ЯҢАЛЫКЛАР

Узган ял көнендә Тубыл шәһәрендә Сабантуй зур милли бәйрәм булып үтте, анда меңнән артык кеше катнашты. Быелгы Сабантуйның шәһәр ял паркында үткәрелүе дә бик ошады тубыллыларга.

Казанда узган елны 30 август - Татарстан Республикасы һәм Казан шәһәре көнне үткәрелгән "Сотворение мира"/"Тынычлык булдыру" I Халыкара музыка фестивале зур танылу алды һәм 150 меңләп кешене Меңьеллык мәйданына җыйды. Быел исә Казанда II Халыкара фестиваль, мэр Илсур Метшин үтенече буенча, 27 июнь - Яшьләр көнендә булачак.

22 июньдә иртән Татарстанның "Ватан" яшьләр берләшмәсе әгъзалары башлангычы белән Бөек Ватан сугышы башлануга 67 ел тулу уңаеннан митинг узды. Ил каһарманнарын хөрмәтләп искә алырга теләк белдергән Татарстанның яшь патриотлары (алар арасында "Ватан" берләшмәсе активистлары һәм студентлар эзләнү отрядлары вәкилләре бар иде) Мәңгелек ут ялкыныннан шәмнәр кабызу өчен Горький паркындагы мемориал янында җыелды.

"Алтын мөнбәр" V Халыкара мөселман кинофестиваленең сайлап алу комиссиясе исемлеге расланган. Әлеге составта кино белгечләре, кино тәнкыйтьчеләре Вита Рамм, Сергей Лаврентьев, "Россия" телеканалының "Мусульмане" программасы җитәкчесе Василий Антипов, кинодокументалист Ингрид Демец (Италия), кинорежиссер Шериф аль-Бандари (Мисыр), журналист һәм күп кенә фестивальләр кураторы Умма Дагуна (Һиндстан) бар, диелә "Татаркино" ДУ сайтыннан алынган мәгълүматта. Фестивальнең сайлап алу комиссиясе җитәкчесе - кино белгече, кино тәнкыйтьчесе, сәнгать фәннәре докторы Шлегель Ханс-Йохим (Алмания).

Башкортстанның Балтач районындагы данлыклы татар авылы Көндәшле бу көннәрдә бик күп кунаклар кабул итте. Биредә авылның 400 еллыгына багышланган тантаналы чаралар оештырылды. Әлеге бәйрәмнең төп өлеше булып "Көндәшлемнең дәрәҗәсе - нәселләребез шәҗәрәсе" дип аталган шәҗәрә бәйрәме торды.

Быел Татарстан башкаласында Сабантуй өч мәйданда узды һәм традиция буенча "Казан" Халыкара ат-спорт комплексында ат чабышы белән тәмамланды, анда ТР Президенты Минтимер Шәймиев тә булды.

20 июньдә Татарстан башкаласында татар халкының милли бәйрәме Сабантуй уза. Быел бәйрәмне Совет һәм Идел буе районнарындагы Каенлыкларда һәм Киров районындагы Аккош күлендә бәйрәм итәләр. Төп Сабантуй Аккош күлендәге урман-парк зонасында оештырылды.

20 июньдә ТР Премьер-министры, Универсиаданың оештыру комитеты рәисе урынбасары Рөстәм Миңнеханов 2013 елда узачак XXVII Бөтендөнья җәйге Универсиада объектлары төзелеше белән танышты.

ТР яшьләр эшләре, спорт һәм туристлык министры Марат Бариев Татарстан волонтерларына Россиядә беренчеләрдән булып волонтер кенәгәләре тапшырды. Казанда Универсиадада катнашу максаты белән 24 июньдә Белградка юл тотачак Татарстанның 150 волонтеры өчен тренинг узды.

ТР Хөкүмәте башлыгы Рөстәм Миңнеханов Татарстан Республикасы Министрлар Кабинетында Франция Республикасының Россия Федерациясендәге Гадәттән тыш һәм Тулы вәкаләтле илчесе Жан де Глиниасти белән очрашты.