ТАТАРСТАН РЕСПУБЛИКАСЫ ПРЕЗИДЕНТЫ МИНТИМЕР ШӘЙМИЕВНЕҢ ЯҢА ЕЛ МӨРӘҖӘГАТЕ

2006 елның 31 декабре, якшәмбе

Хөрмәтле ватандашлар!

Узып баручы ел Татарстан өчен гомумән уңышлы, тотрыклы үсеш елы булды. Федераль хакимиятнең милли проектлар кабул итеп, төп игътибарны социаль мәсьәләләрне хәл итүгә юнәлтүе барыбыз өчен дә куанычлы хәл. Республика бу проектларны гамәлгә ашыруда актив катнаша, аларны үз мөмкинлекләре һәм тәҗрибәсе белән тагын да тулыландыра. Республикада торак социаль ипотека программасы да көннән-көн киңрәк колач ала. Билгеле булганча, сәламәтлек саклау өлкәсендә дәвалауның иң алдынгы ысуллары тормышка ашырыла. Авыл хуҗалыгы, юллар төзү һәм башка элемтә чаралары булдыру өлкәләрендә дә уңай үзгәрешләр сизелә. Болар барысы да халкыбызның тормыш-көнкүрешен яхшыртуга юнәлтелгән.

Әлеге уңай үзгәрешләр - барыбызның да иҗади фидакарь хезмәте нәтиҗәсе. Кадерле ватандашлар, заманга лаек олы хезмәтегез өчен сезгә зур рәхмәтемне җиткерәм.

2006 елда Татарстан алга киткән Европа илләре даирәсенә юл салуны дәвам итте. Башкалабыз Казанда ил һәм дөнья күләмендәге абруйлы форумнар уздырыла. 2011 елда Бөтендөнья җәйге универсиаданы үткәрергә дәгъва кылуыбыз да очраклы хәл түгел. Шунысы куанычлы: республикабыз бөтен дөньяга милләтара һәм динара мөнәсәбәтләрне җайга салган җирлек буларак танылды.

Без 2006 елны Әдәбият һәм сәнгать елы дип игълан иткән идек. Бөек Тукайның, герой шагыйрь Муса Җәлилнең; Сара Садыйкова, Александр Ключарев, Николай Фешин һәм башка күренекле шәхесләребезнең юбилейларын олылап уздырдык. Без барыбыз да ел буе алар иҗаты тәэсирендә яшәдек. Алда әле безне зур бәйрәм - татар театрының йөз еллыгы көтә.

Шушы рухи күтәрелешне дәвам итеп, 2007 елны Хәйрия елы дип игълан итүне табигый хәл дип саныйм. Тирә-ягыбызда, караучысыз калган өлкәннәр, инвалидлар, ятимнәр, авыр хәлләргә очраган кешеләр бар. Алар безнең ярдәмгә мохтаҗ. Аларга ярдәм кулы сузу, игелек кылу - әхлакый бурычыбыз. Быел Корбан гаетенең Яңа ел бәйрәменә туры килүе, аларның Раштуа бәйрәменә ялганып китүе ниятләребезнең дөреслеген раслап тора.

Газиз милләттәшләр!

Изге Корбан бәйрәменнән башланып китүче Яңа ел тормышыбызга – муллык, гаиләләребезгә - иминлек, барчабызга да сәламәтлек һәм бәхет китерсен!

Бер-беребезне кайгыртып яшик, бер-беребезгә игътибарлы һәм ихтирамлы булыйк.

Яңа ел котлы булсын, кадерле дуслар!

31 декабрь, 2006 ел

ЧИТАТЬ ВСЕ ПУБЛИКАЦИИ

Выступления, интервью

август, 2022 ел

Татарстан Республикасының Беренче Президенты, Татарстан Республикасы Дәүләт Киңәшчесе М.Ш.Шәймиевнең Бөтендөнья татар конгрессының VIII съездында чыгышы

Хөрмәтле делегатлар! Газиз милләттәшләребез! Хөрмәтле Президентыбыз Рөстәм Нургали улы! Безнең барчабызны да бүгенге истәлекле дата – Бөтендөнья татар конгрессы төзелүгә 30 ел тулу белән тәбрик итәм! Билгеле булганча, 90 нчы елларда – җәмгыятьне үзгәртеп кору шартларында, Россия Федерациясе үз хокукларын киңәйтү турында Декларация кабул иткәннән соң, безнең республикабыз Татарстан, озакка сузмыйча, үз вәкаләтләре турында Декларация игълан итте. Шул форсаттан файдаланып, 30 ел элек без, татарлар, үз тарихыбызда беренче тапкыр, бөтен дөньядан тарихи Ватаныбызга җыелдык. Без ул чакта очраштык-күрештек, татарның милләт буларак исәнлегенә ышандык. Ул чакта безгә конгрессның җыелу факты һәм рухи бердәмлегебезне раслау бик мөһим иде.

июль, 2021 ел

Минтимер Шәймиев: «Чиркәүне тергезү күпмилләтле Татарстан һәм Россия өчен дә бик мөһим»

https://vatantat.ru/2021/07/59102/ Татарстан Республикасы Дәүләт Киңәшчесе, “Яңарыш” Республика фондының Попечительләр советы Рәисе Минтимер Шәймиевнең “Татарстан – Яңа гасыр” телерадиокомпаниясе генераль директоры Илшат Әминов белән әңгәмәсе – Минтимер Шәрипович, Сез Мәрьям ананың Казан иконасының Ватикандагы күчермәсен Казанга кайтару эшен башлап йөрүчеләрнең берсе булдыгыз. Шул хакта сөйләсәгез иде. – Христиан дөньясының аерым кадер-хөрмәтенә ия Мәрьям ана иконасының нәкъ менә безнең җиребездә – Казанда барлыкка килүе белән без һәрвакыт горурланып яшибез. Әлеге тылсымлы икона табылган урында салынган храмны тергезү теләге һәрвакыт яшәп килгәндер дип уйлыйм. Без чиркәүгә һәм Мәрьям ананың Казан иконасына кагылышлы фаҗигале тарихны белә идек. Әмма моңа кадәр безнең халыкның аны тергезү эшенә тотынырга мөмкинчелеге булмады. Дөресен генә әйткәндә, бер буын гомере дәвамында чиктән тыш күп катлаулы вакыйгалар кичерелгән: 1917 елгы революция, күмәкләштерү, репрессияләр, Бөек Ватан сугышы, илне сугыштан соң торгызу, 70 ел буе динсез җәмгыятьтә яшәү, аннан соң үзгәртеп кору — милек формасын һәм сәяси системаны алмаштыру. Заманалар шундый булды.

апрель, 2021 ел

Татарстан Республикасының Беренче Президенты, Татарстан Республикасы Дәүләт Киңәшчесе Минтимер Шәрип улы Шәймиевнең ТР Фәннәр академиясенең “Габдулла Тукай XX–XXI гасырлар мәдәни киңлегендә” конференциясендә чыгышы

Хөрмәтле ватандашлар! Кадерле кунаклар! Уважаемые соотечественники! Дорогие гости! Бөек Тукаебызның тууына 135 ел тулуга багышлап, төрки кардәшләребез, илебез төбәкләре галимнәре катнашында, зурлап үткәрелүче бүгенге фәнни җыен – гаять күркәм күренеш. Моның өчен барыгызга да зур рәхмәт! Бу җыен Габдулла Тукай иҗатының үзе яшәгән гасыр кысаларыннан чыгып, һәрдаим киләчәккә үрләп баруын дәлилләп тора. Димәк, Тукай һәрвакыт янәшәбездә!

май, 2020 ел

Минтимер Шәймиев: «Кыйблабыз дөреслеген тормыш үзе раслады»

Тарихның һәр чоры аерым шәхесләр эшчәнлеге белән бәйле. Татарстан тарихында Минтимер Шәймиев исеме аерым урын алып тора. Ул җитәкчелек иткән елларны еш кына «Шәймиев чоры» дип тә атыйлар. Чөнки беренче Президент җәмгыятьтәге бөтен үзгәрешләрнең үзәгендә кайнады, республика һәм милли мәсьәләләргә кагылышлы кызу бәхәсләр барганда хәлиткеч сүзне әйтте. «Ватаным Татарстан» газетасына Татарстанның беренче Президенты, Дәүләт Киңәшчесе Минтимер Шәрип улы ШӘЙМИЕВ үзгәртеп кору чоры, милләтара дуслык, республика һәм туган тел язмышы турында сөйләде.