ЯҢАЛЫКЛАР

Татарстанга Россия, БДБ, Балтыйк буе илләренең, Германия, Болгариянең массакүләм мәгълүмат чараларыннан 48 журналист килде. Алар Казанның истәлекле урыннары, мәдәни, социаль-икътисадый тормышы белән таныша. Аннары алар үзләре күргәннәре һәм ишеткәннәре белән газеталарда язып, радио аша сөйләп һәм телевидениедән күрсәтеп дөньяны таныштырачак.

Казанга Чиләбе өлкәсе губернаторы Петр Сумин җитәкчелегендә өлкәнең рәсми делегациясе килде. Инде хәбәр ителгәнчә, 28 августтан 30 августка хәтле Татарстанда Чиләбе өлкәсе көннәре узачак. Халыкара "Казан" аэропортында кунакларны Татарстан Президенты Минтимер Шәймиев, Татарстан Премьер-министры Рөстәм Миңнеханов, Татарстан Дәүләт Советы Рәисе Фәрит Мөхәммәтшин, республика хөкүмәте әгъзалары, Татарстанның җәмәгатьчелек һәм дини конфессияләре вәкилләре, башкалар каршы алды.

Кайбыч районының Иске Тәрбит урта мәктәбе үзенең бер гасырдан артык яшәү гомерендә өченче тапкыр яңа йортка күчте. Ул Казан губернасының Цивиль өязенә кергән вакытта биредә беренче мәктәп 1897 елда чиркәү каршында ачыла.

Узган якшәмбедә, ягъни 24 августта башкалабыз Казанда "Бердәм Россия" сәяси партиясенең Татарстан төбәк бүлеге чираттан тыш III конференциясен үткәрде. Бу вакыйганы РФ Дәүләт Думасына һәм Татарстан парламентына сайлауларга әзерләнүнең рәсми булмаган старты дип бәяләргә мөмкин. Сәяси аналитикларыбыз фаразлаганча, конференциядә партиянең төбәк бүлеге секретаре Юрий Нәҗмиев үз ихтыяры белән вазифасыннан китте һәм бу урынга Татарстан Дәүләт Советы Рәисе Фәрит Мөхәммәтшин сайланды.

Кичә Казанга "Газпром" ААҖ делегациясе килеп төште. Идарә рәисе урынбасары Сергей Ушаковны, идарә вәкиле Богдан Будзулякны һәм башкаларны Татарстан Президенты Минтимер Шәймиев белән Премьер-министр Рөстәм Миңнеханов каршы алды.

20 август көнне Татарстан башкаласы Казанда Россия укучыларының җәйге Спартакиадасы кысаларында яшь шахматчыларның финал ярышлары ачылу тантанасы үтте.

19 август көнне Татарстан Президенты Минтимер Шәймиев Тәтеш районында булды. Республика башлыгы катнашында үткәрелгән тантаналы чаралар, бигрәк тә Пролей-Каша авылында мәдәният-мәгърифәт комплексын, район халыкны социаль тәэмин итү үзәгенең яңа бинасын (монда гаиләгә һәм балаларга социаль ярдәм бүлеге һәм социаль ашханә урнашкан) ачу район халкы өчен күптән көтелгән бәйрәм булды.

Казан Кремлендә Татарстан Республикасы Президенты Минтимер Шәймиев Татарстан Республикасында Кеше хокуклары буенча Вәкаләтле вәкил Рәшит Вәгыйзов белән очрашты. Очрашу барышында кеше хокукларын яклау системасын камилләштерү мәсьәләләре тикшерелде. Татарстан Президенты, аерым алганда, балаларның хокукларын һәм законлы мәнфәгатьләрен яклауның кайбер аспектларына игътибарны юнәлтте.

9 августта Татарстан Президенты Минтимер Шәймиев "Ак Барс" хоккей командасы җитәкчелеге белән очрашты. Мәгълүм булганча, төп-төгәл бер ай узгач - 10 сентябрьдә Мәскәүдә "Ак Барс" һәм ЦСКА командалары уены белән суперлигада хоккей буенча Россия Федерациясе чемпионаты башлана. Әңгәмә вакытында Президент башлыча команданың чемпионатка ничек әзерләнүе белән кызыксынды.

13 августта Татарстан Республикасы Президенты М.Ш.Шәймиев Актаныш районы үзәгендә ТР Элемтә министрлыгы "Татарстан почтасы" идарәсенең почта элемтәсе, "Таттелеком"ның электр элемтәсе үзәкләрен һәм "Актаныш" сәүдә йортын ачуда катнашты.