Минтимер Шәймиев: "Бүген җәмгыятьтә дини һәм әхлакый нигезләрне ныгыту аеруча мөһим"

Татарстан Президенты Минтимер Шәймиев диннәргә тигез караш тәрбияләүне Россия җәмгыятенең иң мөһим бурычларыннан берсе дип саный.

"Россия - күп милләтле дәүләт һәм бездә традицион диннәр белән бергә башка диннәр дә бар. Шунлыктан җәмгыятьтә башка диннәргә тигез караш тәрбияләү мөһим", - диде М.Шәймиев "Интерфакс" агентлыгына биргән интервьюсында. Әлеге уңайдан ул Мәскәү һәм бөтен Русиянең яңа сайланган патриархы Россия Федерациясендә башка традицион дини конфессияләр белән конструктив хезмәттәшлек булдыру курсын үткәрер дип өметләнә.

"Әлеге курсны мәрхүм патриарх Алексий II үткәрде. Патриарх Кирилл да, бернинди икеләнүсез, әлеге юнәлештә күп нәрсә эшли алачак. Бүген җәмгыятьтә дини һәм әхлакый нигезләрне ныгыту аеруча мөһим. Бу дәүләтнең дә, илебездәге төп диннәрнең дә бурычы", - дип ассызыклады республика башлыгы.

Татарстан башлыгы билгеләп үткәнчә, Россиядә атеистик җәмгыять төзү буенча уңышсыз һәм кирәкмәгән омтылышлардан соң күп еллар үткәч гражданнарга дин тоту ирегенә конституцион хокуклары кире кайтарылды. Шунлыктан илебездә башка бер дәүләттә дә булмаганча руханиларның роле гаять зур.

"Мин Помест соборы тарафыннан үткәрелгән сайлауга зур хөрмәт белән карыйм, анда күпчелек тавыш митрополит Кирилл файдасына бирелде. Мин аның белән берничә тапкыр очраштым, мирополитның дин тотучыларга Аллаһ сүзен үтемле итеп аңлата белүе миндә яхшы караш тудыра", - дип ачыклык кертте М.Шәймиев.

Аның сүзләренә караганда, биредә сүз Кириллның гаммәви мәгълүмат чараларында дөнья күргән һәм, аерым алганда, телевидениедә яңгыраган чыгышлары турында бара. Татарстан Президенты ассызыклап үткәнчә, аның атналык "Слово пастыря" телетапшыруы дин тотучылар өчен генә түгел, ә диннән ерак торган кешеләр өчен дә тәрбияви әһәмияткә ия. "Шунысы игътибарга лаек, митрополит Кирилл бер генә актуаль проблеманы да читләтеп узмый, гражданнарның барлык сорауларына да җавап бирә", - диде М.Шәймиев.

Аның фикеренчә, зур тизлектә үзгәрүче дөньяда теләсә кайсы дин алдында консерватизмны - гасырлар дәвамында формалашкан кагыйдә һәм традицияләрне һәм үсеш кичерүче иҗтимагый аңны үзара яраштыру проблемасы тора.

"Бу - реаль проблема, һәм руханиларга, аларның нинди дин тотуларына бәйсез рәвештә, реформа тарафдарлары белән дә, традиционалистлар белән дә уртак тел табарга кирәк", - дип саный М.Шәймиев. Ә бу бер дә җиңел бурыч түгел һәм аны хәл иткәндә, республика Президенты билгеләп үткәнчә, зур түземлелек, зирәклек күрсәтергә, шулай ук бер-береңә юл куя белергә кирәк, чөнки дин тотучылар реаль дөньяда яши.

Сүзен йомгаклап, М.Шәймиев Россия җәмгыятендәге һәр дини җитәкче алдында - патриарх булсынмы ул, мөфти яки раввинмы - һәрвакыт хакимият белән үзара мөнәсәбәтләр проблемасы торды һәм торачак. "Әлеге мәсьәләдә яңа патриарх та дәүләт белән конструктив диалог һәм хезмәттәшлек булдыру ихтыяҗыннан чыгып эш итәр дип уйлыйм. Мин митрополит Кириллны Мәскәү һәм бөтен Русия Патриархы итеп сайлануы белән котлыйм, аңа иминлек һәм озын гомер телим", - диде М.Шәймиев.