ЯҢАЛЫКЛАР

Россиянең эре предприятиеләренең берсе булган "Түбән Кама нефтехим", катлаулы чорга да карамастан, бүген нәтиҗәле эшләвен һәм үсүен дәвам итә. Компания акционерларының еллык гомуми җыелышында чыгыш ясаган ТР Премьер-министры Рөстәм Миңнеханов шулай дип белдерде.

ТР Авыл хуҗалыгы һәм азык-төлек министрлыгы тарафыннан ТР агросәнәгать предприятиеләре арасында терлек азыгын җыюга әзер булуына багышланган конкурс игълан ителде, дип хәбәр итә министрлыкның матбугат хезмәте.

13 июнь көнне Татарстанның Спас районында урнашкан Болгар каласында Идел буе болгарлары тарафыннан Ислам динен кабул итүнең 1120 еллыгына багышланган "Изге Болгарда - җыен" дигән чара узачак. Быел да анда Казаннан, республиканың шәһәр һәм районнарыннан, Россиянең күп кенә төбәкләреннән милләттәшләребез, динкардәшләребез килер дип көтелә.

Республикада узган "Без булдырабыз" хәйрия акциясе барышында 100 млн. сумнан артык акча җыелган. Бу мәгълүматлар бүген ТР Министрлар Кабинетында узган брифингта яңгырады.

Татарстан Республикасы Хөкүмәтендә республика Премьер-министрының беренче урынбасары Борис Павлов Кытай шәһәрләре мэрлары ассоциациясенең Россиядәге генераль вәкиле Лю Най Фен катнашында "КВЗ" һәм "КамАЗ" ачык акционерлык җәмгыятьләре белән уртак предприятие оештыру мәсьәләсе буенча киңәшмә уздырды.

"2008 елда БДБ илләренең иң яхшы аэропорты" бәйгесенең нәтиҗәләре мәгълүм булды. Аннан күренгәнчә, "Казан" халыкара аэропорты "Көчле үсештәге аэропорт" номинациясендә җиңү яулаган. Аэропорт җитәкчелегенә кубок һәм "Аэропорт" ассоциациясенең Мактау грамотасы тапшырылган.

3 июньдә Казанда төрки халыкларының "Нәүрүз" дип исемләнгән театр фестивале старт ала. Өч көнгә исәпләнгән чара барышында башкала тамашачысына һәм, гомумән, сәнгать сөючеләргә үзенчәлекле бай программа тәкъдим ителә.

Башкортстан татар милли оешмалары җитәкчеләре чираттагы киңәшмәсен үткәрде.

Әлеге сөйләшүдә шушы атнаның шимбәсендә Уфада үтәчәк Башкортстан татарлары җыенына әзерлек мәсьәләләре тикшерелде.

2 июнь көнне ТР Дәүләт Советы Рәисе Фәрит Мөхәммәтшин җитәкчелегендәге Татарстан делегациясе Оренбургта Татар мәдәнияте көннәре кысаларында үткәрелүче чараларда катнаша.

5-8 июнь көннәрендә Казанда Корея мәдәнияте көннәре узачак. Биредә ул Корея Республикасы белән Россия Федерациясе арасындагы дипломатик мөнәсәбәтләр оешуга 20 ел тулуга әзерлек кысаларында үткәрелә.