Нурсолтан Назарбаев чыгышы

Татар халкының 1000 еллык данлы тарихы символы булган Казанны 1000 еллыгы белән коллегаларым, шәхсән үз исемемнән, Казахстан халкы исеменнән тәбрикләвем минем өчен зур дәрәҗә. Казан - гаҗәп язмышлы шәһәр. Цивилизация, диннәр, күп төрле борынгы мәдәниятләр үзәге кисешкән күпер итеп, аны Көнбатыш һәм Көнчыгышның якын, ерак илләре белән меңләгән җепләр бәйли. Биредә төрле диндәге, төрле милләттән булган халыклар гасырлар буе бергә яши. Һәм бүген дә әлеге традицияләр сакланып калган. Казан университетының ролен аерым билгеләп үтәсем килә. Ул 1804 елда нигез салынган көненнән башлап киң Евразия төбәге мәдәни иҗтимагый тормышы үзәкләреннән берсенә әверелә. Ул рус, татар, казах, мари, удмурт, башкорт һәм башка халыклар мәдәниятләрен бәйләүче мәгариф чыганагы буларак кабул ителә. Казан университеты бик күп казах яшьләренә белем бирде. Алар соңыннан илебезнең танылган фән һәм мәдәният эшлеклеләре булдылар.

Татар халкының бөек улы Габделнасыйр Курсави, татар тарихы атасы Шиһабетдин Мәрҗани, танылган реформатор Исмәгыйль Гаспринский, сәясәтче Рәшид Ибраһим, дин белгече Ризаэддин Фәхретдин, публицист-язучы Гаяз Исхакый, дәүләт эшлеклеләре Мирсәет Солтангалиев, Кашаф Мохтаров, галимнәр Йосыф Акчура, Садри Максуди һәм башка татар ренессансының танылган эшлеклеләре татар халкының гына түгел, барлык төрки халыкларның сәяси, рухи, фәнни үсешенә зур йогынты ясадылар. Шунысы сөендерә, Казан үзенең меңьеллыгы юбилее елында кунакларга шәһәр халкына хас киң күңеллелеге белән ачыла. Бу бәйрәм безнең өчен, казахлар өчен, халыкларыбыз арасындагы гасырларга сузылган дуслыкны расларга мөмкинлек бирә. Хәзер Казахстан – Россия мөнәсәбәтләре хезмәттәшлекнең яңа дәрәҗәсенә күтәрелде. Россия Казахстанның иң зур сәүдә партнерларыннан берсе санала. Илләребез арасындагы ике яклы сәүдә әйләнеше Казахстанның барлык сәүдә әйләнешенең дүрттән бер өлешен тәшкил итә. Владимир Владимирович белән май аенда – Чиләбедә, июньдә Байконурда узган очрашуларыбыз шактый нәтиҗәле булды. Очрашу барышында дәүләтара мөнәсәбәтләрнең киң спектры буенча конкрет нәтиҗәләргә ирешелде. Казахстан – Россия мөнәсәбәтләре үсешенә Татарстан Республикасы саллы өлеш кертә. Казахстан һәм Татарстанның дәүләт бизнес-структураларының даими рәвештә бер-берләре белән аралашулары ике яклы мөнәсәбәтләрнең ныгуына булыша. Узган елда гына да берничә зур чара үткәрелде. Болар – минем – Казанга, Минтимер Шәриповичның Астанага визиты, октябрьдә Казахстанда Татарстан көннәре узуы. Нефть химиясе, машина төзелеше, банк өлкәсендә хезмәттәшлекне үстерү турындагы килешүләребезне, ике башкаланың үзара ярдәм итешү турында Меморандум кабул итүен билгеләп үтәсем килә. Монда китәр алдыннан гына мин Күкчәтауда КамАЗ һәм Казахстан арасында төзелгән зур уртак предприятиенең алтасмасын кистем. Бу уртак предприятие илебездә йөк автомобильләре һәм автобуслар җитештерүгә кереште.

Хөрмәтле Казан халкы! Казанның меңьеллыгы бәйрәме һәрберебез өчен кадерле. Язмышы кушуы буенча мәдәниятләр, традицияләр үзәгенә әйләнгән шәһәр, үткәне турында онытмыйча, һәрвакыт үзенең җылылыгын, ачык күңеллелеген, кунакчыллыгын саклап калсын, киләчәккә омтылсын. Сезгә муллык, күпмилләтле Татарстанның чәчәк атуы өчен сәламәтлек телим.