Минтимер Шәймиев Татарстан дәүләт хезмәте ветераннарын Халыкара өлкәннәр көне белән котлады
Бүген Казан Ратушасында Татарстан Республикасы Дәүләт Киңәшчесе, Россия Федерациясе Хезмәт Герое Минтимер Шәймиев республика дәүләт хезмәте ветераннары белән очрашты. Очрашу 1 октябрьдә билгеләп үтелә торган Халыкара өлкәннәр көненә багышланды.
Тантаналы чарада ТР Дәүләт Советы Рәисе Фәрит Мөхәммәтшин, ТР Рәисе Администрациясе Җитәкчесе Әсгать Сәфәров, ТР Премьер-министры урынбасары - ТР Министрлар Кабинеты Аппараты Җитәкчесе Шамил Гаффаров, шулай ук иҗтимагый ветераннар оешмалары вәкилләре катнашты.
Минтимер Шәймиев ТР Дәүләт хезмәте ветераннарын бәйрәм белән котлады һәм Татарстан файдасына күпьеллык намуслы хезмәтләре өчен рәхмәт белдерде. "Эшли белгән, хезмәтне оештыра белгән һәм хезмәт итүчеләргә хөрмәт күрсәткән Татарстанга рәхмәт. Күп милләтле халкыбызның бердәмлеге һәм үзара аңлашуы аркасында, Татарстан хәзерге вакытта Россиянең әйдәп баручы республикаларының берсе булып тора. Республиканың бүгенге казанышлары – сезнең хезмәт нәтиҗәсе. Без ел саен монда җыелабыз, бер-беребезгә ачык йөз һәм эчке горурлык белән карыйбыз, матур мөнәсәбәтләрне саклыйбыз. Мин үз киңәшләребез һәм тәҗрибәбез белән киләчәктә дә, мөмкин булганча, туган Татарстанга ярдәм итәрбез, дип өметләнәм. Без һәрвакыт сөйләшәбез: «Мы можем!» - «Без булдырабыз!» шулай ул", – диде Татарстанның беренче Президенты.
Татарстанның социаль-икътисадый үсешенә зур өлеш керткән ветераннарны котлап, ТР Дәүләт Советы Рәисе Фәрит Мөхәммәтшин болай диде: "Сез туган Татарстан өчен төрле дәүләт һәм җәмәгать постларында күп эш башкардыгыз, үз хезмәтегез белән сез язмышны үзгәртә торган казанышларга нигез салдыгыз, без бүген дә аларның нәтиҗәләре белән горурланабыз. Сезнең эшкә тугрылыгыгыз һәм туган җирегезне чиксез яратуыгыз республикага заманча үсеш дәрәҗәсенә ирешергә, күп юнәлешләр буенча алдынгы урыннарны алырга мөмкинлек бирде». Ул шулай ук билгеләп үткәнчә, яшенә һәм лаеклы ялга карамастан, күп кенә ветераннар иҗтимагый палата һәм советлар составына кереп, үзләренең бай һөнәри тәҗрибәләре белән уртаклашуларын дәвам итәләр. "Сез - безнең ышанычлы активыбыз, республиканың алтын фонды, - дип ассызыклады парламент җитәкчесе, - сез безнең яшь буынны тәрбияләүдә ышанычлы союздашларыбыз". Фәрит Мөхәммәтшин республиканың дәүләт хезмәте ветераннарына дәүләт бүләкләре тапшырды. «Дуслык» ордены белән ветераннар (пенсионерлар) төбәк иҗтимагый оешмасының республика советы рәисе Хәбир Иштирәков бүләкләнде.
«Татарстан Автономияле Совет Социалистик Республикасы оешуга 100 ел» медальләренә Галина Лоцманова һәм Рәмзия Сәгиева лаек булдылар. Очрашу республиканың танылган артистлары һәм иҗат коллективлары концерты белән дәвам итте.
Очрашу ахырында барлык катнашучылар, ТР Дәүләт Киңәшчесе Минтимер Шәймиев һәм ТР Халык артисты Салават Фәтхетдинов белән бергә, «Мин яратам сине, Татарстан!» җырын башкардылар.