Минтимер Шәймиев Ирина Влах белән очрашты

Бүген Казан Кремлендә Татарстан Республикасы Дәүләт Киңәшчесе, “Яңарыш” фонды Попечительләр Советы рәисе Минтимер Шәймиев Молдавия Республикасының Гагаузия автоном-төбәк берәмлеге башлыгы Ирина Влах белән очрашты.
Очрашуда шулай ук ТР Премьер-министрының беренче урынбасары Алексей Песошин, Гагаузия делегациясе әгъзалары катнашты.

Ирина Влах Минтимер Шәймиевкә очрашу һәм Гагаузиягә даими ярдәме өчен рәхмәт белдерде.
“Без Сезне Татарстан Республикасы һәм гагаузия арасындагы үзара мөнәсәбәтләрне башлап җибәрүче дип саныйбыз. 1999 елның май аенда Сез безнең беренче килешүне имзаладыгыз. Без моны бик яхшы хәтерлибез. Бу чынлап та беренче, безнең өчен бик мөһим адым иде. Сезнең җиңел кул белән болар барысы да дәвам итте һәм менә 16 ел инде без сезнең белән хезмәттәшлек итәбез һәм бу безнең автономия халкы тарафыннан бик уңай кабул ителә”, - диде ул.

Минтимер Шәймиев кунакларга Татарстанның федераль үзәк белән мөнәсәбәтләр төзүдә тәҗрибәсе турында сөйләде, бу тәҗрибә Гагаузия өчен дә файдалы булырга мөмкин.

Ирина Влах билгеләгәнчә, гагаузлар автономияне сугышларсыз гына ала алган. “Мин барлык элемтәләрне яңадан барлап, бергә эшләрбез дип ышанам. Без икътисади, сәүдә, фәнни, мәдәни хезмәттәшлеккә өметләнәбез”, - дип ассызыклады ул.

Минтимер Шәймиев шулай ук кунакларга “Мәдәни мирас: борынгы Болгар шәһәре һәм Зөя утрау-шәһәрлеге” мәдәни-тарихи проект һәм “Яңарыш” фондының эшчәнлеге турында сөйләде. Һәм бу шәһәрләрне җәйге айларда килеп күрергә чакырды.

Бүген Гагаузия делегациясе әгъзалары КФУның Фундаменталь медицина һәм биология институтының уку-лаборатория кампусында, “Эйдос” медицина симуляторларының төбәк инжиниринг үзәгендә, “Казан” агросәнәгать паркында, Татарстанның дәүләтчелек музеенда булды.
Шулай ук татарстан Президенты Рөстәм Миңнеханов белән очрашу узды. Татарстан Республикасы белән Гагаузия арасында сәүдә-икътисадый, фәнни-техник һәм мәдәни хезмәттәшлек буенча чаралар планы имзаланды. 

Кунаклар алга таба “Химград”технополисында, “Татспиртпром” ААҖ музей-кибетендә булачак һәм С.Сәйдәшев исемендәге зур концертлар залында ТР Дәүләт симфоник оркестры концертын караячак.