ЯҢАЛЫКЛАР

22 гыйнварда Мәскәүдә Россия Президенты Дмитрий Медведев рәислегендә Россия Федерациясенең сәяси системасын үстерү мәсьәләләре буенча РФ Дәүләт Советы утырышы уза. Утырышта Татарстан Республикасы Президенты Минтимер Шәймиев катнаша.

Агачлар сирәгәя, хезмәткәрләр картая, кирәкле орлык күләменең 5 проценты гына әзерләнә. Урманчылык тармагын яктыртып җибәрү өчен тармак вәкилләре инвесторларга өметләнә. Татарстан Урман хуҗалыгы министрлыгы коллегия­сендә әнә шул хакта сүз булды.

Республика урманчыларының җыелышы күңелле вакыйгадан башланды. Тармак хезмәткәрләренә теләсә нинди юллардан йөри алырлык 30 "УАЗ" тапшырдылар. "Татар-Информ" агентлыгы хәбәренә караганда, яңа автомобильләргә зур өметләр баглана. Чөнки "Урманчылык" оешмасы хезмәткәрләренең 1 гыйнвардан яңа вәка­ләтләре барлыкка килде. Моңа кадәр урманчылар хокук бозучыларны тоткарлаганда да үзләре беркетмәләр төзи алмый иде. Хәзер исә аларга закон бозучылар белән турыдан-туры көрәшү хокукы бирелде. Әлеге тантанадан соң коллегиянең рәсми утырышы башланды. Монысында инде күңелсез саннар да, тәнкыйть сүзләре дә җитәрлек ишетелде.

Идел буе федераль округында урнашкан югары уку йортларының (барлыгы 144 дәүләт вузы санала) ректорлары университетлар каршында кече инновацион предприятиеләр булдыру һәм үстерү турында сөйләштеләр. Мәгариф учреждениеләре үзләрендә хуҗалык җәмгыятьләре төзи ала дигән сүз бу. Әлеге хокук аларга узган елның августында ук бирелгән иде инде.

Мәгариф буенча федераль агентлыкның фәнни тикшеренүләр һәм инновацион программалар идарәсе башлыгы урынбасары Елена Попова белдергәнчә, ярты ел эчендә 44 югары уку йортында 116 хуҗалык җәмгыяте оештырылып, 881 эш урыны булдырылган. Яңадан 121 вуз шундый 925 предприятие төзеп, 11 мең кешегә эш урыны тәкъдим ителәчәк.

Татарстанның Милли китапханәсенең сирәк китаплар һәм кулъязмалар бүлеге китапханә ачылуына 145 ел тулуга багышланган "Сирәк китаплар коллекциясе дөньясында" күргәзмәсен оештыра.

21 гыйнвар көнне Казан дәүләт университеты карамагындагы Н.И.Лобачевский исемендәге лицей базасында ТР мәгариф һәм фән министры Альберт Гыйльметдинов белән Казан шәһәре мэры Илсур Метшин катнашында "Лидерлык нигезләре" программасы буенча лидерлык дәресе үткәрелде. Ачык дәрес рәвешендә барган әлеге үзенчәлекле очрашуга шәһәрнең мәгариф идарәсе башлыгы Илсур Һадиуллин да килгән иде.

Министр А.Гыйльметдинов башлангычы белән әзерләнгән "Лидерлык нигезләре" мәгариф программасы буенча оештырылып, шушы уку елының беренче көнендә гамәлгә кертелгән лидерлык дәресе хәзерге вакытта республика буенча 29 эксперименталь мәйданчыкта үткәрелә (7-11 класслардан 900ләп укучы җәлеп ителгән). Аларның 24е Казанда, тагын Чаллы, Яшел Үзән шәһәрләрендә һәм Түбән Кама, Аксубай районнарында шундый мәйданчыклар булдырылган. Бүгенге дәрестә исә Казанның шушы 24 мәктәбеннән 4әр укучы чакырылган иде.

Дәрес башында министр шәһәр башлыгын "Лидерлык нигезләре" программасы белән кыскача таныштыргач, ни өчен нәкъ әлеге шәхес чакырылуын аңлатып, ул И.Метшинның биографиясе белән таныштырды, 28 яшендә муниципаль берәмлек башлыгы булып куелганнан соң республикада ышанычны аклаган һәм бүгенгә кадәр аның ирешкән уңышлары белән үзенең чын лидер булуын раслаган кешенең укучы балалар өчен кызыклы булуын басым ясап әйтте.

Укучылар исә үзләренең мәктәпләрендә лидерлык дәресләренең ни рәвешле үткәрелүен видеофильмнар аша да, сүз белән дә аңлатты һәм мондый дәресләрнең үзләре өчен нинди файда китерүен мисалларда күрсәтте. Шулардан, әйтик, социаль приютларга, балалар йортларына һәм хәтта этләр приютларына барып ярдәм кулы сузуның үз "тәме" бар, шул ук вакытта яшьтәшләре арасында лидерлыкка омтылырга нигез бирә, лидерлыкка өйрәнеп була һәм өйрәнергә кирәк, дигән фикердә алар.

Татарстан Республикасы Президенты Минтимер Шәймиев "Татарстан Республикасында кече һәм урта эшмәкәрлекне үстерү турындагы" Законга кул куйды.

21 гыйнвар Казанда КДУ базасында Идел буе федераль округы вузлары Ректорлар советының вузлар каршындагы кече инновацион предприятиеләрне үстерү, шулай ук "Россия Федерациясендә мәгариф турында" федераль законын эшләү мәсьәләсенә багышланган күчмә утырышы узды.

Форумда ТР мәгариф һәм фән министры Альберт Гыйльметдинов, Идел буе федераль округы вузлары Ректорлар советының рәисе, Н.И.Лобачевский исемендәге Нижегородски дәүләт университеты президенты Роман Стронгин, ТР вузларының Ректорлар советы башлыгы, КДУ ректоры Мәгъзүм Сәлахов, Россия Мәгариф һәм фән министрлыгы вәкилләре һәм башка рәсми затлар катнашты.

Искә төшереп үтәбез, Федераль закон нигезендә бюджеттагы вузларга һәм фәнни тикшеренү институтларына инновацион компанияләрне гамәлгә куярга рөхсәт ителә. Вузлар һәм фәнни тикшеренү институтлары базасында оештырылган кече инновацион предприятиеләр уку йортын яңа тәмамлаган студентларны вузларда булдырылган өстәмә эш урыннары белән тәэмин итәргә мөмкинлек бирер дип күзалланган иде. Бу законны зур фәнни һәм студентлар үзәкләрендә көткәннәр иде. Әмма күп кенә белгечләр законның эшләнеп бетмәве һәм аны гамәлгә ашыруда туган кыенлыкларны күрсәтте.

ТР Премьер-министры Рөстәм Миңнеханов бүген Мәскәүдә "Россия һәм дөнья: яңа унъеллык чакыруы ("Россия и мир: вызовы нового десятилетия) дигән халыкара конференциядә катнаша. Чара РФ Хөкүмәте каршындагы Халык хуҗалыгы академиясе бинасында уза.

Халыкара конференциянең максаты - социаль-икътисади сәясәт приоритетларын ачыклап, аларны гамәли куллану инструметларын эшләү. Конференция дискуссияләр һәм эксперт "түгәрәк өстәл"ләре формасында уза. Аларда катнашучылар ил үсешенең үзәк тенденцияләре хакында фикер алыша, дип хәбәр итә ТР Министрлар Кабинетының матбугат хезмәте. Конференция эшендә РФ Хөкүмәтенең беренче урынбасары Игорь Шувалов, Икътисади үсеш министры Эльвира Нәбиуллина, РФ Саклык банкы рәисе Герман Греф, Россиянең әйдәп баручы сәясәтчеләре, Россия һәм чит илләрдән консультантлар, тикшеренүчеләр катнаша.

21 гыйнвар көнне Казан Кремлендә ТР Президенты Минтимер Шәймиев ТР Композиторлар берлеге әгъзалары белән очрашты.

20 гыйнвар көнне Татарстан Республикасы Президенты Минтимер Шәймиевне туган көне белән РФ Президенты Дмитрий Медведев, РФ Хөкүмәте Рәисе Владимир Путин, Мисыр Президенты Мөхәммәд Хөсни Мөбарәк, Төркия Республикасы Президенты Абдуллах Гөл һәм башка бик күпләр котлады.