Шәймиев Болгар ислам академиясе төзелеше буенча киңәшмә уздырды
Бүген Казан Кремлендә ТР Дәүләт киңәшчесе, “Яңарыш” фонды Попечительлек советы рәисе Минтимер Шәймиев Болгар ислам академиясен төзү мәсьәләләре буенча киңәшмә уздырды.
“Эшләр график буенча бара. Төзелеш эшләрен җәйгә тәмамлау планлаштырылганга, вакыт исәбе безнең барыбыз өчен дә сәгатьләп билгеләнгән. Хәзер барлык мәсьәләләрне дә хәл итеп, нинди дә булса җитешсезлекләр юкмы, дип тикшерер вакыт җитте. Бу елларда без үзара аңлашып эшләдек, һәм хәзер дә бөтен ихтыярны, сәләтебезне, талантыбызны кышкы чорга нормаль керү өчен буйсындыра алырбыз дип ышанам. Бу академия төзелеше процессында катнашучы барлык структураларга, оешмаларга кагыла”, - дип билгеләде Минтимер Шәймиев киңәшмә башланганда.
Хәзерге вакытта комплексның уку һәм торак корпуслары түбә астына кертелгән. Киңәшмәдә катнашучылар биналар бизәлеше, коммуникацияләргә тоташтыру, академия тирәсендә уңайлыклар булдыру, шул исәптән комплекс белән Ак мәчет арасында җимеш бакчасы утырту мәсьәләләре хакында фикер алыштылар. Киңәшмә барышында шулай ук Болгарда “Кол Гали” кунакханә комплексы төзелешендә дә шундый ук мәсьәләләр каралды.
Бүгенге киңәшмәдә ТР Дәүләт Советы рәисе урынбасары, “Яңарыш” фонды башкарма директоры Татьяна Ларионова, “ТР Президенты карамагындагы Дәүләт торак фонды” башкарма директоры Тәлгать Абдуллин, ТР мөселманнары Диния нәзарәте рәисенең беренче урынбасары Рөстәм Батров, ТР Президенты Аппараты җитәкчесе урынбасары – ТР Дәүләт киңәшчесе секретариаты җитәкчесе Олег Глебов катнашты.
Белешмә өчен:
2015 елның 4 ноябрендә Татарстан Президенты Рөстәм Миңнехановның “Болгар ислам академиясен төзү һәм Казан Мәрьям Ана иконасы соборын торгызу турында”гы указы имзаланды.
ТР Министрлар Кабинетының 2016 елның 25 март күрсәтмәсе белән Болгар ислам академиясен төзү буенча чаралар планы расланды һәм шуның буенча оештыру комитеты булдырылды.
2016 елның 21 маенда – Идел буе Болгар дәүләтенең ислам динен рәсми кабул иткән көнне, ТР Президенты Рөстәм Миңнеханов катнашында академия төзисе урынга киләчәк буынга мөрәҗәгать язылган капсулалы истәлек ташы куелды.
Болгар ислам академиясе илнең мөселман өммәтенең интеллектуаль элитасын – ислам дине тәгълиматлары магистрлары һәм докторлары әзерләү белән шөгыльләнәчәк. Анда шулай ук өстәмә белем алу мөмкинлекләре дә булдырыла.
Болгар ислам академиясе структурасы шулай ук Россия мөселман галимнәре берлеген, Мөселман дин эшлеклеләре өчен фәнни-мәгариф үзәкне, Болгар ислам китапханәсен, Составында күренекле мөселман галимнәре булган эксперт советын, Татар дини мирасны өйрәнү үзәген үз эченә алачак.