошамый икән, аларны тамырдан үзгәртергә кирәк", - дип саный Татарстан җитәкчесе.

Бүген федераль һәм җирле хакимиятләр ташламаларны акчага алмаштыру турындагы законның эшләнеп бетмәвен аңлады һәм әлеге реформаның нәтиҗәләрен йомшарту өчен чаралар күрә.

"Моның кебек авыр реформалар үткәрүдән без тәҗрибә тупларга тиеш, мәгариф һәм сәламәтлек саклау өлкәсендә реформалар кирәклеген кире какмыйча, бу реформаларны гамәлгә ашыру кешеләргә һәм аларның яшәү шартларына ничек йогынты ясавы турында җитди уйларга кирәк", -дип өстәде М.Шәймиев.

Ул: хәзер, халык ташламаларны берьюлы акчага алмаштыру һәм торак-коммуналь хезмәткә тарифлар арту белән очрашкан вакытта, мәгариф һәм сәламәтлек саклау системасындагы реформаларга җитди карарга кирәк, дип ассызыклады.

"Бүген төбәкләрнең, бигрәк тә дотациядә утыручыларның, бюджетлары ташламаларны акчага алыштыру белән бәйле кыенлыклар кичерә. Урта һөнәри белем системасының җирле дәрәҗәгә тапшырылуын исәпкә алырга кирәк. Әгәр югары уку йортларының күбесен өлешчә финанслауны субъектларга тапшырырга тәкъдим итсәк, төбәк бюджетлары моны күтәрә алмаячак", - дип йомгак ясады М.Шәймиев.