ЯҢАЛЫКЛАР

20 гыйнвар көнне ТР Урман хуҗалыгы министрлыгы коллегиясенең узган ел йомгаклары һәм алдагы ел бурычлары буенча киңәйтелгән утырышы булды. ТР Мәдәният министрлыгының утырышлар залында министр Валерий Власов рәислегендә үткәрелгән әлеге чарада ТР Премьер-министры Рөстәм Миңнеханов, ТР экология һәм табигать ресурслары министры Әгъләм Садретдинов, Россия урман хуҗалыгының бюджет-финанс идарәсе башлыгы Николай Петрунин, республика министрлыклары һәм ведомстволары вәкилләре катнашты.

ТР Президенты Минтимер Шәймиев күрсәтмәсенә, урман хуҗалыгы төп регламентларына, ТР Урман планына туры китереп, Татарстан Республикасында 2018 елга кадәр урман хуҗалыгы үсеш стратегиясе эшләнде. Ул исә урман комплексында дәүләти-шәхси куларкадашлыкны үстерүнең концептуаль нигезе булып хезмәт итә һәм башкарма органнар һәм закон чыгару хакимияте органнарының урман комплексын үстерүдә килешеп эшләүләрен тәэмин итә.

20 гыйнвар көнне ТР Сәламәтлек саклау министрлыгында "2010 елда халыкка бушлай медицина ярдәмен күрсәтү буенча Дәүләт гарантияләре программасын тормышка ашыру эшләрен оештыру" темасына киңәшмә узды. Анда сәламәтлек саклау һәм социаль үсеш өлкәсендә күзәтчелек итү буенча Федераль хезмәтнең Татарстандагы Идарәсе җитәкчесе Рөстәм Сәфиуллин ТР Министрлар Кабинетының сәламәтлек саклау мәсьәләләре буенча бүлек башлыгы Борис Менделевич, республика сәламәтлек саклау учреждениеләренең баш табиблары катнашты.

Республикабызның сәламәтлек саклау министры Айрат Фәррахов ассызыклап үткәнчә, ел саен дәүләт гарантияләре программасы берникадәр үзгәрешләр кичерә. Быел да программа кысаларында яңа юнәлешләр тормышка ашырыла. Кан тамырлары авырулары булган кешеләргә медицина ярдәмен күрсәтүне камилләштерү максатыннан, 1 гыйнвардан Республика клиник хастаханәсе һәм 2-нче санлы Республика клиник хастаханәсенең неврология бүлегендә ике яңа районара бүлек эшли башлады. Аларның һәрберсе 30 койкага исәпләнгән. Быелның 1 октябреннән Яшел Үзән район үзәк хастаханәсендә дә шундый бүлек ачу күздә тотыла.

20 гыйнвар көнне Татарстанның сәламәтлек саклау министры Айрат Фәррахов Россиядә Швейцариянең "Алкон" компаниясе генераль директоры Александра Третьякова белән очрашты. Очрашуда шулай ук сәламәтлек саклау министры урынбасары Фәридә Яркәева, Республика клиник офтальмология хастаханәсе баш табибы Айдар Әмиров, "Алкон" компаниясенең хирургия бүлеге җитәкчесе Максим Бальберт катнашты.

"Алкон" дөньяда офтальмология хирургиясе, хирургия кораллары, офтальмологик препаратлар һәм күзләрне карау буенча материалларны җитештерү өлкәсендә лидер булып санала.

Республика клиник офтальмология хастаханәсе белән "Алкон" компаниясе 2003 елдан бирле хезмәттәшлек итә. Соңгы очрашу вакытында ике як өчен дә файдалы булган хезмәттәшлек мөнәсәбәтләрен дәвам итү хакында сүз алып барыла. Министр Айрат Фәррахов республикада күрсәтелә торган югары технологик медицина ярдәме күләмен арттыру һәм көндәшлеген күтәрү өчен бәяләрне киметү мөһимлеген ассызыклый. Сөйләшүләр нәтиҗәсендә республика офтальмологиясенә озак вакытка инвестицияләр җәлеп итү, медицинада кулланыла торган материалларга бәяләрне киметү турында килешенә. Бу исә янда калдырылган акчага елга өстәмә 150 операция ясарга мөмкинлек бирәчәк. Шулай ук Бөек Ватан сугышы ветераннарына катарактаны дәвалау буенча 1,5 миллион сумга 500гә якын операция ясау мөмкинлеге күрсәтелә.

Татарстан Республикасы Свияжск төбәкара мультимодаль логистика үзәге инвестиция проектын гамәлгә ашыру белән кызыксына. Бүген Татарстан Республикасы Премьер-министры Рөстәм Миңнеханов әлеге проектны гамәлгә ашыру мәсьәләләренә багышланган киңәшмәдә әнә шулай дип белдерде.

Киңәшмәдә Россия транспорт министры урынбасары Андрей Недосеков, ТР транспорт һәм юл хуҗалыгы министры Геннадий Емельянов катнашты.

Рөстәм Миңнеханов киңәшмә барышында билгеләп үткәнчә, проектны уңышлы гамәлгә ашыру өчен федераль һәм республика структураларының көчен берләштерергә, шулай ук шәхси инветорларда проектка карата кызыксыну уятырга кирәк.

ТР Хөкүмәте башлыгы искәртеп узганча, "Россия тимер юллары" ААҖ дә Свияжск төбәкара мультимодаль логистика үзәгенә карата кызыксыну белдергән. Аны эшләтеп җибәрү Россия тимер юлларына кайбер юнәлешләрдә йөк ташу күләмен сизелерлек арттырырга мөмкинлек бирәчәк.

Татарстанга танышу сәфәре белән Финляндиянең "Парастек" төзелеш компаниясе вәкилләре килде. Бүген алар ТР Сәнәгать һәм сәүдә министрлыгында министр урынбасары Артур Фатыйхов белән очрашты.

Татарстанда төрле типтагы тиз төзелә торган биналар төзелешенә ихтыяҗ бармы? Компания вәкилләре сәфәрнең максатын әнә шуны өйрәнү дип аңлата. Аларның республика белән кызыксынуын 2013 елда узачак Универсиада да арттырган. "Парастек" компаниясе Россиядә инде 1981 елдан бирле билгеле. "Парастек Бетон" ЯАҖ илдә 1993 елдан эшли. Компаниянең төп эш юнәлешләре җыелма тимер-бетон эшләнмәләр җитештерүдән гыйбарәт. Аның продукциясе төрле типтагы биналар һәм корылмалар төзелешендә файдаланыла. Аерым алганда, сәүдә-күңел ачу, бизнес үзәкләре, склад һәм сәнәгать биналары, паркинглар, торак йортлар, кунакханәләр төзелешендә актив кулланыла.

23 гыйнвар, шимбә көнне, 14.00 сәгатьтә Бөтендөнья татар конгрессы Башкарма комитетының конференцияләр залында "Лехайм, татары!" дип аталган китап тәкъдим ителәчәк, диелә әлеге оешмадан алынган игъланда.

Китап белән былтыр мәскәүлеләр, иерусалимлылар, урыннарда "Азатлык" радиосы, мәгълүмат агынтлыклары аша киң җәмәгатьчелек танышып өлгергән булса, чират, ниһаять, Казанга да җитте.

Күпьеллык тәнәфестән соң, Стендка ату буенча Ауропа чемпионатын быел кабат Россия кабул итә. Әлеге мәртәбәле ярышлар 25 июньнән 4 июльгә кадәр Югары Ослан районындагы яңа комплекста узачак.

Әзерлекнең барышы белән танышу өчен бүген Казанга рәсми визит белән Ауропа Конфедерациясеннән техник делегат Петрос Киритсис килде. Техник делегатның сәфәр барышында бурычлары стендка ату комплексы, спортчылар һәм кунаклар яшәячәк урыннар белән танышу, оештыру мәсьәләләрен килештерүдән гыйбарәт булачак. Моннан тыш, Петрос Киритсис катнашында 23-25 гыйнвар көннәрендә стендка ату комплексында хөкемдарлар өчен халыкара семинар оештырыла. Анда халыкара хөкемдар сертификаты алуга дәгъва итүче 30 арбитрның катнашуы көтелә (5 се Татарстаннан).

Татарстанга танышу сәфәре белән Финляндиянең "Парастек" төзелеш компаниясе вәкилләре килде. Бүген алар ТР Сәнәгать һәм сәүдә министрлыгында министр урынбасары Артур Фатыйхов белән очрашты.

Татарстанда төрле типтагы тиз төзелә торган биналар төзелешенә ихтыяҗ бармы? Компания вәкилләре сәфәрнең максатын әнә шуны өйрәнү дип аңлата. Аларның республика белән кызыксынуын 2013 елда узачак Универсиада да арттырган. "Парастек" компаниясе Россиядә инде 1981 елдан бирле билгеле. "Парастек Бетон" ЯАҖ илдә 1993 елдан эшли. Компаниянең төп эш юнәлешләре җыелма тимер-бетон эшләнмәләр җитештерүдән гыйбарәт. Аның продукциясе төрле типтагы биналар һәм корылмалар төзелешендә файдаланыла. Аерым алганда, сәүдә-күңел ачу, бизнес үзәкләре, склад һәм сәнәгать биналары, паркинглар, торак йортлар, кунакханәләр төзелешендә актив кулланыла.

Фәләстин автономиясе лидеры Мәхмүд Аббас киләсе атнада Казанга килергә ниятли. Фәләстин башлыгы Татарстан башкаласына Россиягә рәсми визиты кысаларында киләчәк. Фәләстиннең Мәскәүдәге илчесе Фаед Мостафа "Коммерсант"ка биргән интервьюсында белдергәнчә, автономия башлыгы визитының программасы билгеләнгән инде. 25 гыйнварда Аббас әфәнде Сочита РФ Президенты Дмитрий Медведев белән очрашачак, аннары Мәскәү һәм Казанда булачак.

Татарстан Республикасы буенча Эчке эшләр министрлыгы үзенең оператив хезмәт эшчәнлеге буенча алгы позицияләреннән чигенми. Министрлык карамагындагы личный состав белән уңышлы эшләү, алар өчен республикада гамәлдә булган социаль пакет, хезмәттә инновацион технологияләр киң куллану - болар барысы да үзенең уңай нәтиҗәсен бирә һәм аклана да. Билгеле, җитешмәгән яклар һәр өлкәдә, һәр тармакта була, әмма Казанга килгән чит ил инвесторлары Татарстан башкаласын куркынычсыз шәһәр дип таный, билгеле. Моңа алга таба да омтылырга кирәк, чөнки инвестицион җәлеп итүчәнлек бирегә килеп яшәр һәм эшләр өчен зур белгечләрне дә кызыксындыра.