ЯҢАЛЫКЛАР
Бүген Казан Кремлендә Татарстан Президенты Рөстәм Миңнеханов һәм ТР Дәүләт Киңәшчесе Минтимер Шәймиев Төркмәнстан Президенты Гурбангулы Бердымөхәммәдовка ике изге урын – Болгар һәм Свияжскины торгызу буенча масштаблы проектны тәкъдим иттеләр. Кунакка Болгар һәм Свияжски тарихы, бу шәһәрләр территориясендә археологик һәм торгызу эшләре барышы турында да сөйләделәр.
Бүген “Свияжск утрау-шәһәре” музей-тыюлыгында алмагач бакчасына нигез салу булды. Чарада Татарстан Республикасы Дәүләт киңәшчесе, «Яңарыш» республика фонды Попечительләр Советы рәисе Минтимер Шәймиев катнашты.
“Болгарда эшләр план буенча бара дияргә була, ләкин бик киеренкелек белән. Чөнки кайсыбер объектларны ачуны көзгә планлаштырган идек, әмма республикада билгеләп үтеләчәк бәйрәмнәргә нисбәтләп, торгызыла һәм төзелә торган зур объектларны ике этапка бүлеп тапшырачакбыз” - бүген Изге Болгар җиренә эш сәфәре белән чыгып, шушы борынгы шәһәрдә торгызыла һәм төзелә торган 7 объектта эш барышы белән озаклап танышып йөргәннән соң, ТР Дәүләт Киңәшчесе Минтимер Шәймиев шушы хакта шәрехләде.
Татарстан Республикасы Дәүләт Киңәшчесе, Татарстан Республикасы тарихи һәм мәдәни истәлекләрен торгызу Республика Фонды Попечительләр Советы Рәисе Минтимер Шәймиев бүген “Яңа гасыр” телерадиокомпаниясенең “Болгар радиосы”нда “Эшлекле әңгәмә” тапшыруында катнашты. Әңгәмә “Яңарыш” фондының Болгарда һәм Свияжскида тарихи һәйкәлләрне торгызу эшчәнлеген яктыртуга багышланган иде. Минтимер Шәймиев тапшыруны алып барган Илнур Фәйзрахмановка – “Яңа гасыр” ТРК генераль директорының радиотапшырулар буенча урынбасарына “Яңарыш” фондының максатлары, бурычлары, эшчәнлек алып барган ике елда ирешкән казанышлары, Болгарда һәм Свияжскида узачак чаралар турында сөйләде, шулай ук тыңлаучыларның телефон аша биргән һәм редакциянең электрон адресына җибәргән сорауларына җавап бирде.
Татарстан башкаласы Казанның Җиңү паркында Бөек Ватан сугышында Җиңүнең 67 еллыгына багышланган тантаналы чарада бүген Татарстан Президенты Рөстәм Миңнеханов, Дәүләт Киңәшчесе Минтимер Шәймиев, Дәүләт Советы Рәисе Фәрит Мөхәммәтшин, Премьер-министр Илдар Халиков, шәһәр мэры Илсур Метшин, министрлыклар, ведомстволар җитәкчеләре, сугыш һәм тыл ветераннары, хәрбиләр, кадетлар һәм суворовчылар, шәһәр халкы, башкала кунаклары катнашты.
Бүген башкалабызда Бөек Җиңү көненә багышланган төп чараларның берсе Ирек мәйданында узган Парад булды. Биредә тантаналар Җиңү парадында катнашучы шәхси состав тезелүдән һәм бәйрәмнең кереш өлеше булган Бөек Ватан сугышы елларына багышланган театральләштерелгән тамашадан башланып китте. Бу бөек көнне сугыш һәм тыл ветераннары, хәрбиләр, гомумән, казанлылар белән бәйрәм итәргә бирегә ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, Дәүләт Советы рәисе Фәрит Мөхәммәтшин, Премьер-министр Илдар Халиков, Казан мэры Илсур Метшин килгән иде.
Бүген Минтимер Шәймиев Мәскәүдә. Ул анда Русия Федерациясенең сайланган Президенты Владимир Путинның инаугурация тантанасында катнаша.
Бүген Камал театры бинасында сугыш һәм хезмәт кырларында Җиңү көнен якынайтуга үзләреннән зур өлеш керткән татарстанлыларны хөрмәтләделәр. Ветераннарны Бөек Ватан сугышында Җиңүнең 67 еллыгы белән котларга ТР Президенты Рөстәм Миңнеханов килгән иде. Тантаналы җыелышта шулай ук ТР Дәүләт Киңәшчесе Минтимер Шәймиев, Дәүләт Советы рәисе Фәрит Мөхәммәтшин, Премьер-министр Илдар Халиков һ.б. дәрәҗәле кунаклар катнашты. Ватан азатлыгы өчен көрәштә яу кырларында башларын салган сугышчылар бер минут тынлык белән искә алынды.