ЯҢАЛЫКЛАР

Кичә Г.Камал исемендәге Татар дәүләт академия театры бинасында Казан дәүләт мәдәният һәм сәнгать университетын тәкъдир итү тантанасы булды. Анда Татарстан Республикасы Президенты М.Шаймиев бу яңа университетны югары статус алуы белән котлады һәм әлеге уку йортында озак еллар эшләгән бер төркем педагогларга Татарстан Республикасының Мактау Грамоталарын һәм мактаулы исем бирү турындагы таныклыкны тапшырды.
Кичәдә ТР вице-премьеры З.Вәлиева, Дәүләт Советы Рәисе урынбасары Р.Миңнуллин һәм башка рәсми кешеләр катнашты.

22 ноябрьдә Татарстан Сэүдә-сәнәгать палатасында "Төбәктә кәсәбәчелекне үстерүдә Сәүдә-сәнәгать палатасының ролен күтәрү турында "түгәрәк өстәл" булып узды. Аның эшендә Татарстан Президенты Минтимер Шәймиев, Россия Сәүдә-сәнәгать палатасы президенты Евгений Примаков, республика министрлыклары һәм ведомстволары җитәкчеләре, олы, урта һәм кече эшмәкәрлек вәкилләре катнашты.

20 ноябрьдә Татарстан Президенты Минтимер Шәймиев "Бердәмлек һәм Ватан"- "Бердәм Россия" Бөтенроссия партиясе Югары Советы утырышында катнашты. Утырышта Россиянең икътисадый һәм социаль хәленә, илнең сәяси тормышында партиянең роленә һәм урынына кагылышлы актуаль проблемалар, партиянең эчке эшенә караган мәсьәләләр тикшерелде. РФ Дәүләт Думасына һәм Россиянең кайбер субъектларында булачак региональ сайлауларга әзерлек уңаеннан, стратегиягә һәм агымдагы бурычларга кагылышлы чаралар эшләп тормышка ашыруда партиянең ролен көчәйтү кирәклеге әйтелде. Шул максатларда партиянең әлеге процессларга йогынтысын көчәйтергә карар кылынды. Югары Совет партиянең дүртенче рәистәшен сайлады. Ул - Россия эчке эшләр министры Б.В.Грызлов. Ул моңа кадәр шулай ук партиянең Югары Советы әгъзасы иде.

Татарстан Президенты Минтимер Шаймиев, республикада кириллицадан латин графикасына күчүгә бәйле рәвештә, янәсе, тел сепаратизмы урын ала, дигән сөйләнүләр нигезсез һәм аларга спекулятивлык хас, дип саный. "Интерфакска биргән интервьюда М.Шаймиев белдерүенчә, бу мәсьәлә чамадан тыш сәясиләштерел-де, ә Дәүләт Думасының язуны кириллицадан башка графикага күчерүне тыючы "РФ халыклары телләре турындагы Законга төзәтмәсен республика башлыгы "хокукый күзлектән чыгып караганда зыянлы" дип атады.

Татарстан Президенты Минтимер Шаймиев Чечнягә республика халкының күпчелегендә һичшиксез абруй казанган, шушы республиканы һәм үз халкының үзенчәлекләрен, аның традицияләрен яхшы белгән лидер кирәк, дип саный. "Бу кеше халыкны туплый алырлык, үзенә кешеләр ышанырлык һәм, үзенең гамәлләре белән федераль хакимияткә ышанычны ныгытып, халык фикерен гәүдәләндерүче булырлык кеше булырга тиеш", - дип белдерде "Интерфакска биргән интервьюда М.Шаймиев.

20 ноябрьдә Казан Кремлендә Татарстан Президенты Минтимер Шәиевнең Россия Федерациясе тимер юллар министры урынбасары Хәсән Зәбиров һәм Горький тимер юлы башлыгы Шәүкәт Шәйдуллин белән очрашуында Татарстанның РФ Тимер юллар министрлыгы, аерым алганда, Горький тимер юлы белән хезмәттәшлеге мәсьәләләре тикшерелде.

12 ноябрьдә Казан Кремлендә Татарстан Президенты Минтимер Шәймиев үткәргән республика эш киңәшмәсенең төп темасы торак-коммуналь хуҗалыгын реформалар концепциясе булды. Республика җитәкчесе әйткәнчә, бик кыен мәсьәләне һәркемгә аңлау мөмкинлеге бирерлек "гомумиләштерелгән проектның беренче укылышы, башлангыч сөйләшү" булды бу. Әмма без һәркем өчен һәм иң элек халык өчен кулай булган чишелешләр табарбыз, дип ышандырып әйтте Президент.

Татарстан Республикасы Конституциясе кабул ителгән көннән соң ун ел вакыт узды. Шушы еллар Татарстанның күп милләтле халкы өчен чиктән тыш әһәмиятле булып әверелгән бөтен бер дәверне үз эченә алды. Җәмгыятьтә җитди низаглар булдырмыйча калып, без сынау юлларын лаеклы уздык, республиканың киләчәктә иминлеге һәм чәчәк атуы өчен ышанычлы хокукый нигезләр салдык.

Татарстан Президенты Минтимер Шәймиев, Россия массакүләм мәгълүмат чаралары гадәттән тыш хәлләрдә журналистлар этикасының бердәм кагыйдәләрен мөстәкыйль эшләргә тиеш, дип саный.
Шушы мәсьәләләргә хакимиятнең теләсә нинди тыкшынуы бөтен Журналистлар берлеге тарафыннан тулы күләмдә кабул ителмәячәк һәм, димәк, бу кагыйдәләрне аларның бер өлеше үтәп җиткермәячәк. Өстәвенә Россия массакүләм мәгълүмат чараларының күпчелеге бүген - бәйсез, дип белдерде "Интерфакска» биргән интервьюда М.Шәймиев.

24 октябрьдә "Казан" халыкара аэропортында оештырылган матбугат конференциясендә Мәскәүдән кайтып килүче Минтимер ШӘЙМИЕВ РФ Дәүләт Советының җирле үзидарәгә реформа ясауга багышланган утырышында катнашу йомгакларына аңлатма бирде.