ЯҢАЛЫКЛАР

ТРда 3 млн. 892,2 мең тонна ашлык җыеп алынган. 1 млн. 382,7 мең гектар ашлык суктырылган, бу планлаштырылган күләмнең 87 процентын тәшкил итә. Бу хакта "Татар-информ" агентлыгы хәбәрчесенә ТР Авыл хуҗалыгы һәм азык-төлек министрлыгында белдерделәр.

ТР Дәүләт Советы рәисе, "Бердәм Россия" партиясе төбәк бүлегенең Сәяси советы секретаре Фәрит Мөхәммәтшин иртәгә - 27 августта ТР Сәүдә-сәнәгать палатасында "Әниләр киңәш итә" дип аталган акциядә катнаша. Акциянең максаты - балалар үсеше өчен кирәк булган товарларны һәм продуктларны барлау.

Узган атнада Мәскәү өлкәсенең Жуковский шәһәрендә "МАКС-2009" халыкара авиакосмик салоны үз эшен тәмамлады. Быелгы авиакосмик салонда Татарстанның 15 предприятиесе үз продукциясен тәкъдим итте. Алар арасында Горбунов исемендәге Казан авиация-җитештерү берләшмәсе, Казан мотор төзү җитештерү берләшмәсе, "Казан вертолет заводы", "Вертолет-Медиа", "ГипроНИИавиапром", "Электроприбор", "Радиоприбор", "Элекон", Казан электр техникасы заводлары бар иде. ТР сәнәгать һәм сәүдә министры Равил Зарипов, кризиска карамастан, Татарстан предприятиеләре быелгы салонда уңышлы чыгыш ясады дип исәпли.

Татарстанда 1 нче сентябрьдә 2172 урынга исәпләнгән 8 мәктәп (2 мәктәп балалар бакчасы бергә урнашкан) үз ишекләрен ачачак. Элегрәк елларда бу күрсәткеч 20-30га җитә иде. Бу хакта бүген ТР Министрлар Кабинетында узган матбугат очрашуында ТР Мәгариф һәм фән министры урынбасары Айрат Зиннуров хәбәр итте.

26 августта Татарстан Президенты Минтимер Шәймиев Буа муниципаль районына эш сәфәре кылды.

Казанда 1 сентябрь көнне беренче тапкыр яңа уку елына багышланган бәйрәм уздыру көтелә. Башкарма комитетның Мәдәният идарәсе башлыгы Динара Камалиева сүзләренчә, анда шәһәребезнең талантлы балалары һәм яшьләре, Казан дәүләт консерваториясе студентлары һәм музыка мәктәпләре укучылары катнаша.

25 августта ТР Министрлар Кабинетында Татарстан мәгариф учреждениеләренең яңа уку елына әзерлеге турында сөйләштеләр.

Татарстан Республикасы Президенты Минтимер Шәймиев адресына Россиянең Чирәмдәге хоккей федерациясе президенты Сергей Чеченковтан хат килде, анда Уэльста узган Ауропа чемпионатында (Трофи) Россиянең җыелма командасы 2 урынны алды, дип хәбәр ителә.

25 августта Казанның 1 Май мәйданында каһарман-шагыйрь Муса Җәлилне һәм аның көрәштәшләрен искә алу уңаеннан Хәтер митингы узды. Ватаныбыз һәм татар халкы азатлыгы өчен башларын салган Җәлилгә һәм җәлилчеләргә баш ияргә бүген республика хөкүмәте вәкилләре, танылган шагыйрьләр, язучылар, сәнгать, җәмәгать эшлеклеләре, сугыш ветераннары, Җәлил иҗатын яратучы милләттәшләребез килгән иде.

25 августта Татарстан башкаласында "Очрашу урыны-Казан" традицион сәүдә-сәнәгать күргәзмәсе 17 нче тапкыр ишекләрен ача. 25 августтан 29 ына кадәр эшләячәк ярминкәне ТР Сәнәгать һәм сәүдә министрлыгы, Сәүдә-сәнәгать палатасы, Казан мэриясе һәм "Казан ярминкәсе" оештыра. Быелгы ярминкә Кече сәнәгать, һөнәри белем, авыл хуҗалыгы буенча уздырылучы халыкара күргәзмәнең 100 еллыгына багышлана.