ЯҢАЛЫКЛАР

Көзнең беренче салкыны Сарман районының Җәлил бистәсенә шатлыклы вакыйгалар алып килде. Кичә биредә тантаналы шартларда яңа стоматология дәваханәсе һәм 660 укучыга исәпләнгән гимназия сафка басты. Яңа объектларны ачуда "Бердәм Россия" сәяси партиясе Югары Советы рәистәше Минтимер Шәймиев, Татарстанның сәламәтлек саклау министры Камил Зыятдинов, мәгариф министры Фарис Харисов, Дәүләт Советы Рәисе урынбасары Марат Мәһдиев, "Татнефть" ААҖ генераль директоры Шәфәгат Тәхаутдинов һәм башка рәсми кешеләр катнашты. Тантананы "Татнефть" акционерлык җәмгыяте генераль директоры ШәфәгатТәхаутдинов ачты.

Эдуард Шеварднадзега отставкага китү карары җиңел генә бирелмәгәнгә охшый. Әмма ул дөрес эшләде, чөнки илне гражданнар сугышына кадәр җиткерергә ярамый иде, - диде сайлау алды ялындагы Татарстан Президенты Минтимер Шәймиев 24 ноябрьдә журналистларга биргән интервьюсында. Без Грузиянең Россия өчен дустанә ил булып калуын теләр идек, чөнки ул стратегик яктан безнең өчен мөһим төбәк. Оппозициянең, Эдуард Шеварднадзеның иминлеген гарантиялибез, дигән белдерүенә ышанасы килә, өстәвенә, мин, аның эшләренә лаеклы бәя бирелергә тиеш, дип исәплим. Грузин халкы моны эшли белә. Яңа президентны һәм яңа парламентны сайлауга килгәндә исә, бу - Грузиянең эчке эше, диде Минтимер Шәймиев.

Кичә Татарстан Республикасының Милли китапханәсендә мәшһүр казах шагыйре һәм публицисты, күренекле төрки телләр белгече, ЮНЕСКОдагы Казахстан Республикасы вәкиле Олжас Сөләйменов белән очрашу булды. Очрашу вакытында О.Сөләйменовның яңа гына табадан төшкән "Тарихкача төркиләр" (Борынгы төркиләрнең телләре һәм язуларының килеп чыгышы) дигән китабын халыкка тәкъдим итү тантанасы булды.

20 ноябрьдә Казанда "Россия БЭЧ" РАҖ идарәсе рәисе Анатолий Чубайс һәм сайлау алды ялындагы Татарстан Президенты Минтимер Шәймиевнең рәсми булмаган очрашуы булды. Мәскәү һәм җирле журналистларга илнең баш энергетигы әйтүенчә, Россия өчен бик катлаулы соңгы 12 елда Татарстан башлыгының киңәшләре берничә тапкыр муафыйк карарлар сайлап алуда ярдәм итте.

"Бердәм Россия" партиясе Югары Советы рәистәше Минтимер Шәймиев 18 ноябрьдә тантаналы рәвештә ачылган "Казан Кремле осталарына" скульптура композициясен Татарстанның күпмилләтле халкының җитлеккәнлегенә, белем дәрәҗәсенә һәм югары интеллектына һәйкәл дип атады. Әгәр без рус халкы татар халкын, татар халкы рус халкын һәм республика территориясендә яшәүче барлык халыкларны үзара ихтирам итү хисе белән сугарылганбыз икән, бу, чыннан да, безнең күпмилләтле халкыбызның җитлеккәнлегенә һәйкәл булып тора, диде Минтимер Шәймиев. Рус һәм татар осталары бергә басып тора торган һәйкәлдә мәңгеләштерелгән татулыкны без ныгытабыз һәм, аны саклауларын теләп, киләчәк буыннарга тапшырабыз.

15 октябрьдә Г.Камал исемендәге Татар дәүләт академия театрында "Татарстан - Яңа гасыр" (ТЯГ) республика иҗтимагый-сәяси хәрәкәтенең V җыены булды. Анда РФ Федераль Җыелышының Дәүләт Думасына депутатлар сайлау кампаниясе вакытында ТЯГның сәяси юнәлеше турындагы мәсьәлә каралды.

"ТЭФИ-Төбәк" Бөтенроссия телевидение зона конкурсы Россия күләмендә икенче тапкыр үткәрелә. Конкурс өч зонада старт алды. "Көнбатыш" зонада урнашкан Югорск шәһәре үзенең җиңүчеләрен 16 октябрьдә, ә Иркутск ("Көнчыгыш" зона) 30 октябрьдә билгеләде. Менә чират зонаның үзәге саналган Казанга килеп җитте. Бирегә Россиянең төрле төбәкләреннән: Тула, Владимир, Клин, Чиләбе, Түбән Новгород, Смоленск, Ижаудан килгәннәр иде. Өч шәһәрдә җиңгән "ТЭФИ-Төбәк" лауреатларын 28 ноябрьдә Сочи шәһәре җыячак.

Казанның М.Гафури урамында "Калейдоскоп" исемле мәдәни-спорт комплексы эшли башлады. Ачу тантанасында "Бердәм Россия" партиясе Югары Советы рәистәше М.Шәймиев, ТР Премьер-министры Р.Миңнеханов, ТР Президенты Аппараты җитәкчесе Ә.Гобәйдуллин, Казан шәһәре хакимияте башлыгы К.Исхаков, Татарстан Республикасының төрле министрлыклары һәм ведомстволары җитәкчеләре катнашты. "Калейдоскоп" мәдәни-спорт үзәге - Татарстанда соңгы елларда төзелгән иң эре комплекслардан берсе. Ул киләчәктә республикада гына түгел, Россиянең Европа өлешендә дә иң зур сәламәтлек үзәкләренең берсенә әвереләчәк.

Нурлатта һәм Әгерҗедә кичә яңа тимер юл станция биналарын файдалануга тапшыру тантанасы булды.

11 ноябрь көнне Әгерҗенең вокзал яны мәйданчыгында бөек якташлары истәлегенә һәйкәл куелды. Хәзердән ул мәйдан Таҗи Гыйззәт исемен йөртәчәк. Һәйкәл ачуга багышланган тантаналы митингта «Бердәм Россия» партиясенең Югары советы рәистәше Минтимер Шәймиев, Удмуртия Республикасы Президенты Александр Волков, ТР Премьер-министры Рөстәм Миңнеханов, «Россия тимер юллары» ААҖ президенты Геннадий Фадеев, Әгерҗе районы хакимияте башлыгы Фәрит Габбасов, ТР Язучылар берлеге рәисе Фоат Галимуллин катнашты.