Минтимер Шәймиев Леонид Рошаль белән очрашты

Бүген Казан Кремлендә ТР Дәүләт Киңәшчесе, "Яңарыш" фондының Попечительләр советы рәисе Минтимер Шәймиев Россиянең танылган педиатры һәм хирургы, җәмәгать эшлеклесе, профессор, медицина фәннәре докторы, Мәскәүнең кичектергесез балалар хирургиясе һәм травматологиясе фәнни-тикшеренү институты директоры Леонид Рошаль белән очрашты.

Леонид Рошаль Казанга "Ел табибы - Ак чәчәкләр" республика конкурсында җиңүчеләрне бүләкләү тантанасында катнашу өчен килде. Ул шулай ук Татарстандагы беренче балалар хосписын карарга планлаштыра.

"Минем Татарстанны яратуым сер түгел, тормышымда Татарстан белән бәйле истәлекләр шактый күп. 1941 елда мин Чистайда мәктәпкә укырга кердем. Сездә медицина бик көчле, сез яхшы кадрлар әзерләгәнсез. Әмма һәр чорның - үзенеке, һәрчак яхшыдан яхшы булуын телибез. Татарстанда сәламәтлек саклауга күрсәткән игътибар - үрнәк алу өчен мисал. Татарстанда бик күп яңа һәм кызыклы эшләр башкарыла", - дип билгеләде Леонид Рошаль.

Минтимер Шәймиев кунакка республикага ярдәм иткән өчен рәхмәт белдерде: "Иң мөһиме, сезнең Медицина хезмәткәрләре көне алдыннан килүегез. Һәрвакыт сез Казанга килгәндә яисә төрле форумнарда очрашканда, сугыш елларын искә алып, Татарстанга рәхмәт белдерәсез, ул вакытта республика күп кешене үзенә кабул итте", - диде Минтимер Шәймиев.

Очрашуда ТР Дәүләт Советы Рәисе урынбасары, "Яңарыш" фондының башкарма директоры Татьяна Ларионова, ТР сәламәтлек саклау министры Гадел Вафин, “Татарстан Республикасы медицина хезмәткәрләре ассоциациясе” президенты Ирина Питулова катнашты.