Халыкара хатын-кызлар көне – 8 Март уңаеннан Татарстан Республикасы Президенты М.Ш.Шәймиев МӨРӘҖӘГАТЕ

Сезне чын күңелдән язның гүзәл бәйрәме – Халыкара хатын-кызлар көне 8 Март белән тәбрик итәм!

Вакытлар узу белән әһәмиятен югалтмыйча, яңа, заманча мәгънәгә ирешкән истәлекле көннәр аз түгел. Язның, мәхәббәтнең, гүзәллекнең һәм ана бәхетенең якты тантанасы булган 8 Март та хаклы рәвештә шундый бәйрәмнәргә керә.

Һәркайсыбыз тумыштан ук үз йөрәгендә үз әнисенә карата бетмәс-төкәнмәс мәхәббәт һәм хөрмәт хисе саклый. Ир-атны гомер буена хатын-кызның гүзәллеге, назы, биниһая мәрхәмәте һәм игелеге үзенә тартып тора. Бала тудыру - илаһи могҗиза, шул рәвешчә сез кешелекне, балалар һәм оныклар аша, мәңгелеккә илтәсез. Сезгә булган мәхәббәткә, назга, хөрмәткә тиң сүзләр юктыр дөньяда, гүзәл ханымнарыбыз һәм туташларыбыз!

Хатын-кызның борын заманнардан ук гаилә учагын саклаучы булып саналуы мәгълүм. Бүгенге көндә - югары технологияләр чорында, гаилә һәм никахка карата электән килгән изге караш үзгәреп барган вакытта, әлеге гади хакыйкатьнең кадере арта. Шуңа күрә, җәмгыятьнең һәм дәүләтнең уртак тырышлыгы хатын-кызларыбызның тормышта үз сәләтләренә тиң шөгыль табуын тәэмин итүгә, моның белән беррәттән, гаилә кору, ана булу вазыйфасын да гамәлгә ашыру өчен лаеклы шартлар тудыруга юнәлдерелергә тиеш.

Дәүләтнең демография мәсьәләләрен хәл итүгә игътибары арта бару боларны тирәнтен аңлауның бер чагылышы булып тора. Моның өчен бик күп чаралар күрелә, аларның иң үтемлесе – «ана капиталы» булдыру икәнен әйтеп китү зарур. Бу өлкәдә уңай үзгәрешләр дә күзәтелә инде. Соңгы вакытта балалар күбрәк туа башлады. Лаеклы аналарны һәм күп бала тәрбияләүче тырыш гаиләләрне яшьләр үрнәк итеп кабул итә. Болар барысы да, һичшиксез, безне сөендерә һәм республикабызның, күпмилләтле илебезнең киләчәгенә ышанычны арттыра.

Татарстанда һәм Россиядә Гаилә елы игълан ителү гаилә һәм никахны ныгытуга, яшь буынга гаиләнең рухи-әхлакый кыйммәтләрен тапшыруга яңа этәргеч бирер дип ышанам. Безнең республикада ул Хәйрия елының матур дәвамы да булып тора. Хәйрия елы исә безнең барыбызга да иң яхшы сыйфатларыбызны күрсәтергә мөмкинлек бирде. Бүген авыр хәлдә калган балалар, ятимнәр үзләренә яңа гаиләләрне ешрак табалар, ә социаль хәйрия бөтенхалык эшенә әверелә бара. Җыеп әйткәндә, бездә гаилә мөнәсәбәтләрен ныгыту һәм үстерү буенча уңай тәҗрибәгә кытлык юк. Моның өчен, барыннан да элек, гүзәл затларыбызга рәхмәт әйтергә бурычлыбыз. Без сезгә ышанабыз, без сезне кадерлибез, без сезне яратабыз һәм киләчәктә тормышыгызны тагын да лаеклы һәм бәхетле итү өчен барысын да эшләячәкбез.

Шул ук вакытта без өлкән буын вәкилләренә - ир-атлар белән беррәттән Бөек Ватан сугышының коточкыч авырлыкларын үз җилкәләрендә татыган, илне хәрабәләрдән торгызган, шуңа да карамастан иң гүзәл хатын-кыз сыйфатларын саклап кала алган апаларга аеруча хөрмәт белән карыйбыз. Кызганыч ки, вакыт аяусыз һәм бу каһарман хатын-кызлар саны һаман кими бара. Шуңа күрә, бүген безнең арадагы хатын-кыз ветераннарга карата игътибарлы булу һәм алар турында кайгырту – бөтен җәмгыятебезнең бурычы. Кадерле апалар һәм әбиләр! Сезне чын йөрәктән 8 Март көне белән котлыйм, сезгә сәламәтлек телим һәм мондый матур бәйрәмнәр сезнең тормышыгызда мөмкин кадәр күбрәк булсын иде дип телим. Илебез һәм халкыбыз хакына башкарган һәм башкарылучы барлык эшләрегез өчен олы рәхмәтемне белдерәм!

Танылган шагыйрь Ренат Харис күңелдә уелып калырлык сүзләр әйткән иде: «Хатыннарга карап күрәм язны». Һәм, чыннан да, без – ир-атлар өчен яз һәм хатын-кыз төшенчәләре аерылгысыз, чөнки сезнең елмаюыгыз, матур сүзләрегез, язгы кояш табигатьне уяткандай, бездә яшәү көчен яңарта. Һәм без әлеге яз бәйрәме гомер буе дәвам итсен өчен көчебездән килгән бар нәрсәне эшләргә әзербез.

Кадерле хатын-кызлар! Йөрәкләрегез һәрвакытта мәхәббәт һәм шатлык белән тулып торсын, һәрчак сөйкемле һәм сөекле булыгыз!

Бәхет, тынычлык, исәнлек-саулык, игелек һәм муллык юлдаш булсын сезгә!

Татарстан Республикасы Президенты
М.Ш. Шәймиев