Бөек Ватан сугышында Җиңүнең 58 еллыгы уңаеннан Татарстан Республикасы Президенты М.Ш.Шәймиевнең республика гражданнарына мөрәҗәгате

Кадерле сугыш һәм хезмәт ветераннары!

Хөрмәтле татарстанлылар!

Сезне ихлас күңелдән бөек бәйрәм — күпмилләтле халкыбызның фашизмны Җиңү көне белән котлыйм!

Һәр елны майның шушы ямьле көнендә без Ватаныбыз намусы һәм азатлыгы өчен рәхимсез сугышларда һәлак булган; тылда, станок артында җиңү хакына армый—талмый корал ясаган; колхоз кырларында көне—төне эшләп батыр совет сугышчыларына, иксез-чиксез илебез халкына күз яше һәм ачы тир белән сугарылган икмәк үстергән кешеләрне олы ихтирам белән һәм юксынып искә алабыз. Илле сигез ел элек безнең халык тиңдәшсез каһарманлык үрнәкләре күрсәтеп, кешелек дөньясына үлем белән янаган фашист армиясен тар-мар итүгә иреште. Бу канлы көрәшнең кайтавазы әле бүген дә ветераннарыбызның сугыш уты көйдергән йөрәкләрендә әрни, тәннәрендә төзәлмәс яралар булып сыкрый. Сугышның куркыныч сурәте Россиянең иксез-чиксез киңлекләрендә — туганнар каберлекләрендә, снарядлар белән телгәләнеп беткән сугыш кырларында мәңгелеккә уелып калган.

Гайрәтле һәм хезмәт сөючән халкыбызның тиңдәшсез батырлыгы һәм фидакарьлеге кешелек дөньясын фашизм вәхшәтеннән коткарды. Бу җиңү безгә бик кыйммәткә төште. Фәкать Татарстаннан гына да өч йөз илле меңгә якын якташыбыз туган йортына әйләнеп кайта алмады. Ә сугыштан соң, тән һәм җан яраларыннан, авыр хезмәттән вакытсыз гүргә кергәннәр күпме? Ә күпме парлар кавышмады, күпме бала якты дөньяга тумыйча калды? Аларның исәбе—хисабы юк. Гомергә онытылмас шушы сугышның билгеле һәм билгесез геройларына, аның изге корбаннарына мәңгелек дан, алар халык хәтерендә мәңге яшәр!

Еллар узган саен без «беркем дә онытылмый, бернәрсә дә онытылмый» дигән әйтемнең матур сүзләр генә түгел, гражданлык җәмгыяте төзүнең, үзара килешеп яшәүнең мөһим шарты булуын тирәнрәк аңлый барабыз. Ә бу исә ветераннарга рәхмәтле булып, аларны һәрчак истә тотып, кадер-хөрмәт күрсәтүдән, үзеңне шушы батыр халыкның улы яисә кызы итеп тоюдан, төрле милләт һәм төрле дин вәкилләре күңелендә шушы җиңү тудырган бердәмлек хисеннән башка мөмкин түгел. Вакыт җир йөзеннән зур-зур цивилизацияләрне юкка чыгара ала, ләкин аның чын рухи кыйммәтләргә кагылырга кодрәте җитми. Безнең халык өчен Бөек Ватан сугышында Җиңү —менә инде алтмыш елга якын — мөкатдәс бәйрәм, уртак хатирә, тиңсез рухи хәзинә булып тора.

Татарстан Республикасы җитәкчелеге моны һәрвакыт истә тота, сугыш һәм хезмәт ветераннарына лаеклы яшәү шартлары тудырырга тырыша, аларны җәмәгать тормышына тартырга ярдәм итә һәм яшьләргә хәрби—патриотик тәрбия бирүгә җитди игътибар бирә. Һичшиксез, бу мөһим һәм изге эштә дәүләт хакимияте органнары белән киң җәмәгатьчелек үзара аңлашып хезмәттәшлек иткәндә генә уңай нәтиҗәләргә ирешеп була. Бөек Ватан сугышының хәлиткеч вакыйгаларын билгеләп үтү һәм Казан тарихына бәйле данлы юбилейларны бәйрәм итү бу хезмәттәшлеккә яңа көч өстәргә тиеш. Әлеге тантаналарда ветераннарның һәм яшьләрнең бергәләп катнашуы буыннар бәйләнешен ныгыту, республика халкының төрле социаль катламнары, төрле яшьтәге кешеләр арасында үзара ышанычны арттыру өчен яңа мөмкинлекләр ачар дип уйлыйм.

Узган сугыш сабаклары безгә хәзерге вәзгыятьне яхшырак аңларга ярдәм итәргә тиеш. Мәгълүм ки, өченче меңьеллык башында кайбер җавапсыз сәясәтчеләр гаебе белән, кешелек дөньясына цивилизацияләрнең ачыктан—ачык бәрелешү ихтималы яный. Киеренкелекнең көчәюенә юл куймау, дөньяны яңа сугыш упкынына тәгәрәүдән саклап калу өчен тынычлык һәм иминлек яклы барлык кешеләрнең уртак тырышлыгы кирәк. Татарстанда мондый кешеләр бихисап. Мин аларның тынычлык хакына кылынган күркәм гамәлләреннән һәм омтылышларыннан дөнья җәмәгатьчелеге дә хәбәрдар булып, аларга лаеклы бәя бирер дип ышанам.

Инде күпме кайгы—хәсрәт кичергән җиребезгә бүтән беркайчан да сугыш афәте килмәсен дип телик. Балаларыбыз һәм оныкларыбыз сугышның үзәк өзгеч фаҗигасен беркайчан да белмәсен, ә аналарыбыз, хатыннарыбыз, кызларыбыз, апа—сеңелләребез беркайчан да күз яшьләре түкмәсен иде! Барыгызга да тынычлык, иминлек һәм бәхетле озын гомер телим!

Татарстан Республикасы Президенты
Минтимер Шәймиев