ЯҢАЛЫКЛАР

Владимир Чагин идарәсендәге "КАМАЗ-Мастер" "Дакар-2010" ралли-рейды марафонында икенче тапкыр рәттән җиңү яулады. Чагин узышның өченче этабында йөк экипажларының барысыннан да алдан махсус участокны узды.

Ралли-рейдның өченче көнендә узышчылар Кордобадан Ла Риохага кадәр барырга тиеш иде. Бу махсус участокның озынлыгы җиңел һәм йөк машиналары өчен 355 километр, ә мотоциклчылар өчен 294 километр тәшкил итә иде. Оештыручылар һава шартлары нәтиҗәсендә Кордоба тирәсендә автомобильләрнең старт алуын кичектереп торды, әмма маршрутны кыскартмадылар.

Владимир Чагин махсус участокны 4 сәгать, 35 минут һәм 7 секундта узды. "Дакар" чемпионы Фирдәвес Кәбиров Чагиннан 2 минут 47 секундка гына артта калды.

Татарстан Республикасы Президенты Минтимер Шәймиев Татарстанда яшәүчеләрне Яңа ел белән тәбрик итте.

Татарстан Республикасы Президенты Минтимер Шәймиев "2009 елга һәм 2010-2011 елгы план чорына "Татарстан Республикасы Мәҗбүри медицина иминияте фонды бюджеты хакында" Татарстан Республикасы Законына үзгәрешләр кертү турында"гы Татарстан Республикасы Законына кул куйды, дип хәбәр итә республика башлыгының матбугат хезмәте.

29 декабрь көнне Татарстан Президенты Минтимер Шәймиев "2009 елга һәм 2010-2011 елгы план чорына Татарстан Республикасы бюджеты хакында" Татарстан Республикасы Законына үзгәрешләр кертү турында"гы ТР Законына кул куйды.

29 декабрьдә республиканың мәдәни даирәсендә зур бәйрәм. "Казан" милли мәдәният үзәге каршындагы мәйданда, Татарстанның иң яхшы мәдәният учреждениеләренә һәм макталган мәдәният хезмәткәрләренә бүләкләр бирелү уңаеннан, театральләштерелгән тантана булды.

Төгәлрәге, ТР Хөкүмәте исеменнән республика һәм район, шәһәр муниципаль берәмлекләре мәдәният учреждениеләренә, 27 "Fiat Ducato" һәм 6 "НефАЗ" автобуслары ачкычларын, мәдәният һәм сәнгать, кинематография учреждениеләренең 62 хезмәткәренә грантлар тапшыру өчен ТР Премьер-министры Рөстәм Миңнеханов, ТР Премьер-министры урынбасары - мәдәният министры Зилә Вәлиева килде.

Кыш бабай кулындагы нәни чыршыга эленгән автобус ачкычларын учреждение директорлары кулына тапшырганчы, республика Хөкүмәте башлыгы үзенең чыгышында инде соңгы көннәрен санаган 2009 ел ахыргы 10 елда иң авыры булды, дип искәртте. "Шулай да, әлегәчә беркайчан да мондый бүләк ясаганыбыз юк иде: сәламәтлек, хокук һәм җәмәгать тәртибе сагындагылар күз уңындарак булды, мәдәният өлкәсе читтәрәк кала килде. Аның каравы, бүген әнә нинди зур шатлык", - дип белдерде.

Р.Миңнеханов кулыннан республика бүләген кабул итеп алган Татарстанның 16 шәһәр һәм районыннан 62 номинант 4 номинациядә билгеләп үтелде. Аерым алганда, тармак үсешенә зур өлеш керткән 8 учреждение җитәкчесе "Иң яхшы җитәкче" (100 мең сум), кимендә 20 ел шушы өлкәдә эшләп коллектив эшенә зур өлеш керткән 21 зат "Таяныч һәм дәрәҗә" (50 мең сум) номинацияләре буенча бүләкләнде. "Перспектива" (30 мең сум) номинациясендә исә 30 яшькә кадәргеләрнең күп дигәндә 7 ел эчендә зур нәтиҗәләргә ирешкән 16 яшь талант, ә "Профессионал" (70 мең сум) номинациясендә югары һөнәри осталыкка ирешкән һәм тармак үсешенә сизелерлек өлеш керткән 17 зат грант алды.

29 декабрьдә Казан Кремлендә ТР Президенты Минтимер Шәймиев Россия-2009 Кубогында җиңүләре уңаеннан “Зенит-Казан” волейбол клубы әгъзалары белән очрашты.

"Алабуга" махсус икътисади зонасындагы инфраструктура объектларының беренче чираты 2010 елда төзелеп бетәчәк. Бүген "Махсус икътисади зоналар" ААҖ генераль директоры Евгений Метельский ТР Министрлар Кабинетында махсус икътисади зоналарны үстерү мәсьәләләренә багышланган киңәшмә тәмамланганнан соң әнә шулай дип белдерде.

Е.Метельский хәбәр иткәнчә, бүгенге көндә "Алабуга" махсус икътисади зонасының беренче чираты 95 процентка әзер. "Без 2010 елда беренче чиратны төзү эшләрен тулысынча төгәлләргә һәм икенчесен төзи башларга ниятлибез. Проектлау эшләре тәмамлану стадиясендә һәм икенче чиратны төзү эшләрен башлау өчен мөмкинлекләребез бар", - дип ассызыклады Евгений Метельский.

5,6 һәм 8,9 гыйнвар көннәрендә С.Сәйдәшев исемендәге Дәүләт Зур концерт залында нәниләр өчен раштуа балы уза. ТР Дәүләт симфоник оркестры Казан дәүләт консерваториясенең опера студиясе катнашында "Золушка" кинофильмыннан совет композиторы Антонио Спадавеккиа музыкасын кулланып әкият сөйләячәк.

Музыкаль-театральләштерелгән тамашада балалар үзләрен анда катнашучылар итеп тойсын өчен уен элементлары кертелгән. Фойеда нәни кунакларны бәйрәм чыршысы әйләнәсендәге балга чакыручы әкият персонажлары көтәчәк.

30 декабрьдән башлап 10 гыйнварга кадәр Татарстанның Милли музее хәйрия максатыннан Яңа ел чыршысы бәйрәмнәрен үткәрә. "Әкияттә - кунакта" дип исемләнгән күргәзмә кысаларында 30 декабрьдә иртәнге 10 сәгатьтә "Здравушка" тернәкләндерү үзәгендә тәрбияләнүче балаларны Кыш бабай белән Кар кызы яңа ел белән котлаячак. 8 гыйнварда 10 сәгатьтә бәйрәмгә "Гаврош" балалар йортында тәрбияләнүчеләр, 12 сәгатьтә Казанның Идел буе районы балалар йорты сабыйлары чакырыла. 10 гыйнварда 12 сәгатьтә әкияткә кунакка Киров районы Балалар йортыннан нәниләр киләчәк.

Бу көннәрне балалар төрле халыкларның әкиятләренә сәяхәт кылачак. Кыш бабай белән Кар кызы балаларны тылсымлы әкият дөньясына алып керәчәк. Сабыйлар Емеля, аның миче, чуртан балыгы, татар әкияте герое Айтуган белән очрашачак. Кыш бабай остаханәсендә исә Яңа ел чыршысына бизәкләрне, уенчыкларны, открыткаларны үз кулы белән ясарга мөмкин булачак. Бу турыда Милли музейның матбугат хезмәте җиткерә.

28 декабрь көнне Казанның "Корстон" кунакханә сәүдә-күңел ачу комплексында Татарстан Республикасы Президенты Минтимер Шәймиев һәм ТР Премьер-министры Рөстәм Миңнеханов катнашында "Ел җитәкчесе - 2009" Республика иҗтимагый конкурсында җиңүчеләрне бүләкләү тантанасы булды.