ЯҢАЛЫКЛАР

Православие динендәге хөрмәтле ватандашлар!
Сезне Христос туган көн-православие динендәге барлык кешеләрне берләштереп аларның рухи тормышында һәм мәдәниятендә гаять зур урын тоткан, һәр христиан өчен газиз һәм кадерле булган нурлы Рождество бәйрәме белән чын күңелдән тәбрик итәм!
Без тормышыбызга борынгы күркәм традицияләр кире кайткан, берөзлексез үзгәреп һәм яңарып торган гаҗәеп кызыклы һәм каршылыклы заманда яшибез. Православие диненең татулык, иминлек, игелек, ихтирам һәм олы ярату хисләре белән сугарылган югары әхлакый кыйммәтләренең тирән мәгънәсен ачып, Рождество әлеге традицияләр арасында аерым урын алып тора.

Хөрмәтле ватандашлар!
Узып баручы 2005 елны без чын мәгънәсендә дулкынланып көтеп алган идек. Ул тарихка һәм барчабызның хәтеренә Казанның меңьеллык юбилее белән кереп калачак. Бәйрәм көннәрендә без Россия Федерациясе Президенты Владимир Путинны, Бәйсез Дәүләтләр Бердәмлеге башлыкларын, Россия төбәкләре җитәкчеләрен, чит илләрдән күренекле кунакларны, танылган милләттәшләребезне кабул иттек.

28 декабрьда Баскет-холлда Татарстан Республикасы Президенты М.Ш.Шәймиев катнашында балалар һәм яшьләр өчен Яңа ел елкасы уза. Бәйрәмгә бөтен республикадан 5 меңнән артык балалар килде. Алар арасында төрле конкурсларда җиңүчеләр, спортчылар, уку алдынгылары һәм социаль якланмаган балалар.
Кунакларны төрле әкият геройлары һәм яшь артистлар каршы алалар. Шулай ук Баскет-холлда балар эшләре күзгәрмәләре оештырылган, республиканың компьютер фирмалары алдынгы информацион технологияләрне күрсәтә.

27 декабрьдә Татарстан Президенты Минтимер Шәймиев Россия Президенты каршындагы Дәүләт Советы утырышында үтемле торак проекты буенча чыгыш ясады.
Татарстан Президенты республиканың торак төзү өлкәсендәге тәҗрибәсе турында сөйләде.

22 декабрьдә Казан Кремлендә Татарстан Президенты Минтимер Шәймиев 2005 ел нәтиҗәләренә багышланган өч сәгатьлек матбугат конференциясе үткәрде. Матбугат конференциясе барышында республика башлыгы егермегә якын сорауга җавап бирде. Ул үз чыгышында быел узган зур күләмле вакыйгалар – Бөек Җиңүнең 60 еллыгы һәм Казанның 1000 еллыгы турында искәртте, октябрьдә узган муниципаль сайлауларга йомгак ясады, Татарстанның төп икътисади уңышлары турында белдерде, Россия Президенты тарафыннан игълан ителгән милли проектларны республикада гамәлләштерү перспективаларын билгеләде.

21 декабрьдә Казан Кремлендә Татарстан Президенты Минтимер Шәймиев һәм РФ Президентының Идел буе федераль округындагы тулы вәкаләтле вәкиле Александр Коновалов катнашында социаль-икътисади үсешкә һәм ТРда милли проектларны чынга ашыруга багышланган киңәшмә булды.

16 декабрьдә Татарстан Президенты Минтимер Шәймиев республиканың 75 еллыгын билгеләп үтүче Кукмара районында эшлекле сәфәрдә Кукмара станциясендә яңа төзелгән тимер юл вокзалы бинасын ачу тантанасында катнашты.

15 декабрьдә Казан Кремлендә РФ һәм ТР дәүләт бүләкләрен тапшыру тантанасы булды. ТР Президенты Минтимер Шәймиев танылган татарстанлыларга – сәясәтчеләр, галимнәр, суд органнары, шулай ук сәламәтлек саклау һәм мәгариф, сәнәгать, төзелеш һәм авыл хуҗалыгы өлкәсе хезмәткәрләренә бүләкләр тапшырды.

2005 елның 9 декабрендә Россия Федерациясе Президенты В.В.Путин Указы белән Россия Федерациясе Наркотиклар әйләнешен контрольдә тоту хезмәтенең Татарстан Республикасы буенча Идарә башлыгы Илгиз Марс улы Миңнуллинга полиция генерал-майоры исеме бирелде.

ТР Президенты мәдәни мирас объектларын саклау, куллану һәм популярлаштыру өлкәсендә дәүләт (республика) сәясәтен билгеләячәк. 9 декабрьдә ТР Дәүләт Советының 20нче утырышында депутатлар икенче укылышта “Татарстанда мәдәни мирас объектлары турында”гы ТР законына үзгәрешләр кертү турында” закон проектын кабул итте.