ЯҢАЛЫКЛАР

Бүген Татарстан Президенты Минтимер Шәймиев “Татарстан Республикасының дәүләт башкарма хакимият органнары турында”гы ТР Законына кул куйды. ТР Дәүләт Советы аны агымдагы елның 24 мартында кабул иткән иде.
Әлеге закон республика Хөкүмәтен, министрлыкларны һәм башка башкарма хакимият органнарын оештыру һәм аларның эшчәнлеге мәсьәләләрен көйләүче төп закон акты булып тора.

Казанда ТР Дәүләт Советының 10 еллыгына багышланган "Татарстан Республикасында парламентаризм, дәүләтчелек һәм демократия үсеше" республика фәнни-гамәли конференциясе булды. Киң күләмле форумда ТР Президенты Минтимер Шәймиев, ТР Дәүләт Советы Рәисе Фәрит Мөхәммәтшин, Татарстан дәүләт хакимиятенең барлык тармак җитәкчеләре, шулай ук фән, мәдәният һәм республиканың әйдәп баручы конфессияләре вәкилләре катнашты.

С.Сәйдәшев исемендәге Дәүләт Зур концертлар залында Татарстан Президенты Минтимер Шәймиевнең инаугурация тантанасы узды.
Татарстан Президенты, Татарстан Конституциясенә кулын куеп, татар һәм рус телләрендә төп законга ант бирде һәм ант текстына кул куйды.

“Мин кешеләрне яратам. Алар барысы да безнеке – теләктәшлек белдерүчеләре дә, тәнкыйтьләүчеләре дә. Хакимияткә килгәндә безнең барыбызның да төрле булуын аңламыйча ярамый. Мин бу хисне кичерүем белән бәхетле. Һәм минем өчен республикабыз халкы күрсәткән ышаныч бик кадерле, ул Россия Президенты тәкъдиме аша да чагылды. Сезнең уртак теләктәшлегегез өчен зур рәхмәт”, - диде Минтимер Шәймиев Татарстан Дәүләт Советы аңа Татарстан Республикасы Президенты вәкаләтләрен йөкләү турында карар кабул иткәч.

25 мартта ТР Дәүләт Советы Минтимер Шәймиевкә ТР Президенты вәкаләтләрен йөкләү өчен күпчелек тавыш бирде. Кандидатураны 89 депутат хуплады, каршы – 4, бер депутат тавыш бирмичә калды.

Минтимер Шәймиев ТР Дәүләт Советына еллык юлламасында республикада хезмәт хакы, акча керемнәре үсеше һәм хезмәт хакы түләүдә аермалыкны киметү өчен нәтиҗәле чаралар күрергә кирәклеген ассызыклады. “Әлеге проблеманы хәл итүне шәхсән үзем кичектерергә җыенмыйм”, - дип белдерде Татарстан Президенты.

Бу минутларда ТР Дәүләт Советы ТР Президенты Минтимер Шәймиевкә вәкаләтләр йөкләү мәсьәләләрен карый.
Утырыш эшендә ТР Президенты Минтимер Шәймиев, РФ Президентының Идел буе федераль округындагы вәкаләтле вәкиле Сергей Кириенко, ТР Премьер-министры Рөстәм Миңнеханов, Федерация Советы әгъзалары, Дәүләт Думасы депутатлары катнаша.

Республикада хәрби чакырылыш комиссиясенең яңа составы расланды. Аны Татарстан Президенты Минтимер Шәймиев җитәкләде. ТР Президентының “ТР Чакыру комиссиясе турында”гы Указы бүген үз көченә керде. Указ “Хәрби бурыч һәм хәрби хезмәт турында”гы Федераль законга бәйле рәвештә гражданнарны оешкан төстә һәм үз вакытында хәрби хезмәткә чакыруны тәэмин итү максатларында кабул ителде.

Бүген, 2005 елның 11 мартында, Татарстан Республикасы Президенты М.Ш.Шәймиев үзенең 9 мартта Мәскәүдә Россия Федерациясе Президенты В.В.Путин белән очрашу вакытында В.В.Путинның тагын бер срокка Татарстан Республикасы Президенты постында калырга дигән тәкъдимен кабул итүен белдерде.«Минем тагын бер срокка барырга теләмәвемне берничә тапкыр әйтүемне белсә дә, Владимир Владимирович Путин миннән калуымны сорады», — диде ул.
Шул ук көнне М.Ш.Шәймиев федераль законда билгеләнгән яңа тәртип нигезендә үзенә вәкаләтләр бирүне сорап вакытыннан элек Россия Федерациясе Президенты В.В.Путинга мөрәҗәгать итте.

10 мартта Мәскәүдә РФ Тышкы эшләр министрлыгында РФнең ЮНЕСКО эшләре буенча комиссиясе утырышы булды. Анда Татарстан Президенты Минтимер Шәймиев тә катнашты. Аңа Россия Федерациясе белән ЮНЕСКО арасындагы хезмәттәшлеккә шәхси өлеш керткәне өчен диплом һәм "Россия-ЮНЕСКО" истәлек медале тапшырылды.