ЯҢАЛЫКЛАР

21 октябрьдә ТР Дәүләт Советы Рәисе Фәрит Мөхәммәтшин Мәскәүдә икътисад һәм хезмәт базарындагы вәзгыятьне җайга салуга юнәлдерелгән закон чыгару тәкъдимнәрен әзерләү буенча РФ Федераль Җыены Федерация Советы каршындагы эшче төркем утырышында катнаша.

ТР Дәүләт Советы депутатлары республиканың 2010 ел бюджеты проектын карауны дәвам итә. Бүген парламентның Икътисад, инвестицияләр һәм эшкуарлык, Социаль сәясәт комитетлары көн тәртибенә чыгарылган төп мәсьәлә дә киләсе ел бюджеты белән бәйле иде.

Икътисад, инвестицияләр һәм эшкуарлык комитеты әгъзаларын ТР Икътисад министры Марат Сафиуллин иң элек ТРның 2010 елга социаль-икътисади үсеше фаразы белән таныштырды. Бу фараз дәвам итүче икътисади кризис шартларында төзелгән. Республиканың баш икътисадчысы сүзләренчә, киләсе ел бюджетын формалаштырганда доллар курсы - 33, 9 сум, нефтьнең бер барреле 58 доллар, ә инфляция үсеше 10 процент итеп алынган. Марат Сафиуллин хәбәр иткәнчә, хәзер икътисадта хәл җиңелдән булмаса да, җанлану күзәтелә. "Россия кризистан 2013 елда чыгачак", - дип хәбәр итте ул, республиканың РФ һәм дөньякүләм икътисадка бәйле булуын искәртеп.

Депутатларны 2010 елның бюджет проекты белән ТР Финанслар министры Радик Гайзатуллин һәм аның урынбасары Лариса Макарова таныштырды. Республика финансистлары сүзләренчә, Татарстан Республикасы бюджеты керемнәренең фаразлана торган гомуми күләмен - 66,1 млрд. сум, бюджет чыгымнарының гомуми күләмен 78 млрд. сум итеп расларга тәкъдим ителә. Республика консолидацияләнгән бюджетына 88,3 млрд. сум керем (аның 8,3 млрд. сумы федераль бюджеттан киләчәк) алыныр дип фаразлана. Шуның 80 млрд. сумы бюджетның үз керемнәре өлешенә туры килә. Ә чыгымнар 100, 2 млрд.сум күләмендә булыр дип планлаштырыла. Фараз күрсәткечләренә караганда, киләсе елда ТРның җыелма бюджетында кытлык 12 млрд. сумга якын булачак.

Бүген "Рубин"ның гына түгел, ә бөтен Россия футболының җанатарлары чын әкиятнең шаһитлары булды. Ауропаның төп футбол турниры дебютанты чит мәйданда 98 мең кеше сыйдырышлы аренада Чемпионнар лигасы хуҗасын бирелергә мәҗбүр итте.

Рязанцевның 35 метрдан типкән тубы эссе июль төнендә яшьнәгән яшен кебек тәэсир итте, ярымсакчыдан мондый тәвәккәллекне берәү дә көтмәгән иде. Ул очрашуның буеннан буена "Рубин" уенына тон бирде.

21 октябрьдә Татарстан Хөкүмәте үз утырышында республикада Сәнәгать биотехнологияләрен үстерү программасы стратегиясе һәм концепциясен карарга мөмкин. Бу хакта ТР Премьер-министры Рөстәм Миңнеханов бүген "Татнефтехиминвест-холдинг" ААҖнең Директорлар советы утырышында проектлар буенча фикер алышу нәтиҗәләре буенча белдерде.

20 октябрь көнне парламентның Законлылык һәм хокук тәртибе комитеты утырышында ТР Иҗтимагый палатасы әгъзалары "ТР Иҗтимагый палатасы эшчәнлеге мәсьәләләре буенча Татарстан Республикасы законнарын тикшерү нәтиҗәләре турында" дигән мәсьәлә буенча фикер алышты.

20 октябрьдә ТР Президенты каршындагы Дәүләт һәм муниципаль идарә академиясендә Люксембург Корольлегенең Россиядәге Гадәттән тыш хәлләр һәм Тулы вәкаләтле илчесе Гастон Стронк вуз студентлары һәм укытучылары белән очрашты.

20 октябрьдә ТР Президенты Минтимер Шәймиев Калуга өлкәсенә барды. Эш сәфәре барышында Татарстан Президенты төбәк үсеше мәсьәләләре Хокүмәт комиссиянең "РФ башкарма хакимият органнары эшчәнлеге нәтиҗәлелеге турында" мәсьәлә буенча утырышында катнаша, ул РФ Премьер - министры Владимир Путин рәислегендә уза.

20 октябрьдә Төркиянең Анталия шәһәрендә төрки телле журналистлар өчен 3 атналык уку-укыту һәм гамәли семинар ачылды. Бу халыкара чарада катнашучылар географиясе шактый киң. Бирегә "ТРТ" Төркия телерадиотапшырулар компаниясе чакыруы буенча осталык-тәҗрибә уртаклашу, белем һәм күнекмәләр алу өчен Көнчыгыш Ауропа, Төньяк Африка, Азия, Урта Диңгез төбәгеннән, Төркиянең үзеннән -барлыгы 26 илдән 96 каләм иясе җыелды. Араларында Татарстаннан да 5 журналист бар.

20 октябрь ТРда студентлар спорты декадасы кысаларында ТДГПУның спорт залында ир-атлар һәм хатын-кызлар арасында волейбол буенча ярышлар уза.

21 октябрьдә С.Сәйдәшев исемендәге Зур дәүләт концерт залында "La Primavera" Казан дәүләт камера оркестры "Безгә инде 20 яшь!" дип исемләнгән программа белән яңа юбилей сезонын ачып җибәрә.