ЯҢАЛЫКЛАР

ТР Дәүләт Советының Икътисад, инвестицияләр һәм эшкуарлык, Дәүләт төзелеше һәм җирле үзидарә, бюджет, салымнар һәм финанслар комитетларының уртак утырышында ТР Премьер-министры вазифаларына Рөстәм Миңнеханов кандидатурасын раслау һәм ТР Премьер-министры урынбасарлары вазифаларына Равил Моратов, Борис Павлов, Владимир Швецов һәм Марат Әхмәтов кандидатуралары буенча килешү турында ТР Президенты тәкъдимнәре каралды.

26 апрель көнне Татарстан Президенты Минтимер Шәймиев “2005 елгы Габдулла Тукай исемендәге Татарстан Республикасы Дәүләт премияләрен бирү турында”гы Указга кул куйды. Быел әлеге премияләргә рәссам Зөфәр Гыймаев – ТР әдәбият һәм сәнгать эшлеклеләре портретларын иҗат иткән өчен, шагыйрь Рөстәм Миңгалимов – “Дәрт чүлмәге” шигырьләр җыентыгы өчен, композитор Шамил Шәрифуллин – “Мөнәҗәтләр”, “Авыл көйләре” хор концертлары өчен лаек булды.

25 апрель көнне Татарстан Президенты Минтимер Шәймиев чираттагы ялдан кайткач, РФ Федераль Җыен утырышында катнашачак, анда Россия Федерациясе Президенты Владимир Путин үзенең юлламасы белән мөрәҗәгать итәчәк.

Бүген Татарстан Президенты Минтимер Шәймиев “Татарстан Республикасының дәүләт башкарма хакимият органнары турында”гы ТР Законына кул куйды. ТР Дәүләт Советы аны агымдагы елның 24 мартында кабул иткән иде.
Әлеге закон республика Хөкүмәтен, министрлыкларны һәм башка башкарма хакимият органнарын оештыру һәм аларның эшчәнлеге мәсьәләләрен көйләүче төп закон акты булып тора.

Казанда ТР Дәүләт Советының 10 еллыгына багышланган "Татарстан Республикасында парламентаризм, дәүләтчелек һәм демократия үсеше" республика фәнни-гамәли конференциясе булды. Киң күләмле форумда ТР Президенты Минтимер Шәймиев, ТР Дәүләт Советы Рәисе Фәрит Мөхәммәтшин, Татарстан дәүләт хакимиятенең барлык тармак җитәкчеләре, шулай ук фән, мәдәният һәм республиканың әйдәп баручы конфессияләре вәкилләре катнашты.

С.Сәйдәшев исемендәге Дәүләт Зур концертлар залында Татарстан Президенты Минтимер Шәймиевнең инаугурация тантанасы узды.
Татарстан Президенты, Татарстан Конституциясенә кулын куеп, татар һәм рус телләрендә төп законга ант бирде һәм ант текстына кул куйды.

“Мин кешеләрне яратам. Алар барысы да безнеке – теләктәшлек белдерүчеләре дә, тәнкыйтьләүчеләре дә. Хакимияткә килгәндә безнең барыбызның да төрле булуын аңламыйча ярамый. Мин бу хисне кичерүем белән бәхетле. Һәм минем өчен республикабыз халкы күрсәткән ышаныч бик кадерле, ул Россия Президенты тәкъдиме аша да чагылды. Сезнең уртак теләктәшлегегез өчен зур рәхмәт”, - диде Минтимер Шәймиев Татарстан Дәүләт Советы аңа Татарстан Республикасы Президенты вәкаләтләрен йөкләү турында карар кабул иткәч.

25 мартта ТР Дәүләт Советы Минтимер Шәймиевкә ТР Президенты вәкаләтләрен йөкләү өчен күпчелек тавыш бирде. Кандидатураны 89 депутат хуплады, каршы – 4, бер депутат тавыш бирмичә калды.

Минтимер Шәймиев ТР Дәүләт Советына еллык юлламасында республикада хезмәт хакы, акча керемнәре үсеше һәм хезмәт хакы түләүдә аермалыкны киметү өчен нәтиҗәле чаралар күрергә кирәклеген ассызыклады. “Әлеге проблеманы хәл итүне шәхсән үзем кичектерергә җыенмыйм”, - дип белдерде Татарстан Президенты.

Бу минутларда ТР Дәүләт Советы ТР Президенты Минтимер Шәймиевкә вәкаләтләр йөкләү мәсьәләләрен карый.
Утырыш эшендә ТР Президенты Минтимер Шәймиев, РФ Президентының Идел буе федераль округындагы вәкаләтле вәкиле Сергей Кириенко, ТР Премьер-министры Рөстәм Миңнеханов, Федерация Советы әгъзалары, Дәүләт Думасы депутатлары катнаша.