ЯҢАЛЫКЛАР

ТР терлекчеләре сөт җитештерү темпларын арттыруны дәвам итә. Узган тәүлектә сөтнең тулай савымы 3782 тонна тәшкил иткән, бу якынча узган ел күрсәткечләре кадәр дигән сүз. Бу хакта "Татар-информ" агентлыгы хәбәрчесенә ТР Авыл хуҗалыгы һәм азык-төлек министрлыгында белдерделәр.

23 июньдә Колсәет бистәсендә урнашкан "Кояшкай" балалар җәйге сәламәтләндерү лагерында "Без булдырабыз!" республика хәйрия акциясе кысаларында балаларга спорт кирәк-яраклары тапшырылды.

"Сабантуй таш яуса да узачак!" дигән аксиомага әверелгән хакыйкатьне узган шимбәдә Люберцыда үткән Мәскәү өлкәсе Сабан туе тагын бер мәртәбә раслады.

Татарстан балалары 22 июньнән алып 13 июльгә кадәр Краснодар краеның Анапа районы Сукко бистәсендәге "Смена" сәламәтләндерү лагере базасында социаль-икътисади юнәлештәге "БИНИЛЕКТ иле" дип аталган профиль сменасында ял итә. Әлеге смена быел сигезенче тапкыр уздырыла.

22 июньдә Яшел Үзәннең Җиңү паркында тантаналы рәвештә нигез ташы салынды, анда 2010 елның 9 маенда Яшел Үзәннең тыл хезмәтчәннәре хөрмәтенә һәйкәл куелачак.

Казан бистәләрендә яшәүчеләр соңгы эссе көннәрдә торбалар буенча бирелә торган суга кытлык мәсьәләсендә мэрия сайтының интернет-кабул итү сәхифәсенә күп тапкырлар мөрәҗәгать иткән. Бу хакта бүген шәһәр хакимиятенең "дүшәмбе киңәшмәсе"ндә мэр Илсур Метшин үзе хәбәр итте һәм "Водоканал" муниципаль унитар предприятиесе директоры Наил Җамалиевтан ачыклык кертүне таләп итте.

ТР Президенты Минтимер Шәймиев "Татарстан Республикасында яшьләр һәм дәүләт яшьләр сәясәте турында", "Татарстан Республикасы дәүләт милкен хосусыйлаштыру турында"гы законнарга үзгәрешләр кертү, "Татарстан Республикасының Баулы районындагы Зирекле-Каран авылын юкка чыгару һәм "Баулы муниципаль районы" муниципаль берәмлеге һәм аның составындагы муниципаль берәмлекләрнең статусы һәм территорияләре чикләрен билгеләү турында"гы Татарстан Республикасы Законына үзгәрешләр кертү хакындагы законнарны имзалады.

Татарстан Премьер-министры Рөстәм Миңнеханов ТР Хөкүмәтенең "Татарстан Республикасы территориясендә Россия Федерациясе субсидияләрен җәлеп итеп социаль программаларны гамәлгә ашыру турында"гы карарына кул куйды. Программаның төп максаты - эшләми торган пенсионерларның, шул исәптә Татарстан Республикасы халкына стационар учреждениеләрдә социаль хезмәт күрсәтү шартларын яхшырту.

Россия Ислам университетында Татарстан мөслимәләренең Кувәйт иленнән килгән делегация вәкилләре белән очрашуы үтте. Исегезгә төшерәбез, бары тик хатын- кызлардан торган әлеге делегация Казанга 18 июнь көнне килгән иде. Алар арасында җәмәгать эшлеклесе, рәссам, мәгариф һәм медицина өлкәсендә эшләүче ханымнар бар. Татарстанга сәфәрләре дәвамында алар республикада яшәүче мөслимә хатын-кызлар белән танышырга теләү ниятен белдерде.

Илнең мәдәни үзәге булган Санкт-Петербургта "Шүрәле" балетын яңарту хакында сүз күптән бара иде инде. Хикмәт шунда, төньяк башкалада моннан утыз еллар элек бу әсәр гөрләп барган. Ул һәрчак аншлаг белән үткән.