Минтимер Шәймиев Татарстанның халык шагыйре Равил Фәйзуллинны 70 яшьлек юбилее белән котлады

Бүген Муса Җәлил исемендәге Татар дәүләт опера һәм балет театрында Татарстанның халык шагыйре, ТРның Г.Тукай исемендәге Дәүләт премиясе лауреаты, Россиянең атказанган мәдәният хезмәткәре Равил Фәйзуллинның 70 яшьлек юбилеена багышланган кичә узды. Юбилярны котларга ТР Дәүләт Киңәшчесе Минтимер Шәймиев, дуслары, коллегалары, аның иҗатын яратучылар килде.

Бу кичәдә Равил Фәйзуллинны беренче булып Минтимер Шәймиев котлады. Ул әлеге кичәне “поэзия бәйрәме” дип атады. “Моның бер мәгънәле сәбәбе бар: бу – халыкның хөрмәтле шагыйре Равил Фәйзуллинның 70 яшьлек юбилее”, - дип, ТР Дәүләт Киңәшчесе әдипнең иҗат юлын “җидедәге – җитмештә” дигән ике сүз белән әйтеп булуын белдерде. “Бу егет – безнең Халык шагыйребез мәктәп елларыннан башлап шигырь язган укучы бала. Менә шуннан башланган иҗат ул”, - диде М.Шәймиев. “Нинди мәгънәле, нинди эчтәлекле, йөрәккә үтеп керерлек синең шигырьләрең. Боларны укырга да, укырга, тыңларга да тыңларга, төшенергә дә кирәк. Чөнки заманы шундый: безгә сезнең һәм башка язучыларның иҗатларында заман куйган күп сорауларга җавап табарга тырышырга кирәк. Ул җаваплар анда бар”, - дип бәяләде әдипнең иҗатын ТР Дәүләт Киңәшчесе, кыска юллар аша да аның тирән фикерләргә этәрүен билгеләп үтеп.

“Равил Фәйзуллин – республикабызны бөтен дөньяга таныткан горурланырлык егетләребезнең берсе”, - дип, ТР Дәүләт Киңәшчесе моның өчен аңа баш иеп, рәхмәтен җиткерде. “Казан утлары” журналы баш мөхәррире буларак, Равил Фәйзуллин баш шагыйрьләрнең дә иҗатларын да халыкка җиткерү белән шөгыльләнгән кеше дә. Бүген юбилей кичәсе булса да, теләк-тәкъдимнәрсез дә булмады – М.Шәймиев әлеге журналның эшчәнлеген көчәйтеп җибәрергә киңәш итте.

Минтимер Шәймиев Равил Фәйзуллинга Татарстан Президенты Рөстәм Миңнеханов исеменнән котлаулар һәм автомобиль ачкычы тапшырды.

Котлаулар Равил Фәйзуллин сүзләренә язылган җырлар, музыкаль номерлар һәм ТР Дәүләт җыр һәм бию ансамбле артистлары башкаруында биюләр белән аралаштырылып барды.

Юбилярны шулай ук Төркиянең тел белгече Мостафа Өнәр, Башкортстан шагыйре Равил Бикбаев,Мәскәүдә яшәүче милләттәшебез Равил Мирхәйдәров, ТР Язучылар берлеге рәисе Рафис Корбан, Кабарда-Балкария шагыйре Муталиб Бикбаев һ.б. котлады.

Габдулла Тукай шигырьләре аша татар телен өйрәнгән Мостафа Өнәр, күп милләттәшләребезгә үрнәк булырлык итеп, фикерләрен туган телебездә җиткерде. Татар телен өйрәнүдә беренче укытучым - бөек татар шагыйре Габдулла Тукай булса, икенчесе - “Казан утлары” журналы, диде ул.

Равил Мирхәйдәров, Равил Фәйзулинны бик югары бәяләп, аның кан тамырларында “шагыйрь каны” агуын билгеләп үтте. Аның бөтен гомере сәнгать белән бәйләнештә узуын, шуның белән бөтен дөньяның хөрмәтен казануын билгеләп үтте.

Юбилярны шулай ук аның замандашлары – атаклы шагыйрьләр: Ренат Харис, Рәдиф Гаташ, Гәрәй Рәхим котладылар.

Кичәнең ахырында Равил Фәйзуллин үзенең шигырьләрен укыды, котлаулар өчен барысына да рәхмәт белдерде.