ЯҢАЛЫКЛАР

Бәйсез экология рейтинг агентлыгы Россия төбәк икътисадларының экологик-икътисади нәтиҗәлелеге рейтингының нәтиҗәләрен игълан итте.

Быел аны төзү өчен Россиянең 76 субъекты җитәкчеләре мәгълүмат бирде. Табигатьтән файдалану, энергия куллану һәм әйләнә-тирә мохитне саклауда баланс иң яхшы саклана торган төбәкләр арасына Брянск өлкәсе (1 урын), Башкортстан (2), Татарстан (3), Калуга өлкәсе (4) һәм Кабарда-Балкария (5) керде.

Бер үк вакытта Бәйсез экология рейтинг агентлыгы Россиянең иң эре компанияләренең социаль-икътисади җаваплылык рейтингын ("Топ 100") бастырып чыгарды. "Татнефть" ААҖ әлеге исемлектә - дүртенче һәм Россиянең нефть компанияләре арасында беренче урынны яулады. "Түбән Кама Нефтехим" - 9 нчы, "Татэнерго" холдингының "Генерация компаниясе" - 17 нче, "Казаноргсинтез" - 26 нчы, "КАМАЗ" 35 нче урында.

3 февральдә ТР Дәүләт сынлы сәнгать музеенда казанлылар испан рәссамы Сальвадор Далиның шәхси күргәзмәсе белән таныша алачак

(Казан, 15 гыйнвар, "Татар-информ", Ләйсән Әсәдуллина). 3 февральдә ТР Дәүләт сынлы сәнгать музеенда казанлылар испан рәссамы Сальвадор Далиның шәхси күргәзмәсе белән таныша алачак.

Сальвадор Дали (1904-1989) -Испаниянең күренекле рәссамы. Аның иҗаты сюрреализм чоры алтын фондын тәшкил итә. Картиналары күбесенчә 1930 елларда языла. Дали иҗатының үзенчәлеге - төшләр образларын тудыру. 1937 елда Италиядә булып кайткач, иҗатында тардицион мотивларга мөрәҗәгать итә. 1940 елда Дали АКШ иленә китеп, ялгыз яшәү рәвешен сайлый. 1955 елда Дали кабат Испаниягә кайта.

Рәссам картиналар тудыру белән беррәттән, сыннар ясау, китаплар бизәү, бизәнү әйберләрен, театр һәм кино декорацияләрен эшләү белән дә шөгыльләнә.

15 гыйнвар көнне Казанның Арча зиратында татар халкының күренекле композиторы Нәҗип Җиһанов каберенә чәчәкләр салу тантанасы узачак. Ел саен 15 гыйнварда - композиторның туган көненә аны искә алу чаралары оештырыла.

Нәҗип Җиһанов 1911 елның 15 гыйнварында Җаек шәһәрендә эшче гаиләсендә туа. Үсмер чакта әти-әнисен югалта, балалар йортында тәрбияләнә. Музыкага һәвәслек Мәскәү консерваториясен тәмамлаган егеткә республика мәдәнияте үсешенә зур өлеш кертергә мөмкинлек бирә. Сугыш алды елларында ук аның "Качкын" симфониясе һәм операсы языла.

Нәҗип Җиһанов тарафыннан 8 опера, 3 балет, 17 эре симфоник әсәр, сюиталар, җырлар, камера, вокал һәм инструменталь музыка әсәрләре иҗат ителә. Көйләрендә татар, рус һәм дөнья музыка сәнгате традицияләре үрелеп барган үзенчәлекле композиторлык стиле чагылыш таба.

Якын көннәрдә Воровский урамындагы төзелеп бетмәгән тимер юл вокзалы янында "Мәскәү" станциясен төзү эшләре башланып китәчәк. Станцияне төзү өчен мәйданчык бүлеп бирелгән инде. Бер атнадан соң бу урында тәүге шпунт (булачак станциянең нигез чокыры стенасының бер элементы) кагылачак. Шпунтлар металлдан эшләнгән. Станциянең стенасы да металлдан булачак.

14 гыйнвар көнне ТР Президенты Минтимер Шәймиев Балык Бистәсе районында эшлекле сәфәрдә булды.

Петербург сынчысы, милләттәшебез Әхнәф Зыякаев бу көннәрдә, чын мәгънәсендә, иҗат утларында яна. Ул мастерскоенда иртә таңнан төнгә кадәр эшли. Хикмәт шунда, төньяк башкалада патриот- шагыйрь, Советлар Союзы Герое, Ленин премиясе лауреаты Муса Җәлилгә һәйкәл куелачак. Һәйкәлнең авторы, әлбәттә, билгеле сынчы, Башкортстан татары Әхнәф Зыякаев. Җәлилгә Санкт-Петербургта һәйкәл ачылу вакыйгасы - тарихи чынбарлыкның тантана итүе булачак. Ни өчен дигәндә, Муса Җәлил Ленинград өлкәсе Волхов фронтында көрәшкән. Шушы җирләрдә каты яраланып пленга эләккән. Ленинградны яклаган батырлар арасында Муса Җәлил якты йолдыз булып балкып тора. Фронтка алынган тәүге чорда Муса артиллерия рядовое. Аннары политсоставның кыска курсларында укып өлкән политрук званиесе ала. 1942 елның мартында Волхов фронтына җибәрелә. 2нче Удар армия каршында басылучы "Отвага" гәзите хәбәрчесе була. Бу армия Ленинград боҗрасын өзү өчен барган яуда аяусыз көрәшә. 2нче Удар армия камалышта кала. Күп сугышчы батырларча һәлак була. Муса Җәлилнең, исә, тиңдәшсез батырлыгын исбатлаган "Моабит дәфтәрләре" генә илгә әйләнеп кайта.

13 гыйнвар көнне Татарстан Республикасы Президенты Минтимер Шәймиев Казан Кремлендә 2009 ел нәтиҗәләре буенча ТР Президенты каршындагы Дәүләт торак фонды Попечительләр советы утырышына әзерлек буенча киңәшмә үткәрде.

ТР буенча "Россия авыл хуҗалыгы үзәге" РФ төбәкләре буенча "Россия авыл хуҗалыгы үзәге" федераль дәүләт учреждениесе филиаллары арасында беренче урынны яулады.

Россиянең төрле төбәкләрендәге коллегаларыннан аермалы буларак, ТР буенча "Россия авыл хуҗалыгы үзәге" белгечләре авыл хуҗалыгы тауар җитештерүчеләренә орлыкны язгы-көзге кампаниягә әзерләү, үсемлекләрне чүп үләннәре һәм корткычлардан саклау, авыл хуҗалыгы культуралары чәчүлекләрен карау, ашлыкны эшкәртү һәм башкалар белән бәйле иң зур күләмдә хезмәт күрсәткән. ТР буенча "Россия авыл хуҗалыгы үзәге" хезмәткәрләре бюджеттан тыш акчаларны да башкаларга караганда күрәк эшләгән.

ТР Премьер-министры урынбасары - мәдәният министры Зилә Вәлиева журналистлар, нәширләр, полиграфчылар һәм матбугат ветераннарын Россия матбугаты көне белән котлады.

13 гыйнварда Казанның Офицерлар йортында Бөек Ватан сугышында җиңүгә 65 ел тулуга багышланган хәйрия марафоны старт ала. Аны "Созвездие-Йолдызлык" республика телевизион эстрада сәнгате фестивален оештыручылар һәм катнашучылар үткәрә.

2010 ел дәвамында республика шәһәрләрендә һәм районнарында, Россия Кара диңгез флоты хәрби базаларында яшь җырчылар концертлары оештырылачак. Аларны үткәрүдә "Боевые подруги" иҗтимагый оешмасы да катнаша.