ЯҢАЛЫКЛАР

Йөк автомобильләре зачетында "Дакар" марафон ралли-рейдының гамәлдәге чемпионы Фирдәвес Кәбиров кичә "Дакар-2010" этабында икенче тапкыр җиңү яулады. Кәбиров тугызынчы этапта гомуми зачетның лидеры һәм команда буенча иптәше Владимир Чагинны артта калдырды.

Томан булу сәбәпле оештыручылар Копьято һәм Ла Сирена арасындагы этапта махсус участокның старт вакытын күчерде, шулай ук махсус участокны ике мәртәбә диярлек (338 чакрымнан 170 километрга кадәр) кыскартты.

11 гыйнвар көнне Татарстан Республикасы Президенты Минтимер Шәймиев "Мәгариф турындагы" Татарстан Республикасы Законына үзгәрешләр кертү турындагы" Татарстан Республикасы Законына кул куйды.

Татарстан синоптиклары фаразлавынча, иртәгә республикада болытлы һава, кар явуы көтелә. Белгечләр температураның шактый түбәнәюе хакында кисәтә. 12 гыйнварда төнлә һәм көндез 23-26 градус салкын көтелә.

2009 елда Россиядә нефть һәм газоконденсат табышы 1,2 процентка арткан һәм 494,228 млн. тонна тәшкил иткән. Бу мәгълүматларны "ЦДУ ТЭК" оператив сводкасына сылтама белән "Интерфакс" хәбәр итә. Декабрьдә Россия 42,494 млн. тонна нефть җитештергән. Узган айда бер тәүлектә чыгарылган нефтьнең уртача күләме 10,048 млн. баррель тәшкил итә.

"Роснефть" бер елда 116,286 млн. тонна нефть тапкан, "ЛУКОЙЛ" - 92,179 млн. тонна, "ТНК-BP Холдинг" - 70,236 млн. тонна, "Сургутнефтегаз" - 59,634 млн. тонна, "Газпром нефть" - 29,880 млн. тонна, "Татнефть" - 26,107 млн. тонна (в декабре - 2,216 млн. тонна), "Славнефть" - 18,894 млн. тонна, "Русснефть" - 12,688 млн. тонна.

Быелның гыйнвар-апрель айларында республикабызда "Татарстан" дип исемләнгән, балалар һәм яшүсмерләр иҗаты фестивале-бәйгесе узачак. Чараны ТР Мәдәният министрлыгы ТАССР оешуына 90 ел тулуга багышлап оештыра.

Конкурс ел саен уздырылып килә. Чара мәдәният һәм сәнгать өлкәсендә балаларга өстәмә һәм урта махсус һөнәри белем бирү системасын күтәрү, яшь сәләтле башкаручыларга ярдәм итү, классик һәм милли сәнгать традицияләрен саклау һәм үстерү максатын күздә тота. Шунысы үзенчәлекле: фестиваль сәнгатьнең барлык жанрларын колачлый. Анда музыка (уен коралларында уйнау, вокал, ансамбльләр һәм оркестрлар), нәфис (рәсем сәнгате, графика, дпи, дизайн), хореография (классик, халык, эстрада биюләре), театр кебек юнәлешләрдә ярышып булачак. Бәйгедә 6 яшьтән алып 20 яшькә кадәрге яшь талантлар катнаша ала.

Рәссамнар һәм фотографлар, декоратив-гамәли сәнгать осталары иҗатын бәяләүчеләр өчен февраль ае "Арт-галерея. Казан" икенче махсуслаштырылган күргәзмәсе белән истә калачак.

10-14 февраль көннәрендә узачак әлеге традицион күргәзмә экспозициясе быел да "Казан ярминкәсе"нең ике павильонында урын алачак. Анда рәсем сәнгате әсәрләре һәм репродукцияләр, скульптуралар, фотографияләр белән беррәтттән, яңа иҗат коллективлары һәм проетлары, галерияләр, берлекләр, студияләр, сәнгать салоннары турында тулы мәгълүмат биречәк. Быелгы күргәзмәдә аерым рәссамнар, иҗат төркемнәре һәм берләшмәләре, музейлар һәм галереяләр, һөнәри уку йортлары, багет остаханәләре катнаша.

Гус Хиддинк белән Корбан Бердыев Халыкара футбол тарихы һәм статистикасы федерациясе - IFFHS тарафыннан төзелгән дөньяның иң яхшы футбол клубы тренерлары исемлегендә кертелгән. Әлеге федерациянең рәсми сайтында күрсәтелгәнчә, 85 ил экспертларының Россиянең җыелма командасы баш тренеры, узган елның язында Лондонның "Челси" клубына җитәкчелек иткән Г.Хиддинк 38 очкосын, Казанның "Рубин" клубы баш тренеры К.Бердыев 14 очкосын "җыя" алган.

Татарстан Республикасы Президенты Минтимер Шәймиев православие динендәге татарстанлыларны Раштуа бәйрәме белән котлады.

Башкала урамнарын кардан чистарту дәвам итә. Төнлә Казан урамнарыннан көндезгегә караганда кар 2,5 тапкырга күбрәк чыгарылды, дип хәбәр итә Казан шәһәре Башкарма комитетының матбугат хезмәте.

Бүген шәһәр урамнарын чистарту эшенә 700 берәмлеккә якын техника җәлеп ителгән. Кар төягән 300 гә якын үзбушаткыч шәһәр читенә 4 мең рейс ясаган. Шулай итеп, узган бер тәүлек эчендә башкала урамнарыннан кар эретү камерасына һәм кар полигоннарына 20 мең тоннадан артык кар ташылган. Шәһәрне чистарту эшләренең төп өлеше транспорт хәрәкәте интенсивлыгы кимегән чорда - төнлә алып барыла. 4 гыйнвар көндез Казан урамнарыннан 5500 тоннадан артык кар чыгарылган булса, төнлә ташылган кар күләме 14 мең 500 тонна тәшкил иткән. Ягъни бу көндезге нормадан 2,5 тапкырга күбрәк. "Водоканал" МУП нең кар эретү камерасы инде берничә тәүлек үзенең мөмкинлекләре чигендә эшли. Тәүлек саен биредә 1500-2000 тоннага якын кар эретелә.

Тәүлек әйләнәсендә кар ташылуга карамастан, әле Казан урамнарында һәм ишегалларында кар көртләрен очратырга була. Казан шәһәре Башкарма комитеты җитәкчесе Рафис Борһанов юлчылар алдына киләсе атна башына - укучылар һәм өлкәннәрнең Яңа ел каникуллары тәмамлануга юлларны көртләрдән максималь чистартып бетерү бурычын куйды. Алар яллардан чыгу белән, юлларда транспорт хәрәкәтенең интенсивлыгы тагын да артачак.

8 гыйнварда "Казан ярминкәсе" күргәзмә үзәге территориясендә бал ярминкәсе узачак, дип хәбәр итә "Казан ярминкәсе" күргәзмә үзәгенең матбугат хезмәте.

Мондый зур чарада Россиянең иң яхшы 50 умартачысы катнаша. Алар Ростов өлкәсе, Мари Эль Республикасы, Удмуртия Республикасы, Краснодар крае, Ерак Көнчыгыш, Төньяк Осетия, Татарстаннан балның 100 дән артык төрен тәкъдим итәчәк.

Ярминкәдә сәрви агачы, юкә, көнбагыш чәчәге, кыр үләннәре балларын сатып алу мөмкинеге булачак. Шулай ук кәстәнә чәчәге, курай үләне, кырлыган, эвкалипт баллары да тәкъдим ителәчәк.