ЯҢАЛЫКЛАР

8 декабрьдә ТР Дәүләт Советы Рәисе Фәрит Мөхәммәтшин Казанга Татар яшьләре лидеры мәктәбе эшендә катнашу өчен килгән милләттәшләребез белән очрашты. Очрашуда шулай ук РФ Дәүләт Думасы депутаты, татарларның федераль милли-мәдәни мохтарияте рәисе Илдар Гыйльметдинов, ТР Дәүләт Советы Рәисе урынбасары Римма Ратникова, ТР Яшьләр эшләре, спорт һәм туризм министрының беренче урынбасары Йосып Якупов катнашты.

7 декабрьдә Казан Кремлендә ТР Президенты Минтимер Шәймиев белән Киров өлкәсе губернаторы Никита Белых ике төбәк арасында икътисади-сәүдә, фәнни-техник һәм социаль-мәдәни хезмәттәшлек турындагы килешү имзалады. Яклар шулай ук 5 елга исәпләнгән әлеге хезмәттәшлек килешүен гамәлгә ашыру турындагы беркетмәгә дә кул куйды.

Автомобиль йөртүчеләр бу көннәрдә башкала үзәгендә хәрәкәт схемасы үзгәрүгә игътибар иткәндер. Үзгәрешләр кабат Карл Маркс урамына кагыла. Аның нечкәлекләре хакында бүген журналистларга Казан шәһәре Эчке эшләр идарәсенең Юл хәрәкәте иминлеге дәүләт инспекциясе җитәкчесе урынбасары Марс Ризванов сөйләде.

7 декабрьдә Татарстан Республикасы Президенты "Фән һәм техника өлкәсендә 2009 ел өчен Татарстан Республикасы Дәүләт премияләрен тапшыру турында"гы Указга кул куйды. ТР Президенты каршындагы Татарстан Дәүләт премияләре комиссиясе тәкъдимнәре нигезендә, 2009 елда фән һәм техника өлкәсендә Татарстан Республикасының 9 Дәүләт премиясе тапшырылган.

7 декабрьдә Казан шәһәре Башкарма комитетында шәһәрнең Артем Айдинов исемендәге еллык махсус премиясен тапшыру тантанасы үткәрелде.

8 декабрьдә ТР Мәгариф һәм фән министры Альберт Гыйльметдинов һәм Казан мэры Илсур Метшин башкаланың 7 нче гимназиясе базасында узачак "ачык дәрес"тә катнашачак. Әлеге дәрес "Лидерлык нигезләре" белем бирү программасын тормышка ашыру кысаларында үткәрелә.

"Татарстан Республикасында наноиндустрияне үстерү" комплекслы проектын гамәлгә ашыру кысаларында иртәгә Казанда "Сәнәгатьтә нанотехнологияләр" дигән X халыкара конференция эшли башлый. Аңа туры китереп "Казан ярминкәсе"ндә быел тәүге тапкыр "Нанотехнологияләр. Казан 2009" дигән махсуслаштырылган күргәзмә дә оештырыла.

Татарстан парламентында агымдагы елның 10 декабрендә ТР Дәүләт Советының Бөек Ватан сугышында җиңүнең 65 еллыгын билгеләп үтүгә булышлык итү буенча комиссия эшенә багышланган матбугат очрашуы була.

Казан шәһәре хакимияте аппаратының традицион "дүшәмбе киңәшмәсе" бүген 5 декабрьдә Пермь шәһәрендәге "Хромая лошадь" төнге клубында булган янгын нәтиҗәләреннән башланды. Мэр Илсур Метшин шул хакта шәрехләп, ул янгын кимендә 112 яшь кешенең гомерен өзгән һәм, шуның нәтиҗәсендә, 130дан артыгының тәне пешкән, имгәнгән, дип искәртте. Мәсьәләгә җинаятьчел караш әлеге объектның эчке ягы яна торган материаллардан тышланган булуы, питарда ише янгын куркынычы тудыра торган әйберләрне кулланырга ярамаган урында куллануы, кешеләрне эвакуацияләү өчен запас чыгу урыннары булмавы һәм төнге клубның фәкать табыш алуга гына корылуы кебек факторларда раслана.

Татарстан мәчетләрендә "корбан ашлары"н үткәрү дәвам итә. Кукмара районының Уразай авылында шушы көннәрдә корбан итеннән җирле эшкуар Наил Харрасов хәйрия ашы уздырды. Вәгазь уку өчен Татарстанның баш казые Җәлил хәзрәт Фазлыев чакырылган иде.