Халыкара хатын-кызлар көне - 8 Март уңаеннан Татарстан Республикасы Президенты М.Ш.Шәймиев Мөрәҗәгате

Кадерле хатын-кызлар!

Сезне язның иң күңелле һәм иң тормышчан бәйрәме - Халыкара хатын-кызлар көне 8 Март белән чын күңелдән котлыйм!

Кешелекнең мәхәббәт, гүзәллек, ана булу, игелек һәм шәфкать кебек мәңгелек хәзинәләрен берьюлы чагылдырган башка бәйрәм юктыр, мөгаен. Бу бәйрәм социаль, милли, дини чикләрне белми, ул һәрберебез өчен бердәй кадерле һәм аңлаешлы. 8 Мартны без һәрвакыт яз килү һәм табигатьнең уянуы дип күзаллыйбыз.

Барлык заманнарда һәм барлык халыкларда хатын-кыз иң асыл сыйфатлар чагылышы булып санала. Шагыйрьләр, музыкантлар, философлар тарафыннан дан җырланган, талантлы рәссамнар һәм сынчылар тарафыннан сурәтләнгән гүзәл хатын-кыз образы кешелекнең камиллеккә омтылышында юл күрсәтүче йолдыз булып тора. Хатын-кызлар, язгы чәчәкләр кебек, дөньяга шатлыкны, мәхәббәтне гәүдәләндерәләр, үзләренә гашыйк ир-атларны игелекле эшләргә илһамландыралар.

Француз язучысы Антуан де Сент-Экзюпери әйткәнчә, "без барыбыз да балачак иленнән". Һәркем үзен тудырган, иркәләп үстергән, тормышта туры юл күрсәткән әнисе йөзен үз күңелендә мәңге саклый. Кем генә, нинди телдә генә әйтмәсен, "әни" сүзе - җылы сүз, ул һәрчак ихтирам һәм рәхмәт хисләре белән әйтелә. Бу сүздә хатын-кызга Ходай үзе биргән сәләт - бала тудыру тылсымы чагыла.

Нәселне дәвам итүче һәм гаилә учагын саклаучы хатын-кызда бөек иҗади башлангыч саклана һәм ул үзенә карата кадер-хөрмәт һәм җаваплы мөнәсәбәт таләп итә. Моны аңлау безнең катлаулы заманда бик мөһим, чөнки кайвакыт хатын-кызлар, эмансипация дулкынына бирелеп, эш һәм карьераны гаилә учагыннан өстенрәк күрәләр.

Борынгы көнчыгышта: "Ир бала тәрбияләсәң - ир-ат тәрбиялисең, кыз бала тәрбияләсәң - милләт тәрбиялисең", - дигәннәр. Күпмилләтле халкыбызның тарихы лаеклы дәвам итүен теләсәк, без рухи кыйммәтләребезне буыннан буынга тапшыру өчен, балаларыбызда гаилә һәм никахка, ата-анага ихтирам тәрбияләү өчен бөтен шартларны тудырырга бурычлыбыз.

Республикада узган Гаилә елында әлеге юнәлештә күп эшләр башкарылды. Без җәмгыятебездә рухи мөмкинлекләрнең киң һәм күпкырлы икәнлеген күрдек. Татарстанда балаларның күбрәк тууы, ятим балаларны тәрбиягә алучы гаиләләр, өлкән кешеләргә ярдәм күрсәтүчеләр саны арту шуны дәлилләп тора. Биредә хатын-кызларыбызның роле дә бик зур.

Вакытлыча икътисадый кыенлыкларга кармастан, без алга таба да үзебезнең рухи мөмкинлекләребезне шулай нәтиҗәле рәвештә тормышка ашырырбыз, аларны игелекле гамәлләрдә чагылдырырбыз дип ышанам. Хөрмәтле хатын-кызларыбыз, ярдәмчел һәм юмарт булганыгыз өчен, йөрәгегез җылысы һәм күтәренке рухыгыз өчен зур рәхмәт сезгә!

Спорт һәм сәламәт яшәү елында спортчы хатын-кызларыбызга - Пекинда Бөтендөнья Олимпиадасында һәм башка халыкара, бөтенроссия һәм республика ярышларында җиңүчеләргә һәм катнашучыларга тирән ихтирам белдерәсем килә. Сез ир-ат атлетлар көнләшерлек югары уңышларга ирешәсез. Сезнең тырыш хезмәтегез һәм олы җиңүләрегез нигезендә газиз республикабызның спорттагы абруе югырырак күтәрелә, татарстанлылар, бигрәк тә яшьләр арасында физкультура һәм спорт популярлаша бара, 2013 елда Казанда узачак Бөтендөнья универсиадасы кебек гаять зур спорт ярышлары үткәрү мөмкинлеге туа. Безнең уңган хатын-кызларыбыз спортта әле тагын да югарырак нәтиҗәләр белән шаккаттырырлар дип өметләнәм.

Татарстан хатын-кызлары арасында барыбызга да үрнәк булырлык шәхесләр күп. Әмма Бөек Ватан сугышы вакытында фронтта һәм тылда җиңү өчен көрәшкән, сугыштан соңгы елларда илебезне коточкыч җимерекләрдән үз җилкәләрендә алып чыккан хатын-кыз ветераннарга хөрмәтебез аерата зур безнең. Сезнең батырлыгыгыз каршында без баш иябез. Сез барыгыз да, ир-ат ветераннар белән беррәттән, халкыбызның горурлыгы һәм вөҗданы дип аталырга хаклысыз. Бәхетле булыгыз, балаларыгызны, оныкларыгызны, оныкларыгызның балаларын акыллы киңәшләрегез, сөйкемле күз карашыгыз белән шатландырып озак-озак яшәргә язсын сезгә!

Бүгенге көндә республика эшчәнлегендә хатын-кызлар катнашмаган өлкә юктыр, мөгаен. Гүзәл затларыбыз дәүләт хакимияте һәм җирле хакимият органнары эшендә, эшкуарлыкта, банк хезмәтендә, фәндә һәм башка даирәләрдә көннән-көн активрак роль уйный башладылар. Хатын-кызларның иҗтимагый-сәяси позицияләре актив һәм җаваплы. Моны күптән түгел генә узган Татарстанның Дәүләт Советына сайлаулар тагын бер кат исбат итте. Аның яңа составына керүче хатын-кыз депутатлар Татарстан дәүләтчелеге үсешенә һәм республика алдында торучы бурычларны хәл итүгә үз өлешләрен кертер дип ышанам.

Һәрбер хатын-кыз иң ягымлы мактау сүзләренә, олы мәхәббәткә, ихтирамга һәм кайгыртуга лаек. Без, ир-атлар, бүген сезгә гел йөрәктә саклап йөрткән иң назлы сүзләребезне аеруча дулкынланып әйтәбез.

Бәхетле һәм сөекле булыгыз! Балалар һәм оныклар куанычын күреп яшәргә насыйп булсын. Тыныч тормыш, сәламәтлек, игелек һәм муллык телим сезгә, кадерле хатын-кызлар!